دوومین نامه قرنتیانیرا 1 - کتاب مقدس به زبان تالشی شمالی1 پولُسی طرفی کا که خِدا پیسته نَه، مسیح عیسی رسولَه، و چَمَه بِرا کا تیموتائوس، خِدا کلیسا را قُرِنتُسی شهری کا، و گِردِ مقدسون را، اَخائیه ولایتی سَرتاسری کا: 2 چَمَه دَده، خِدا طرفی کا و خِداوندْ عیسایِ مسیح طرفی کا، فیض و صُلح و سلامتی شِمَه را با! گِردِ تَسلیون خِدا 3 مُتِوارک بِبو خِدا، چَمَه خِداوند عیسایِ مسیح دَده، که رَحمتون دَده یَه و گِردِ تَسلیون دَده یَه؛ 4 هَ خِدا که بَمون، چَمَه گِردِ مصیبتون دیلَه کا تَسلی بَدای، تا اَمَه نی بِشایَم کسونی که مُصیبَتون کااینه، اَ تَسلی نَه که اَیی کا ویگِتَمونه، تَسلی بِدییَم. 5 چوم هَتَه که مسیح عَذابون کا فَت و فَراوون سهم بَبَردیمون، هَتَه نی مسیح واسطه نَه تَسلی کا فَت و فَراوون سهم بَبَردیمون. 6 اَگم اَمَه مصیبتی کا ایمونه، شِمَه تَسلی و نجاتی واسی یَه؛ و اَگم تَسلی دارَم، شِمَه تَسلی واسی یَه، و اِم اَ موقعی بِه کار بومَی که شِمَه هَ عَذابونی که اَمَه کَشَم، صبر و حوصله نَه تاو بواَرَه. 7 چَمَه اُمید شِمَه درباره پابَرجایَه، چوم بَزنیمون هَتَه که چَمَه عَذابون کا سهم دارَه، چَمَه تَسلیون کا نی سهم بَبَردیرون. 8 چوم که اِی بِرااِن، نِپیستِمونه اَ مصیبتونی کا که آسیا منطقه کا چَمَه سَر اومَه، بی‌خَوَر بِبییَه. چوم فِشارونی که چَمَه سَر اومَه چَمَه طاقتی کا وِرتَر بَه که چَمَه زِنده مَندِه کا نی ناامید بیمونه. 9 در واقع اَمَه را اِنتَه بَه که اِنگاری اَمَه مرگی را محکوم کَردِشونه. امّا اِمِن گِرد اِمی واسی اِتِفاق دَلَکینه تا نِه بِه اِشتَن، بَلکَم بِه خِدا توکل بِکَرَم، اَیی که مَردَه اون زِنده آکَرِه. 10 خِدا، اَمَه اِنتَه رَه خَطری کا که کِشِه، رَهایی دوشَه و رَهایی بَدای. چَمَه اُمید بِه اَ کسی یَه که هَنی اَمَه رَهایی بَدای، 11 شِمَه نی بَسی شِمَه دعااون نَه اَمَه کمک بَکَرَه، تا وِر کَسِن چَمَه واسی شُکر بِکَرِن، اَ بَرَکتی واسی که وِرکَسون دعا جواوی کا، اَمَه آدوعَه بَه. پولُسی نَخشَه اِن عوض آبون 12 چوم چَمَه اِفتخار، چَمَه وجدانَه که گواهی بَدای، که اِم دنیا کا اَمَه رو راستی و صاف و صادقی نَه که خِدا کا یَه رفتار کَردِمونه، نِه آدَمی حِکمَتی نَه، بَلکَم خِدا فیضی نَه رفتار کَردَمونه مخصوصن شِمَه نَه. 13 چوم که اَمَه اَ چیی غِیراز که شِمَه خونَه و فَهمَه شِمَه را نِنیویسَم. و از اُمید دارِم که شِمَه اِمی چاک بِفَهمَه- 14 هَتَه که تا حدودی اَمَه آزونِستَرونه، تا چَمَه خِداوندْ عیسی روزی کا شِمَه بِه اَمَه افتخار بِکَرَه، هَتَه که اَمَه شِمه واسی اِفتخار بَکَردیمون. 15 چوم اِمی کا مطمئن بیمَه، پیستِم بَه اوّل بام شِمَه وَر تا دِ کَرَه فیضی تجربه بِکَرَه. 16 از پیستِم بَه که چِمِن راه سَری کا بام مقدونیه منطقه را و شِمَه بِوینِم، و مقدونیه کا هَنی آگردِم شِمَه وَر تا مِن رایی بِکَرَه یَهودیه ولایتی را. 17 مَگم وختی که پیستِم بَه اِم کاری بِکَرِم، دِ دیل بیمَه؟ مَگم از آدَمی فیکرون نَه تصمیم بَگتیم، جوری که ایی لحظه هَم بوآجِم ’ها، ها‘ و هَم بوآجِم ’نِه، نِه‘؟ 18 خِدا وَفادری سَر قَسَّم، که چَمَه گَف شِمَه نَه ’ها‘ و ’نِه‘ نِبَه. 19 چوم که خِدا زوعَه، عیسایِ مسیح، که از و سیلاس و تیموتائوس اَیی شِمَه دیلَه کا اِعلام کَردِمونه، ’ها‘ و ’نِه‘ نِبَه، بَلکَم اَیی کا همیشه ’ها‘ یَه. 20 چوم خِدا وعده اِن گِرد، عیسایِ مسیح کا ’ها‘ اینه. اِمی واسی چَیی واسطه نَه یَه که اَمَه ’آمین‘ بَواتیمون، تا خِدا جلال بوینِه. 21 و خِدا یَه که اَمَه، شِمَه نَه مسیح کا پابَرجا بَکَردی، و اَ اَمَه مَسح کَردَشه، 22 و اَ اِشتَن مُهری چَمَه سَری کا ژَندِشَه و اِشتَن روح، ایلَه بَیانه شیوار چَمَه دیلون کا نوعَشه. 23 خِدا شاهِد بَگتیم که فقط اِمی واسی که شِمَه ناراحت مَکَرِم آنِگردِستیمَه قُرِنتُسی شهری را. 24 نِه اِم که شِمَه ایمانی سَر آقایی بِکَرَم، بَلکَم شِمَه نَه و شِمَه شادی را تَقّلا بَکَردیمون، چوم که ایمانی کا پابَرجاایرونه. |
@ 2024 Korpu Company