اوّلین نامَه تیموتائوسیرا 6 - کتاب مقدس به زبان تالشی شمالی

¹ گِردِه کسونی که بندگی یوغی جیری کا اینَه، بَسی اِشتَن اَربابون تمام کمال اِحترام بِنَن تا خِدا نومی ضِد و چَمَه تعلیمی نَه بَدَه چیی مَواجِن.

² کسونی که چَوون اَربابِن ایمانداری نَه، نَبی بِرا بییِه واسی، اَوون کمتر حُرمت بِکَرن. بَلکَم بَسی اَوون حتی چاکتر خِدمت بِکَرِن، چوم کسونی که اِم خدمتی کا منفعت بَبَردین، ایماندار و عزیزی نَه. اِم چییون اَوون تعلیم بِدَه و تشویق بِکَه که اِنتَه بِکَرِن.

پولدوستی آخِرعاقبت

³ اَگم کسی جور دییَری تعلیم بِدَه و چَمَه خِداوند عیسایِ مسیح، دُرستَه کلامی و اَ تعلیمی نَه که دینداری راه دیلَه کایَه جور مَبو،

⁴ اَیی غرور گِتَشَه و هیچی نِفهمه. اِنتَه رَه آدَمی جنگ و جَدَل و دعوا مُرافه کلمه اون سَر هِستِشه که اَیی کا حسودی، اِختلاف، بُختون و بَدگُمانی،

⁵ و دائم مردمی دیلَه کا جنگ و جَدلی باعث بَبی که چَوون فیکر فاسد بییَه و حقیقتی کا بی نصیبی نَه و خَیال بَکَردین دینداری، وسیله ای اِستَه منفعتی را.

⁶ امّا دینداری قناعتی نَه، بَرکَ منفعتی یَه.

⁷ چیرا که اَمَه هیچی وَرده نیمونَه اِم دنیا و نیمَشایَم اِم دنیا کا نی هیچی بِبَرَم.

⁸ ولی اَگم اَمَه خوراک و خَلا هِستِمونه، اِمون نَه قانِع بَبیمون.

⁹ امّا کسونی که پولدار بییِه آرزو هِستِشونه، وسوسه کا، تَله دیلَه کا دَلَکِن و وِرَه بیخودی یَه پیسته اون کا دَلَکِن که ضرر بَژَین، که مردمی نابودی و هلاکتی طرفی را کَشونِن.

¹⁰ چوم پولدوستی همه جورَه بَدی ایی ریشه اِستَه. و هِم پولی حِرصی واسی یَه که بَعضی اِن ایمانی کا دور آبینَه، اِشتَن وِرَه دَردون گیریفتار کَردَشونَه.

پولُسی سفارش تیموتائوسی را

¹¹ امّا تِه که مِردِ خِدا ایش، اِم چییون کا دَوَز، و صالحی، دینداری، ایمان، مُحبت، پابَرجایی و ملایمتی دومله بِبَش.

¹² ایمانی چاکَه جنگی کا بِجَنگ. دَچیک اَ اَبَدی یَه زِندگی که اَیی را دَعوت بیشه و اَیی، وِرَه شاهِدون پیشی کا اِعتراف کَردِرَه.

¹³ از خِدا پیشی کا که گِردِ چییون زِندگی بَبَخشستی، و مسیح عیسی که پُنتیوس پیلاتُسی وَری کا چاک اِعتراف کَردِشه، بَرک، بَه تِن سفارش بَکَردیم،

¹⁴ که اِم حُکمی تا چَمَه خِداوند عیسایِ مَسیح اومِه موقع، بیدون عیب و بیدون سَرکوفت غَم بَری،

¹⁵ که خِدا اَیی ایلَه مناسبِه وختی کا اَنجام بَدای، اَ که مُتِوارکَه و تنها حاکم و شاه شاهان و خِداوندون، خِداوندَه.

¹⁶ فقط اَ اِستَه که اَبَدی یَه، اَ که ایلَه نوری کایَه که نییَب بَیی نِزدیک آبی، و هیچکس اَیی ویندَه نیشَه و نیمَشا بِوینِه، حُرمت و سلطنت تا اَبَد اَیی نَه بِبو. آمین.

¹⁷ اِم دنیا پولدارون نَه بوآج که مغرور مَبون و اِشتَن اُمیدی اِم دنیا مالی سَری کا مَنَن که نِمونِه، بَلکَم چَوون اُمید بِه خِدایی بِبو که گِردِ چییون فَت و فَراوون بَمون را آمادَه آکَردَشَه تا اَوون کا کِیف بِکَرَم.

¹⁸ اَوون دستور بِدَه که چاکی بِکَرِن و چاکَه کارون دیلَه کا دولتمند بِبون، دَس و دیل باز و بَخشندَه بِبون.

¹⁹ اِنتَه، ایلَه گنجی اِشتَرا اَنبار بَکَردین که چَاکَه پاکاری آینده را یَه، تا بِشان اَ چیی که حقیقی یَه زِندگی یَه بِه دَس بواَرِن.

²⁰ اِی تیموتائوس، اَ، اَمانتی که بَه تِن دَسپَرده بییَه، حِفظ بِکَه. مِفتَه گفون کا و مخالف فیکرونی کا که اِشتباهی معرفت بَواتین، دوری بِکَه؛

²¹ چون بعضی اِن که اِم چییون دیلَه کا اِدعا هِستِشونه، ایمانی کا دور آبَیینه. فیض بَه تِنَه بِبو.