اوّلین نامَه تیموتائوسیرا 5 - کتاب مقدس به زبان تالشی شمالی

تعلیمِن کلیسا را

¹ پیرَه مِردَکی سَرکوفت مَژَن، بَلکَم اَیی اِشتِه دَده شیوار تشویق بِکَه، و جَوونون نی اِشتِه بِرااون شیوار،

² و پیرَه ژِنَکون نی اِشتِه نَنه اون شیوار، و جَوونَ ژِنَکون اِشتِه خالا اون شیوار، تمون پاکی کا.

³ ویوَه ژِنَکون اَگم راس راسی بی کَسی نَه، حُرمت بِنَه.

⁴ امّا اَگم ایلَه ویوَه ژِن، خِردَنون و نوه اون هِستِشه، اَوِن بَسی اوّل باموجِن که اِشتَن خانوادَه ویرا بییِه نَه، اِشتَن دینداری نیشون بِدَن و اِنتَه اِشتَن دِینی اِشتَن دَده نَنه و اِشتَن اَبا اَجدادی اَدا بِکَرِن، چیرا که اِم، خِدا راضی بَکَردی.

⁵ اَ کسی که واقعا ویوَه و بی‌کَسَه، خِدا اُمید دارِه و شَو اَنده روز دعا بَکَردی و خِدا کا کمک بَپیستی.

⁶ امّا اَگم ایلَه ویوَه ژِن عَیاشی نَه زندگی بِکَرِه، با اِمکه زِندَه یَه، مَردَه.

⁷ اِم چییون نی حُکم بِکَه تا چَوون زندگی کا چیی مَبو که اَیی را سَرکوفت بِبون.

⁸ ولی اَگم کسی اِشتَن فامیلون بِه خصوص اِشتَن خانواده اِحتیاجاتی دومله مَبو، اِشتَن ایمانی هاشا بَکَردی و ایلَه بی ایمانی کا نی بَدتَرَه.

⁹ فقط اَ ویوَه ژِنَکونی نوم نویسی بِکَه که شَصت سالی کا وِرتَر سین هِستِشونه و ایی کَرَه شو کَردَشون بِبو.

¹⁰ و چاکَه کارون اَنجام دوعِه را معروف بِبو، یعنی: اِشتَن خِردَنون یال آکَردَش بِبو، غریبنواز بِبو، مقدّسون پایون شوشتَش بِبو، و دَردمَندون ویرا بِبو، و اِشتَن وقف هَر جورَه چاکه کار کَردشون بِبو.

¹¹ امّا جوونتَرَه ویوَه ژِنِکون نومنویسی مَکَه، چوم هِنتَه که چَوون هَواهَوس، اَوون مَسیح کا دور آکَرِه، پیستِشونَه شو بِکَرِن.

¹² اِمی واسی محکوم بَبین، چوم اِشتَن اوّلین ایمانی پاجیر بَناین.

¹³ چِمی غِیراز، اَوِن تنبلی آموجِن، اِم کَ اَ کَ بَشین، نِه فقط تنبلی، بَلکَم خَوَربَر و فضول بَبین و اَ چییونی که نَبی بوآجین، بَواتین.

¹⁴ بَس چِمِن نظر اِمَه که جَوونتَرَه ویوَه ژِنَکِن شو بِکَرِن، خِردَن بواَرِن و کَ داری بِکَرِن و دِشمِنی فرصت مَدَن بُختون بِژَنِه.

¹⁵ چوم حِسَه نی بَعضی شیطانی دومله شَیینه و گُمراه آبَیینه.

¹⁶ اَگم ایلَه ایماندارَه ژِنی، اِشتَن فامیلون دیلَه کا ویوَه بِدارِه، بَسی اِشتَن اَوون کمک بِکَرِه تا کلیسا را سَربار مَبون و کلیسا بِشا اَ ویوَه ژِنَکَونی کمک بِکَرِه که واقعا بی کَسی نَه.

¹⁷ مشایخی که چاک رهبری کَردَشون بِبو، دِ برابر حُرمتی لایقی نَه، بِه خصوص کسونی که موعظه و تعلیم دوعِه کا زحمت بَکَشدین.

¹⁸ چوم توراتی کیتابی کا بَواتی که: «ایلَه گایی گَ که کارا خَرمَن کوفِه مَدَوِند» و «کارگر بَسی اِشتَن دَس مِزدی ویگِرِه.»

¹⁹ هیچ بُختونی کلیسا شیخون ضِد قبول مَکَه، مَگر اِمکه دِ یا سِه گِله شاهِد بِبو.

²⁰ کسونی که گناه کا پافشاری بَکَردین، گِردی پیشی کا توبیخ بِکَه تا بقیه بِتَرسِن.

²¹ خِدا و مسیح عیسی و اِنتخاب بییَه ملائیکه اون پیشی کا، تِه کا خواهیشت بَکَردیم که اِم قانونون بی هیچ غَرَضی رعایت بِکَری و هیچ کاری طرفداری واسی اَنجام مَدَی.

²² اِمی واسی که ایی نفری خِدمتی را تعیین بِکَری مَتاو و بقیه گناه اون کا شریک مَبَش، بَلکَم اِشتَن پاک غَم بَه.

²³ دِ فقط آو مِنج، بَلکَم اِشتِه معده واسی و اِشتِه ناخوشیون را که همیشه هِستِرَه، روکتِه شَراو نی بِنج.

²⁴ بعضی آدَمون گناهِن معلومی نَه و نارنارِه اَوِن بَشین داوری را، امّا بقیه آدَمون گناهِن عَری تَر معلوم بَبین.

²⁵ بَس چاکَه کارِن نی معلومی نَه و حتی اَوِنی که معلوم نینَه، نییَب نِین غَم هَردِه.