اوّلین نامَه تیموتائوسیرا 4 - کتاب مقدس به زبان تالشی شمالی

بعضی اِن ایمانی کا آگردِن

¹ امّا خِدا روح، آشکارا بَواتی که آخِر زمانی کا، بعضی اِن اِشتَن، اَ روحونی که گول بَژَین و دیوون تعلیمون، وقف بَکَردین و ایمانی کا آگَردِن .

² دروعَه واجِن و دِ دیمِن اِنتَه رَه تعلیمون بواَردین که چَوون وجدان مَردَه یَه.

³ اَوِن عروسی کَردِه قَدِغَن بَکَردین و دستور بَداین اَ غذا اونی که خِدا خلق کَردَشه، مَرِن تا کسونی که حقیقتی ایمان دارِن و اَیی آزونِن، شُکرکَردِه نَه غذا اون بَرِن.

⁴ چوم هَر چیی که خِدا خَلق کَردَشه، چاکَه و هیچی نَبی رَد کَردِه، اَگم شُکرکَردِه نَه قَبول بِبو،

⁵ چیرا که خِدا کلام و دعا نَه تَقدیس بَبی.

⁶ اَگَم اِم چییون بِرااون باموجی، مسیحْ عیسی نوکر بَبیش، که ایمانی کلامی کا و چاکه تعلیمی که چَیی دومله کا ایش، تربیت بَبیش.

⁷ تِه داستانونی نَه که کفرآمیزَه و پوچی نَه کاریر مَبو، بَلکَم اِشتَن دینداری کا تربیت بِکَه؛

⁸ چوم هَر چَن تربیت کَردِه بَدنی را روکَتِه فایده هِستِشَه، امّا دینداری گِردِ چییون را فایده هِستِشَه، چوم که هَم اِم زِندگی را وعده بَدای، هَم آیندَه زِندگی را.

⁹ بَبی اِم گَفی اِعتماد کَردِه و هر طرفی کا کاملا قابل قَبولَه.

¹⁰ چوم که اَمَه اِمی واسی زحمت کَشَم و تقّلا بَکَردیمون، چوم اَمَه چَمَه اُمیدی خِدای زِنده سَری کا نوعَمونه که گِردِ آدَمون نجات دهنده یَه، بخصوص کسونی که ایمان دارِن.

¹¹ اِم چییون حُکم بِکَه و تعلیم بِدَه.

¹² مَرزِن هیچکس اِشتِه جَوونی روک بِزونِه، بَلکَم گف ژندِه کا، کِرداری کا، محبتی کا، ایمانی کا و پاکی کا، گِردِ ایماندارون را سَرمشق بِبَش.

¹³ تا از بام، اِشتَن اِمی را وقف بِکَه که خِدا کلامی مردمی را بوخونی و اَوون تشویق بِکَری و تعلیم بِدَی.

¹⁴ اَ عَطایی که اِشتِه دیلَه کایَه، بی‌اِعتنایی مَکَه، عَطایی که نَبوّتی واسطه نَه بِه دَس وَردَرَه، اَ موقعی که شورا مشایخ اِشتِه سَر دَس پِنوشونَه.

¹⁵ اِم چییون عمل بِکَه، و اِشتَن چَوون را وَقف بِکَه تا اِشتِه تَرقی گِردی را معلوم بِبو.

¹⁶ اِشتِه هَواس چاک، بَه تِه کا و اَ تعلیمی کا که بَدایش بِبو. اِمی کا پابَرجا بِبَش، چوم که اِم کاری نَه هَم اِشتَن و هَم کسونی که اِشتِه گفی دَرَسِن نجات بَدایش.