اوّلین نامَه تیموتائوسیرا 3 - کتاب مقدس به زبان تالشی شمالی

کلیسا ناظِرِن و شماسِن

¹ بَبی اِم گفی اِعتماد کَردِه: که اَگم ایی نفر آرزو داره کلیسا نظارتی بِدارِه، چاکه کاری دومله یَه.

² بَس ایلَه ناظر بَسی چَیی زندگی کا هیچی مَبو که چَیی واسی سَرکوفت بَرِه، ایلَه ژِن بِدارِه، هوشیار بِبو، اِشتَن پیشی بِگِرِه و آبرومَند بِبو، میهمون‌ نواز بِبو و بِشا تعلیم بِده؛

³ نِه عَرقَ هَر و زور گو، بَلکَم آروم بِبو؛ و نِه جنگی و پولدوست.

⁴ اَ بَسی اِشتَن خانواده اِداره کَردِه عُهدَه کا چاک بَرا و اِشتَن خِردَنون اِنتَه تربیت بِکَرِه که تمون اِحترامی نَه، اَیی کا اِطاعت بِکَرِن.

⁵ چوم اَگم کسی مَزونِه چِنتَه بَسی اِشتَن خانواده اِداره کَردِه عُهدَه کا بَرا، چِنتَه بَشای خِدا کلیسا کا مراقبت بِکَرِه؟

⁶ و تازه ایمان وردَش مَبو، نَبادا مغرور بِبو و اِبلیسی شیوار محکوم بِبو.

⁷ بِعَلاوَه، اَ بَسی کلیسا بِرونی مردمی دیلَه کا نی خوشنوم بِبو تا رِسوا مَبو و اِبلیسی تَلَه کا مَدَلَکِه.

⁸ اِنتَه نی شَماسِن بَسی باوَقار بِبون، دِ دیم مَبون، شَراوی گیریفتار مَبون، نادُرستَ سودی را حِرص مَژَنِن.

⁹ اَوِن بَسی ایمانی سِرّی پاکَه وِجدانی نَه غَم بَرِن.

¹⁰ و اَوِن بَسی اوّل آزمایش بِبون؛ دومله اَگم ثابت بِکَرِن که بی عِیبی نَه، بِدارَه شَماسی مَقامی کا خِدمَت بِکَرِن.

¹¹ هِنته نی، چَوون ژِنَکِن نی بَسی باوَقار بِبون، بُختون ژَن مَبون، بَلکَم هوشیار بِبون و گِردِ چییون کا وفادار بِبون.

¹² هَر کَمیله شَماسون کا بَسی ایلَه ژِن بِدارِه و اِشتَن خِردَنون و اِشتَن خانواده اِدارَه کَردِه عُهدَه کا چاک بَرا.

¹³ چوم کسونی که شَماسی مقامی کا چاک خدمت کَردَشون بِبو، ایلَه چاکَه مقامی ویگِرِن و اَ ایمانی کا که مسیح عیسی کایَه بَرکَ اِطمینانی بِه دَس بواَردین.

¹⁴ امید دارِم که اِم زودیون بام اِشتِه وَر، ولی اِمون بَه تِه را بَنیویشتیم تا،

¹⁵ اَگم چِمِن اومِه عَری آبَه، بِزونی که خِدا خانوادَه دیلَه کا، که خِدای زِنده کلیسا و ستون و حَقیقَتی پایَه یَه، چِنتَه بَسی رَفتار کَردِه.

¹⁶ راس راسی که دینداری بَرک یالَه سِرّی یَه: اَ جِسمی دیلَه کا ظاهر آبَه، خِدا روح واسطه نَه تصدیق بَه، ملائیکه اِن اَیی ویندِشونَه، قومون دیلَه کا اِعلام بَه، دنیا دیلَه کا بَیی ایمان وَردِشونه، جلالی نَه، بَردَه بَه کَفا.