اوّلین نامَه تیموتائوسیرا 2 - کتاب مقدس به زبان تالشی شمالی

گِردی را دعا بِکَرَه

¹ بَس، هَر چی کا پیشتَر، پیستِمَه که درخواستون، دعااون، شفاعتون و شُکرکَردَه اون گِردِ مردمی را بِه جا وَردَه بِبون،

² پاُتشا اون و صاحب منصبون را، تا اَمَه بِشایَم آروم و آسوده‌ زِندگی ایی بِدارَم، که هر لحاظی کا دیندار و با وَقار بِبو.

³ اِم چَمَه نجات‌دهندۀ، خِدا نَظری کا چاک و چَیی باب دیلَه،

⁴ که پیستِشَه مردم گِرد نجات پیدا بِکَرِن و حقیقتی آزونِن.

⁵ چوم فقط ایلَه خِدا اِستَه و خِدا و آدَمون میانه کا نی فقط ایلَه واسطه اِستَه، یعنی اَ اِنسان که مسیحْ عیسی یَه،

⁶ اَ که اِشتَن جانی آدوعِه نَه، گِردِ آدَمون خون بَها آدوشَه. اِم حقیقتی را مِناسِبَ وختی کا شهادتی دوعَه بَه.

⁷ چوم که اَز اِمی واسی مُعَین بیمَه تا غیر یهودیون را ایلَه تعلیم دَهنده و ایلَه رسول و ایلَه ایمانی معلّم حقیقتی کا بِبوم- حقیقتی بَواتیم و دوروع نِواجِم.

⁸ بَس چِمِن آرزو اِمَه که مِردَکِن گِردِ جِگا کا، دعا بِکَرِن و مقدّس دَسون بی خَشم و دعوا مُرافه راست آکَرِن؛

⁹ هِنتَه نی پیستِمَه که ژِنَکِن آبرومندانَه خَلا دَکَرِن، نجابت و حَیا نَه، نِه وَته گیسه اون نَه، یا طِلا و مِرواری نَه، یا گِرونَ خَلااون نَه،

¹⁰ بَلکَم چاکَه کارون نَه، هَتَه که اَ ژِنکونی شَئنی کایَه که اِدِعا بَکَردین دینداری نَه.

¹¹ ژِن بَسی سکوت بِکَرِه و کاملَ اِطاعتی نَه تعلیم بِگِرِه.

¹² از نییَرزِم که ایلَه ژِن تعلیم بِده یا ایلَه مِردی سَر تسلط بِدارِه؛ بَلکَم بَسی ساکِت بِبو.

¹³ چوم اوّل آدَم خلق بَه و دومله حَوا؛

¹⁴ و آدَم گول نییَردِشه، بَلکَم ژِن بَه که گول هَردِشه و نافرمان بَه.

¹⁵ امّا ژِن، خِردَن دنیا وَردِه نَه نجات پیدا بَکَردی، اَگم ایمان و مُحبت و مقدّس بییِه کا، نجابَتی نَه بومونِه.