اوّلین نامَه تیموتائوسیرا 1 - کتاب مقدس به زبان تالشی شمالی1 پولُسی طرفی کا، که چَمَه نجات‌دهندۀ خِدا حُکمی نه و چَمَه اُمید مسیحْ عیسی، مسیحْ عیسی رسول اِستَه؛ 2 تیموتائوسی را، چِمِن حقیقی یَه زوعَه ایمانی کا: فیض و رَحمت و صُلح و سلامتی خِدای دَده طرفی کا و چَمَه خِداوند مسیحْ عیسی کا شِمه را با. هشدار دورعَه معلمون درباره 3 هَتَه که وختی کارا بَشیم مقدونیه منطقه را بَه تِه کا خواهیشت کَردِمَه، هَنی بَه تِه کا پیستِمَه اَفِسُسی شهری کا بومونی تا بَعضیون دستور بِدَی که هِی جور بَه جورَه تعلیم مَدَن. 4 و اِشتَن داستانون و شجره‌نومه اونی را که تمون آنِبون وقف مَکَرِن، اِم چییِن عوضِ اِمکه خِدا کاری که ایمانی راه کا یَه پیش بِبَرِن، جَر و بحثی باعیث بَبی که هیچ ثمری نِدارِه. 5 چَمَه منظور اِم دستوری کا محبتَه، محبتی که پاکه دیلی کا، و چاکَه وجدان و خالصَ ایمانی کایَه. 6 بعضی اِن اِم چییون کا آگَردَه اینَه و بیخودَه گفون دومله اِشتَن راه ژون آکَردَشونَه، 7 و پیستِشونَه شریعتی معلمون بِبون، بی اِمکه بِزونِن چِه بَواتین یا چِه چی کا اِنتَه خاطِر جَمع گَف ژَنِن. 8 حِسَه اَمَه بَزنیمون که شریعت چاکَه، اَگَم کسی اَیی دُرست بِه کار بِبَرِه. 9 و بَزنیمون که شریعت، صالِحَ آدمون را نییَه بَلکَم قانون چاکِنون و نافرمونون شِنَه، بی‌دینون و گناه کارون را، کسونی را کا مقدّس نینَه و کسونی را که کُفر بَواتین؛ کسونی را که اِشتَن دَده نَنه بَکِشتین، قاتلون را، 10 زناکارون و لَواط گَرون را؛ کسونی را که بَردَه خرید و فروش بَکَردین، دوروعَه واجون و کَسونی را که دوروعَه قَسَم بَردین، و هَر چیی که دُرستَ تعلیمی ضِدَه، 11 اَ تعلیمی که طبق خِدای متِوارکی پُرجلالَ اِنجیل، بَه مِن دَسپَرده بییَه. مسیح عیسی گناه کارون نِجات دوعِه را اومَه 12 چَمَه خِداوند مسیحْ عیسی شُکر بَکَردیم که مِن قوّت دوشَه، چوم مِن وفادار زونِستِشَه و مِن اِشتَن خدمَتی را مُعَین کَردِشه. 13 با اِم که قبلا، کُفر بَواتیم، عذاب بَدایم و توهین بَکَردیم. ولی مِن رَحم بَه، چوم که بی ایمانی کا نادونی بَکَردیم، 14 و چَمَه خِداوندی فیض، اَ ایمان و محبتی نَه که مسیحْ عیسی کایَه، فَت و فَراوون چِمن سَری کا ویبَه. 15 بَبی اِم گَفی اِعتماد کَردِه و هَر طرفی کا کاملا قابِل قبولَه، که مسیحْ عیسی اومَه اِم دنیا تا گناه کارون نجات بِده، که چَوون دیلَه کا یالترین اَزیمَه. 16 ولی اِمی واسی مِن رَحم بَه تا عیسی مسیح اِشتَن صَبری که هرگز تمون آنییَب که گناه کارون دیلَه کا یالتَرین بیمَه نیشون بِدَه، تا کسونی را که اَبَدی یَه زِندگی واسی اَیی ایمان بواَردین سَرمشق بِبوم. 17 حِسَه اَ پاُتشاهِ دوران، اَ که تا اَبَد اِستَه و نییَب اَیی ویندِه، اَ ایلَه خِدا، تا اَبَد و تا اَبَد حُرمَت و جلال بِبو. آمین. 18 چِمِن بَلَه، تیموتائوس، اِم حُکمی طبق اَ نَبوّتونی که پیشتر اِشتِه درباره بییَه بَه، بَه تِن دَسپارِم تا چَوون واسطه نَه اَ چاکَه جنگی اَنجام بِدَی، 19 ایمان و چاکَه وجدانی دَچیک. چیرا که بعضی اِن چِمون رَد آکَردِه نَه چَوون ایمانی کَشتی چَکَه. 20 هیمِنائوس و اِسکندر اِم دسته کااینه، که اَوون دَسپاردِمَه شیطانی دَس تا باموجِن که کُفر مَواجِن. |
@ 2024 Korpu Company