اوّلین نامَه تَسالونیکی کلیسا را 5 - کتاب مقدس به زبان تالشی شمالی

خِداوندی روز

¹ حِسَه اِی بِرا اِن، وختون و زمانون درباره، نیازی نییَه شِمَه را چیی بینیویسِم.

² چوم که شِمَه اِشتَن چاک بَزنیرون که خِداوند عیسی آگردِستِه روز، ایلَه دِزدی شیوار که شوی را بومَی، سَر آرَستِه.

³ اَ موقع که مردم بَواتین: «صُلح و سلامتی و اَمن و اَمانَ»، دومله ایی دَفعه هَلاکت چَوون دومَنی بَگتی، هَتَه که ایلَه حامیله ژِنی زَندِه داجی بِگِرِه، و اَوِن نیمَشان دَوَزِن.

⁴ امّا اِی بِرااِن، شِمَه تاریکی کا نیرونَه، تا اَ روز ایلَه دِزدی شیوار شِمَه غافلگیر بِکَرِه.

⁵ چوم که شِمَه گِرد، نوری خِردَنِن و روزی خِردَنِنی رونَه؛ اَمَه شو و تاریکی شِن نیمونَه.

⁶ بَس بقیه شیوار اِشتَن بِه خاو مَژَنَم، بَلکَم آگا و هوشیار بِبییَم.

⁷ چوم کسونی که خِسِن، شوی را خِسِن، و کَسونی که مَست بکَرِدین، شوی را مَست بَکَردین.

⁸ امّا چوم اَمَه روزی شِنی مونه، بَسی هوشیار بِبییَم، ایمان و محبتی زِرِه دَکَرَم، و نجاتی اُمیدی ایلَه کُلاهخودی شیوار چَمَه سَری کا پِنَیَم.

⁹ چوم خِدا اَمَه غَضَبی را تعیین نِکَردِشَه، بَلکَم نِجاتی بِه دَس وَردِه را، چَمَه خِداوند عیسایِ مسیح واسطه نَه، تعیین کَردِشه.

¹⁰ اَ که چَمَه واسی مَردَه تا چِه آگا بِبییَم و چِه خاو، اَیی نَه زِندگی بِکَرَم.

¹¹ بَس یَندی تشویق بِکَرَه و ایمانی کا تقویت بِکَرَه، هَتَه که حِسَه نی بَکَردیرون.

آخِرین سفارِشِن و خِیرَه دعا

¹² حِسَه اِی بِرااِن، شِمَه کا پیستِمَه، کَسونی که شِمَه دیلَه کا زحمت کَشِن و خِداوندی کا شِمَه رهبری نَه، و شِمَه پَند و اندَرز بَداین، حُرمت اِحترام بِکَرَه،

¹³ و محبتی نَه، اَ کاری واسی که اَنجام بَداین، اَوون وِر اِحترام بِنییَه. یَندی نَه صُلح و سلامتی کا زِندگی بِکَرَه.

¹⁴ اِی بِرااِن، شِمَه کا خواهیشت بَکَردیم که تَنبلون نصیحت بِکَرَه؛ تَرسو اون تشویق بِکَرَه؛ ضَعیفون کمک بِکَرَه؛ گِردی نَه صبور بِبییَه.

¹⁵ ویرا بِبییَه، کسی بَدی، بَدی نَه جَواو مَدییَه، بَلکَم همیشه چِمی دومله بِبییَه که یَندی را و مردمی را چاکی بِکَرَه.

¹⁶ همیشه شاد بِبییَه،

¹⁷ دائِم دعا بِکَرَه،

¹⁸ هَر وضعیتی کا شُکر بِکَرَه، چوم خِدا پیستَه شِمَه را، مسیحْ عیسی کا، اِمَه.

¹⁹ خِدا روح آتشی مَدَکِشه؛

²⁰ نَبوّتون روک مَزونه.

²¹ بَلکَم گِردِ چییون آزمایش بِکَرَه؛ و اَ چیی که چاکَه، محکم دَچیکه.

²² هَر جورَه بَدی کا دوری بِکَرَه.

²³ حِسَه، خِدای صُلح و سلامتی، اِشتَن شِمَه تمام کمال تقدیس بِکَرِه، و شِمَه روح و جان و بَدَن تا چَمَه خِداوند عیسایِ مسیح اومِه موقع، بی‌عیب بومونِه.

²⁴ اَ که شِمَه دعوت بَکَردی، وفادارَه؛ اَ حتمن اِم کاری اَنجام بَدای.

²⁵ اِی بِرااِن، اَمَه را دعا بِکَرَه.

²⁶ مقدّس ماچی نَه گِردِ بِرااون را سلام آرِساوونه.

²⁷ خِداوندی ناری کا، شِمَه قَسَّم بَدایم که اِم نامه گِردِ بِرااون را بوخونَه.

²⁸ چَمَه خِداوند عیسایِ مسیح فیض شِمَه نَه بِبو. آمین.