اوّلین نامَه تَسالونیکی کلیسا را 4 - کتاب مقدس به زبان تالشی شمالی

زِندگی که خِدا راضی آکَرِه

¹ آخِرسَر بَس، اِی بِرااِن، اَمَه خِداوند عیسی کا شِمَه کا پیستِمونَه و مِنت بَکَردیمون، هَتَه که اَمَه کا شِمَه را آرَستَه که چِنتَه بَسی زِندگی بِکَرَه و خِدا راضی آکَرَه، هَتَه که کارا اَنجام بَدایرون، اِم کاری وِرتَر و وِرتَر بِکَرَه.

² چوم شِمَه بَزنیرون که عیسایِ خِداوندی واسطه نَه، چِه حُکمونی شِمَه را آدوعَمونه.

³ چوم که خِدا اِراده اِمَه یعنی شِمَه مقدّس بِبییَه: که اِشتَن بی‌عفتی کا دور غَم بَرَه؛

⁴ تا شِمَه کا هَر کَمیله بِزونَه که چِنتَه اِشتَن بَدَنی مقدّس بییِه و عزّتی کا غَم بَرِه،

⁵ نِه شهوت و هَواهَوسی کا، اَ غیریهودیونی شیوار که خِدا آنِزونون؛

⁶ تا هیچ‌کس اِم کاری کا اِشتَن بِرا حقی کا خطا یا سواستفاده مَکَرِه. چوم خِداوند گِردِ اِم کارون تقاصی ویگِرِه، هَتَه که اَمَه پیشتری شِمَه نَه واتِمونه و جِدی هُشدار دوعَمونه.

⁷ چوم خِدا اَمَه نِه ناپاکی را، بَلکَم مقدّس بییِه را دَعوت کَردَشه.

⁸ بَس، هَر کسی که اِمی رَد آکَرِه، آدَمی رَد آنِکَرِه، بَلکَم اَ خِدایی رَد آکَردَشَه که اِشتَن مقدّس روح آدَه شِمَه.

⁹ حِسَه بِرااونَه محبتی درباره شِمَه نیازی نیرونَه کسی چیی شِمَه را بینیویسِه، چوم که شِمَه اِشتَن خِدا واسطه نَه آموتَرونه که یَندی نَه خِش بِبییَه،

¹⁰ چوم که شِمَه راس راسی مقدونیه سَرتاسَری کا گِردِ برا اون نَه خِشیرونَه. ولی، اِی بِرااِن، شِمَه مِنَّت بَکَردیمون وِرتَر و وِرتَر اِم کاری بِکَرَه.

¹¹ اِم آرزو بِکَرَه که آرومَه زِندگی بِدارَه و شِمَه سَر شِمَه کاری مشغول بِبو، شِمَه دَسون نَه کار بِکَرَه، هَتَه که اَمَه شِمَه دستور دوعَمون بَه.

¹² تا کسونی پیشی کا که کلیسا بِرونی کا اینَه دُرستی نَه زندگی بِکَرَه و هیچکسی محتاج مَبییَه.

عیسای خداوندْی آگَردِستَه

¹³ ولی اِی بِرااِن، اَمَه نِپیستِمونَه اَ ایماندارونی درباره که مَردَه اینه بی خَور بِبییَه، نَبادا دییَر مردمی شیوار که اُمیدی نِدارِن، ماتم بِگِرَه.

¹⁴ چوم اَگم اَمَه باوَر دارَم که عیسی مَردَه و زِنده آبَه، بَس هِنته نی خِدا اَوونی که عیسی کا مَردَه اینه، اَیی نَه بواَردی.

¹⁵ چوم که اَمَه خِداوندی کلامی واسطه نَه اِمی شِمَه را اِعلام بَکَردیمون که اَمَه که زِنده ایمونَه و تا خِداوندی اومِه موقع باقی مَندیمونَه، کسونی کا که مَردَه ای نَه پیش نِدَلَکَم.

¹⁶ چوم که خِداوند، اِشتَن، ایلَه حُکمی نَه که بِلندآوازی نَه یَه، ملائیکه اون رئیسی سَسی نَه و خِدا شیپوری سَسی نَه، آسِمونی کا بومَی جیر. و اوّل، مَرده اِن مسیح کا، زِنده آبون.

¹⁷ دومله، اَمَه که زِنده ایمونَه، و باقی مَندَه ایمونَه، اَوون نَه خِرون دیلَه کا بَردَه بَبیمون کَفا تا خِداوندی هوا کا بِوینَم، و اِنتَه همیشه خِداوندی همراه بَبیمون.

¹⁸ بَس اِم گَفون نَه، یَندی تشویق بِکَرَه.