اوّلین نامَه تَسالونیکی کلیسا را 3 - کتاب مقدس به زبان تالشی شمالی

¹ بَس وختی که دِ نِشاستمونَه اِمی تاو بواَرَم، راضی بیمونَه که اَمَه آتِنی شهری کا تنخا بَرزِن.

² اَمَه، تیموتائوسی که چَمَه بِرا و خِدا همکار مسیح اِنجیلی کاری کایَه، ویسا آکَردِمونه شِمَه وَر تا شِمَه ایمانی کا شِمَه تقویت و تشویق بِکَرِه،

³ تا هیچ‌کس اِم سختیون واسی سُست آمَبو، چوم شِمَه اِشتَن چاک بَزنیرون که اَمَه اِمی واسی تعیین بَیمونَه.

⁴ چوم اَ موقع که شِمَه نَه بیمونَه، نارنارِه شِمَه نَه واتِمونَه که بَسی سختی بِکَشَم، و هَتَه که بَزنیرون، هِنتَه نی بَه.

⁵ اِمی واسی، چوم دِ نِشاستِمَه تاو بواَرَم، تیموتائوسی ویسا آکَردِمه تا شِمَه ایمانی کا خَوَر دار بِبوم، چوم تَرسیم که اَ وسوسه‌گَر یعنی اِبلیس، ایجوری شِمَه وسوسه بِکَرِه، و چَمَه زَحمتِن هَدَر شَه بِبو.

تیموتائوسی خَوَر که دیلگرمی بَدای

⁶ امّا حِسَه که تیموتائوس شِمَه وَری نَه آگَردِستَه چَمَه وَر و اَمَه را، شِمَه ایمان و محبتی خوشَ خَوَری وَردَشه و خَوَر دوشَه که شِمَه همیشه اَمَه چاکی نَه ویر بواَردیرون و چَمَه ویندِه را مشتاقی رونَه، هَتَه که اَمَه نی شِمَه ویندِه را مَشتاقی مونَه-

⁷ اِمی واسی، اِی بِرااِن، چَمَه گِردِ سَختیون و مصیبتون کا، شِمَه کا شِمَه ایمانی واسطه نَه تَسلی گِتِمونَه.

⁸ چوم که حِسَه زِندگی بَکَردیمون، اَگم شِمَه خِداوندی کا پابَرجا بومونه.

⁹ چوم اِم هَمَه شادی که شِمَه واسی چَمَه خِدا حضوری کا چَمَه نصیب بَه، چِنتَه بَشایمون خِدا شُکر بِکَرَم؟

¹⁰ هَتَه که اَمَه شَواَندَه روز جان و دیلی نَه دعا بَکَردیمون تا رو دَر رو شِمَه بِوینَم و شِمَه ایمانی کا هَر کَم و کسری بِبو، بَرطرف بِکَرَم.

¹¹ حِسَه خِدا، چَمَه دَده اِشتَن، و چَمَه خِداوند عیسی، چَمَه راه، شِمَه طرفی را کَشوندَشَه.

¹² و هَتَه که چَمَه محبت، شِمَه را وِر آبو، خِداوند شِمَه محبتی یَندی نَه و گِردِ مردمی را وِر آکَرِه.

¹³ و شِمَه دیلون پابَرجا بِکَرِه، تا چَمَه خِداوند عیسی اومِه موقع اِشتَن گِردِ اِشتَن مقدّسون نَه، خِدا و چَمَه آسمونی یَه دَده پیشی کا، بی عیب و مقدّس بِبییَه.