اوّلین نامَه تَسالونیکی کلیسا را 2 - کتاب مقدس به زبان تالشی شمالیپولُسی خدمت تَسالونیکی کلیسا را 1 اِی بِرااِن، شِمَه اِشتَن بَزنیرون که چَمَه اومِه شِمَه وَر بیخودی نِبَه. 2 بَلکَم هَر چَن پیشتَری، فیلیپی شهری کا عذاب کَشِمونه و اَمَه نَه بَدی کَردِشونه جوری که خجالت آور بَه، هَتَه که بَزنیرون، امّا اَمَه، چَمَه خِدا کمکی نَه جرئَت کَردِمونه تا خِدا اِنجیلی وِرَه مُخالفون دیلَه کا شِمَه را اِعلام بِکَرَم. 3 چوم که چَمَه تشویق، خطا یا ناپاکی یا گول ژَندِه واسی نییَه، 4 بَلکَم هَتَه که خِدا اَمَه تصدیق کَردِشه تا اِنجیلی کاری اَنجام بِدییَم، بَس چَمَه گف ژَندِه، آدَمون راضی آکَردِه واسی نییَه، بَلکَم خِدا راضی آکَردِه واسی یَه، که چَمَه دیلون آزمایش بَکَردی. 5 چوم که اَمَه هرگز دِجِگا بوگویی کَردَه نیمونه، هَتَه که بَزنیرون، خِدا شاهِدَه- چَمَه گفِن بهونه ای نِبَه طمع کردِه را. 6 اَمَه چِمی دومله نیمونه که ایی نفر اَمَه بِبَره کَفا، چِه شِمَه کا و چِه خَلکی کا. هَر چَن که اَمَه مسیح رسولون مقامی کا اِم حَقی داریمون که شِمَه کا بیپییَم، 7 امّا اَمَه شِمَه نَه ملایم رفتار کَردِمونه، ایلَه نَنه ایی شیوار که اِشتَن خِردَنی تر و خشک بَکَردی. 8 اَمَه هَدَه شِمَه نَه خِش بیمونه که اِشتیاقی نَه حاضیر بیمونه نِه فقط خِدا اِنجیلی پَیغومی بِه شِمَه آرِساوونم، بَلکَم شِمَه راه کا چَمَه جانی کا نی دَوییَرَم، چوم که شِمَه اَمَه را وِر عزیز بیرونَه. 9 چوم شِمَه اِی بِرااِن، چَمَه زحمت و کار کَردِه شِمَه ویری کایَه: که شَواَندَه روز کار بَکَردیمون تا وختی که خِدا اِنجیلی شِمَه را اِعلام بَکَردیمون، هیچکسی سَربار مَبییَم. 10 شِمَه شاهدیرونه و خِدا نی شاهِدَه که اَمَه شِمَه ایماندارون نَه، چِنتَه مقدّس و صالح و بی‌عیب رفتار کَردِمونه. 11 چوم شِمَه بَزنیرون که چِنتَه، ایلَه دَده ایی شیوار که اِشتَن خِردَنون نَه رفتار بَکَردی، 12 اَمَه هَر کمیله شِمَه، ایلَه ایلَه تشویق کَردِمونه و تَسلی دومونه و سفارش کَردِمونه تا اَتَه که خِدا شئنی کایَه زِندگی بِکَرَه، که شِمَه دعوت بَکَردی اِشتنِش پاُتشایی و جلالی را. 13 اَمَه همیشه اِمی واسی خِدا شُکور بَکَردیمون که اَ موقعی که شِمَه خِدا کلامی قبول کَردِرونه، اِم کلام که اَمَه کا دَرَسِرونه، اَیی نِه اِنسانی کلامی شیوار، بَلکَم خِدا کلامی شیوار قبول کَردِرونه، جوری که حقیقت نی اِستَه، که شِمَه ایماندارون دیلَه کا کار بَکَردی. 14 چوم اِی بِرااِن، شِمَه خِدا کلیسااونی کا سَرمشق گِتِرونه که یهودیَه ولایتی کا مسیحْ عیسی کا اِستینه. چوم که شِمَه نی شِمَه هموطنون کا، هَ اَذیت آزارون ویندِرونه که اَوِن یهودیون کا ویندِشونَه، 15 اَوِن که عیسایِ خِداوند و پِیغمبَرون کِشتِشونه و اَمَه نی بِرون بَرکَردِشونه. اَوِن خِدا راضی آنِکَرِن و گِردِ مَردمی نَه دِشمِنی بَکَردین، 16 و نییَرزِن اَمَه غیر یهودیون نَه گف بِژَنَم تا نجات پیدا بِکَرِن- اِنتَه همیشه اِشتَن گناه اون پیمونه لِبآلِب پُور بَکَردین. امّا آخِرسَر خِدا غَضب، چَوون سَر بومَی. 17 ولی اِی بِرااِن، چوم روکَتِه زمانی شِمَه کا دور بیمونَه، البته جسمَن و نِه قلبَن، وِرَه اِشتیاقی نَه تَقَّلا کَردِمونَه تا شِمَه رو دَر رو بِوینَم. 18 چوم که اَمَه پیستِمونه بایَم شِمَه وَر- از پولُس، چِندی کَرَه پیستِمَه بام- ولی شیطان نییَشتِشَه. 19 چوم چَمَه اُمید و شادی و اِفتخاری تاج، چَمَه خِداوند عیسی حضوری کا وختی که با چَه؟ مَگم شِمَه نیرونَه؟ 20 چوم که شِمَه، چَمَه جلال و شادی ایرونَه. |
@ 2024 Korpu Company