پطروسی اوّلین نامَه 5 - کتاب مقدس به زبان تالشی شمالی

خدا رَمَه شونَه تی بِکَرَه

¹ اَز که اِشتَن ایلَه مشایخون کا ایمَه و مسیح رَنجون شاهد بیمَه و اَ جلالی کا که آشکار بَبی شَریکیمَه، اَ مشایخی که شِمَه دیلَه کا اینَه سفارش بَکَردیم:

² رَمَه ای که خِدا شِمَه دَس دَسپاردَشَه شوونَه تی و نظارت بِکَرَه، نِه زور زورکی، بَلکَم میل و رِغبتی نَه، هَتَه که خِدا پیستِشَه؛ و نِه شرم آوَرَه سودی را بَلکَم شوقی نَه.

³ نِه اِمکه اَ کسونی را که شِمَه دَس دَسپارده بَیینَه آقایی بِکَرَه، بَلکَم اَ رَمه را نِمونه بِبییَه،

⁴ و اَ وختی که شوونَه اون رئیس ظهور بِکَرِه، اَ تاج جلالی که از بِین نِشو، بِه دَس بواَردیرون.

⁵ هِنتَه شِمَه نی اِی جَوونِن، مشایخون کا اِطاعت بِکَرَه. شِمَه گِرد، شِمَه رفتاری کا یَندی نَه فروتنی دَکَرَه، چوم، «خِدا مغرورون پیشی کا بَمَندی، امّا فروتنون فیض بَدای.»

⁶ بَس اِشتَن خِدا نیرومندَه دَسی جیری کا فروتن بِکَرَه تا مناسِبَ وختی کا شِمَه سَربِلَند بِکَرِه.

⁷ شِمَه نِگرانیون گِردی، دَسپارَه اَیی، چوم اَ شِمَه فیکری کایَه.

⁸ ویرا بِبیَه، شِمَه هَواس جمع بِبو، شِمه دِشمِن اِبلیس ایلَه شیری شیوار غُرِش بَکَردی و هَر طرفی را کارا بَگردِستی، ایی نفری بِتلَفِه که اَیی ویبَرِه.

⁹ ایمانی کا پابَرجا بِبییَه و چَیی پیشی کا بومونَه، چوم بَزنیرون که شِمَه بِرااِن دنیا کا هِم عذابون نَه دیمادیس بَبین.

¹⁰ و دومله روکَتِه رنج و عذاب کَشِه پَش، خِدای پُور فیض،که شِمَه مسیح کا دَعوت کَردشَه، تا چَیی اَبَدی یَه جلالی کا شریک بِبییَه، شِمَه از نو بینا بِکَردی و پایدار و پُور قدرت و پابَرجا بَکَردی.

¹¹ سلطنت تا اَبَد و تا اَبَد چَیی شِن بِبو. آمین.

آخِرین سَلامِن

¹² سیلاسی واسطه نَه که اَیی ایلَه وفادارَه بِرایی بَزنیم، شِمَه را مُختصر نیویشتِمَه تا شِمَه سفارش بِکَرِم و شِمَه را اِعلام بِکَرِم که اِمَه خِدا اَ حقیقی یَه فیض، اَیی کا پابَرجا بومونَه.

¹³ خالایی که بابِلی کایَه، اَ که شِمَه شیوار اِنتخاب بییَه، شِمَه را سلام ویسا آکَرِه و هِنتَه نی چِمِن زوعَه مرقُس.

¹⁴ یَندی ایلَه ماچی نَه که خِش بییِه کایَه، سلُام بوآجه. شِمَه گِردی را که مسیح کا ایرونَه، صُلح و سلامتی با.