پطروسی اوّلین نامَه 3 - کتاب مقدس به زبان تالشی شمالیژِنَکِن و مِردَکِن 1 هِنتَه نی، شِمَه اِی ژِنَکِن، شِمَه مِردَکون کا اِطاعت بِکَرَه تا حتی اَگم بعضی اِن خِدا کلامی کا اِطاعت نِکَرِن، بی اِمکه شِمَه اَوون نَه چیی بوآجَه، شِمَه رفتاری واسی ایمان بواَرِن، 2 وختی که اَوِن شِمَه پاک و محترمانَه رفتاری بَویندین. 3 شِمَه خوشگیلی ظاهری مَبو، وَتَه بییَه گیسَه شیوار و طِلا دَکَردِه یا گِرونَه خَلااون نَه، 4 بَلکَم بِدارَه شِمَه خوشگیلی شِمَه اَ درونی یَه آدَمی بِبو که شِمَه قلبی دیلَه کایَه و چِمی نَه ویندَه نییَب، و ایلَه آروم و ملایمَ روح نَه خوشیگل آبییَه که اِنتَه رَه خوشگیلی ایی خِدا نظری کا وِر با اِرزِشَه. 5 چوم که قدیمی یَه مقدّسَ ژِنَکِن که خِدا اُمید دارین، اِشتَن اِنتَه خوشگیل آکَرین. اَوِن اِشتَن مِردَکون کا فرمان بَبَردین، 6 هَتَه که سارا، اِبراهیمی مطیع بَه و اَیی اِشتَن آقا دَخونی. و اَگَم شِمَه نی چاکی بِکَرَه و اَ چیی کا که تَرس دارِه، مَتَرسَه، سارا خِردَنِن بَبیرون. 7 هَتَه نی، شِمَه اِی مِردَکِن، شِمَه ژِنَکون نَه جوری زندگی بِکَرَه که اَوِن درک بِکَرِن و آزونِن و چوم شِمَه کا ظریفتَری نَه، چَوون اِحترامی غَم بَرَه، چیرا که شِمَه شیوار فیض بَخشَه زِندگی هدیه وارثی نَه، تا مَبو که شِمَه دعااِن بی جَواو بومونِن. عذاب کَشِه صالح بییِه واسی 8 آخِرسَر، شِمَه گِرد، یَک فیکر و یَکدیل و بِرا دوست و دیلَسوج و فروتن بِبییَه. 9 بَدی، بَدی نَه و فَشی، فَشی نَه جَواو مَدییَه، بَلکَم چَیی عوض بَرَکت طلب بِکَرَه، چوم اِمی واسی دَعوت بَییرونَه تا بَرکت بِه دَس بواَرَه. 10 چوم، «هَر کسی که پیستِشَه زِندگی نَه خِش بِبو و چاکه روزون بِوینِه، بَسی اِشتَن زَوونی بَدی کا غَم بَرِه و اِشتَن لِوون گول ژَندِه کا دَوِندِه. 11 بَسی بَدی کا دوری بِکَرِه و چاکی بِکَرِه، صُلح و سلامتی دومله بِبو و چَیی پیرو بِبو. 12 چوم که خِداوندی چِم صالِحون کایَه و چَیی گوش چَوون دعا اون دَرَسِه، امّا خِداوند بَدکارون ضِدَه.» 13 حِسَه اَگم چاکَه چیی را غیرت دارَه، کییَه که شِمَه ضَرر بِژَنه؟ 14 امّا حتی اَگم صالِح بییِه را عذاب بِکَشَه، برَکت بَگَتیرون. «اَ چیی کا که اَوِن تَرسِن، شِمَه مَترسَه و نیگران مَبییَه.» 15 بَلکَم شِمَه دیلی کا مَسیح خِداوندی مقدّس بِزونَه و اَیی اِحترام بِنییَه و هَمیشه حاضر بِبییَه تا هَر کی اَ اُمیدی دلیلی دَفَرسِه که شِمَه دیلَه کایَه، چَیی جَواوی بِدییَه، البته نرمی و اِحترامی نَه. 16 شِمَه وجدانی پاک غَم بَرَه، تا کسونی که شِمَه اِفتِرا ژَنِن، کسونی که شِمَه چاکَه رفتاری مسیح کا بَد بَواتین، شَرمَنده بِبون. 17 چوم اَگم خِدا پیستَه بِبو، چاکتَرَه که چاکَه کارون را عذاب بِکَشَه تا بَدَه کارون واسی. 18 چوم که مَسیح نی ایی کَرَه گناه اون را عذاب کَشِشَه، یعنی اَ صالِح، کسونی را که صالِح نینَه، تا اَمَه بواَرِه خِدا وَر. اَ جِسمی کا کِشتَه بَه، امّا روح کا، زِنده آبَه، 19 و روح کا شَه زیندانی یَه اَرواحون وَر و اَوون خَوَردار کَردِشَه، 20 چوم اَ اَرواحی که قدیمَه اَیامی کا نافرمونی کَردَشون بَه، اَ موقع که نوح دورانی کا، کشتی کارا وَج آبی، خِدا صبری نَه منتظر بَه. اَ کَشتی دیلَه کا فقط چَن گِله آدَم، یعنی هَشت نفر بینَه، که آوی واسطه نَه نِجات پیدا کَردِشونَه. 21 و اَ آو اَ غُسل تعمیدی نِمونه یَه که حِسَه شِمَه نجات بَدای، ایلَه تعمیدی که تَنی کثیفی را نییَه، بَلکَم ایلَه پاک وجدانی آرزویَه که پیستِشَه خِدا بِوینِه. اِم تعمید عیسایِ مَسیح زِندَه آبییِه واسطه نَه شِمَه نجات بَدای. 22 هَ عیسایِ مسیح که شَه آسِمون و حِسَه خِدا راستَ دَسی کایَه و ملائیکَه اِن و قدرتِن و قوّتِن چَیی مطیع بَیینَه. |
@ 2024 Korpu Company