یوحنا اوّلین نامَه 5 - کتاب مقدس به زبان تالشی شمالیدنیا اَفجور بییِه 1 هَر کسی که ایمان هِستِشه عیسی هَ مسیحِ موعود اِستَه، خدا کا دنیا اومَه؛ هَر کسی که دَده نَه خِشَه، کسی نَه که اَیی کا دنیا اومَه نَه نی خِشَه. 2 اِمی کا بَزونیمون خِدا خِردَنون نَه خِشیمونه که، خِدا نَه خِشیمونه و چَیی اَحکامی کا اِطاعت بَکَردیمون. 3 چوم خِدا نَه خِش بییِه اِمَه که چَیی اَحکامی عَمَل بِکَرَم. و چَیی اَحکام سَنگین نییَه. 4 چوم هَر کسی که خِدا کا دنیا اومَه، دنیا اَفجور بَبی. چَمَه ایمان، اَ پیروزی اِستَه که دنیا شِکست دوعَشَه. 5 کی بَشای دنیا اَفجور بِبو؟ اَ کسی غیراز که ایمان هِستِشه عیسی خِدا زوعَه یَه؟ 6 اَ هَ کسی یَه که آو و خونی نَه اومَه، یعنی عیسایِ مسیح. نِه فقط آوی نَه، بَلکَم آو و خونی نَه؛ و خِدا روح اِستَه که شهادتی بَدای، چوم خِدا روح، حَقیقتَه. 7 چوم سِه گِله اِستینه که شهادتی بَداین: 8 خِدا روح، آو و خون؛ و اِم سِه گِله یَندی نَه موافِقینه. 9 اَگم اَمَه آدَمی شهادتی قبول بَکَردیمون، خِدا شهادتی وِر یالتَرَه، چوم که اِم شهادتی اِستَه که خِدا درباره اِشتَن زوعَه دوعَشَه. 10 هَر کسی که خِدا زوعَه ایمان هِستِشه، اِم شهادتی اِشتَن دیلَه کا هِستِشه. امّا اَ کسی که خِدا شهادتی باوَر نِکَرِه، اَئی دروعَه واج حِساب بَکَردی، چوم شهادتی که خِدا اِشتَن زوعَه درباره دوعَشَه، قبول کَردَه نیشه. 11 اَ شهادتی اِمَه که خِدا بَمون اَبَدی یَه زندگی بَخشِستَشه، و اِم زندگی چَیی زوعَه کایَه. 12 اَ کسی که زوعَه هِستِشه، زندگی هِستِشه و اَ کسی که خِدا زوعَه نیشه زندگی نیشه. خاتیمَه 13 از اِم چیون شِمَه را نیویشتِمه که خِدا زوعَه نومی ایمان هِستِرونه، تا بِزونه که اَبَدی یَه زندگی هِستِرونه. 14 اِم هَ اِطمینانی اِستَه که چَیی حضوری کا اِستمونه، اَگم اَمَه طبق چَیی اِراده چیی بِپییَم، اَ، چَمَه سَسی دَرَسه. 15 و اَگم بَزنیمون که هَر چیی که اَیی کا بِپییَم چَمَه سَسی دَرَسِه، بَس مطمئِنیمونه اَ چیی که اَیی کا پیستِمونه، ویگِتَمونه. 16 اَگم ایی نفر بِوینه چَیی برا گناهی بَکَردی که مرگی را ختم نییَب، دعا بِکَرَه و خِدا بَیی زندگی بَبَخشِستی. اِمی کسی درباره بَواتیم که چَیی گناه مَرگی را ختم نییَب. گناهی اِستَه که مَرگی را ختم بَبی. از اِنتَه رَه گناهی درباره نِواجِم که بَسی دعا بِکَرَه. 17 گِردِ نادرستَه کارِن گناه اینه، ولی گناهی نی اِستَه که مَرگی را ختم نییَب. 18 اَمَه بَزونیمون که هَر کسی که خِدا کا دنیا اومَه، گناه اِدامَه نِدَه، بَلکَم عیسی که ’خِدا کا دنیا اومَه‘ اَئی حفظ بَکَردی و اَ شَریری دَس بَیی آنِرَستِه. 19 اَمَه بَزنیمون که خِدا کا ایمونه و گِردِه دنیا اَ شَریری قدرتی جیری کایَه. 20 هِنته نی بَزنیمون که خدا زوعَه اومَه و بَمون فهم آدوعَشه تا اَیی که حقیقتَه آزونَم، و اَمَه اَیی کا ایمونه که حقیقتَه، یعنی چَیی زوعَه، عیسی مسیح کا. اَ، خِدای حقیقی و اَبَدی یَه زندگی اِستَه. 21 اِی روکَه خِردَنِن، بُتون کا اِشتَن دور غَم بَرَه. |
@ 2024 Korpu Company