یوحنا اوّلین نامَه 4 - کتاب مقدس به زبان تالشی شمالیروح اون آزمایش بِکَرَه 1 اِی عَزیزِن، هَر روحی باوَر مَکَرَه، بَلکَم روحون آزمایش بِکَرَه که خِدا کا اینه یا نِه. چوم وِر دروعَه پیغمبرونی دنیا کا اِستینه. 2 خِدا روح، اِنتَه آزونَم: هَر روحی که اِقرار بِکَرِه عیسی مسیح آدَمی جِسمی دیلَه کا اومَه، خِدا کا یَه. 3 و هَر روحی که عیسی اقِرار نِکَرِه، خِدا کا نییَه، اِم هَ روحِ ’ضدّمسیح‘ اِستَه که دَرَسَرونه بومَی و حِسَه نی دنیا دیلَه کا یَه. 4 اِی روکَه خِردَنِن، شِمَه خِدا کا ایرونه و اَوون اَفجور بَیرونه، چوم اَیی که شِمَه دیلَه کا یَه، اَیی کا که دنیا کا یَه، یالتَرَه. 5 اَوِن دنیایی اینه و اِمی واسی هَر چیی که بَواتین دنیایی یَه و دنیا مردم چَوون گفی گوش بَداین. 6 اَمَه خِدا کا ایمونه. کسی که خِدا آزونِه، چَمَه گفون گوش بَدای؛ اَ کسی که خِدا کا نییَه، چَمَه گفون گوش نیمَدای. اَمَه، حقیقتی روح و دوروع روح اِنتَه آزونَم. خِدا محبتَه 7 اِی عزیزِن، یَندی محبت بِکَرَم، چوم محبت خِدا کا یَه و هَر کسی که محبت بَکَردی، خدا کا دنیا اومَه و خِدا آزونِه. 8 اَ کسی که محبت نِکَرِه، خِدا آزونِستَه نیشَه، چوم خِدا محبتَه. 9 خِدا محبت اِنتَه چَمَه دیلَه کا ظاهر آبَه که خِدا اِشتَن ایلَه زوعَه ویسا آکَردِشه دنیا دیلَه تا چَیی واسطه نَه زندگی بِدارَم. 10 محبت اِمَه، نِه اِم که اَمَه خِدا محبت کَردَمونه، بَلکَم اَ اَمَه محبت کَردَشه و اِشتَن زوعَه ویسا آکَردِشه تا چَمَه گناه اون کفّارَه بِبو. 11 اِی عَزیزِن، اَگم خِدا اَمَه اِنتَه محبت کَردِشه، اَمَه نی بَسی یَندی محبت بِکَرَم. 12 هیچ کس هیچ وخت خِدا ویندَه نیشه؛ امّا اَگم اَمَه یَندی نه خِش بِبییَم، خِدا چَمَه دیلَه کا بَمَندی و چَیی محبت چَمَه دیلَه کا کامل بَبی. 13 اِمی کا بَزنیمون که چَیی دیلَه کا بَمَندیمون و اَ چَمَه دیلَه کا، چوم که اِشتَن روح کا بَمون آدوعَشه. 14 و اَمَه ویندَمونه و شهادتی بَدایمون که دَده، اِشتَن زوعَه ویسا آکَردَشَه تا دنیا نجات دَهنده بِبو. 15 اَ کسی که اِقرار بَکَردی عیسی خِدا زوعَه یَه، خِدا چَیی دیلَه کا بَمَندی و اَ خِدا دیلَه کا. 16 بَس اَمَه اَ محبتی که خِدا بَمون هِستِشه آزونِستَمونه و اَیی باور دارَم. خِدا محبتَه و کسی که محبتی دیلَه کا بَمَندی، خِدا دیلَه کا بَمَندی و خِدا چَیی دیلَه کا. 17 اِنتَه محبت چَمَه دیلَه کا کامِل آبَه تا داوری یَه روزی کا مطمئن بِبییَم. چوم اَمَه اِم دنیا کا هَتَه ایمونه که اَ اِستَه. 18 محبتْی دیلَه کا ترس نییَه، بَلکَم کاملَه محبت، ترسی بِرون بَرکَرِه؛ چوم که ترس، تَنبیه کا بومَی و کسی که تَرسِه، محبتی دیلَه کا کامِل بَه نییَه. 19 اَمَه محبت بَکَردیمون چوم اوّل اَ، بَمون محبت کَردِشه. 20 اَگم کسی بوآجِه که خِدا نَه خِشَه امّا اِشتَن بِرا کا بیزار بِبو، اَ آدَم دورعَه واجَه. چوم کسی که اِشتَن بِرایی نَه که بَویندی خِش نییَه، نیمَشای خِدایی نَه که ویندَه نیشَه، خِش بِبو. 21 اَمَه اِم حُکمی اَیی کا ویگِتَمونه که هَر کسی که خِدا نَه خِشه، بَسی اِشتَن بِرا نَه نی خِش بِبو. |
@ 2024 Korpu Company