یوحنا اوّلین نامَه 3 - کتاب مقدس به زبان تالشی شمالی1 دَیِسه دَده چِندی اَمَه محبت کَردَشه که اَمَه نَه خِدا خِردَنون بوآجِن! و اِنتَه نی اِستیمونه! اِمی واسی یَه که دنیا اَمَه آنِزونِه، چوم که اَئی آنِزونیشه. 2 اِی عَزیزِن، حِسَه اَمَه خِدا خِردَنیمونه، و اَ چیی که قَرارَه بِبَم حَلا آشکار آبَه نییَه. امّا بَزنیمون اَ موقع که اَ ظهور بِکَرِه، چَیی شیوار بَبیمون، چوم اَیی هَتَه که اِستَه بَویندیمون. 3 هَر کسی که اَیی، اِنتَه رَه امیدی اِستِشَه، اِشتَن پاک بَکَردی، هَتَه که اَ پاک اِستَه. 4 هَر کسی که گناه دیلَه کا زندگی بَکَردی، شریعتی ضِد عَمَل بَکَردی؛ گناه، شریعتی قانونی چاکِندِه اِستَه. 5 شِمَه بَزنیرون که اَ ظهور کَردِشه تا گناه اون از بِین بِبَرِه. چَیی دیلَه کا هیچ گناهی دَری نییَه. 6 اَ کسی که چَیی دیلَه کا بَمَندی گناه اِدامه نِدَه. کسی که گناه اِدامه بَدای، اَئی نِه ویندَشه و نِه آزونِستَشه. 7 اِی روکَه خِردَنِن، مَرزَه کسی شِمَه گمراه بِکَرِه. هَر کسی که صالِح آدَمی شیوار عَمَل بِکَرِه، صالح اِستَه، هَتَه که اَ، صالح اِستَه. 8 اَ کسی که گناه دیلَه کا زندگی بَکَردی اِبلیسی کا یَه، چوم اِبلیس هَ صِفته نَه گناهکار بَه. اِمی واسی خدا زوعَه ظهور کَردِشه تا اِبلیسی کارون باطل آکَرِه. 9 اَ کسی که خِدا کا دنیا اومَه گناه دیلَه کا زندگی نِکَرِه، چوم خِدا ذات چَیی دیلَه کا بَمَندی؛ اَ آدَم نیمَشا گناه کَردِه اِدامه بِدَه، چوم که اَ آدَم خِدا کا دنیا اومَه. 10 خِدا خِردَنِن و اِبلیسی خِردَنِن اِنتَه معلوم بَبین: هَر کسی اَ چیی که درست اِستَه اَنجام مَدَه، خِدا کا نییَه و هِنته نی اَ کسی که اِشتَن بِرا نَه خِش نییَه، خِدا کا نییَه. یَندی نَه خِش بِبییَه 11 اِم هَ پیغومی یَه که صِفته نَه دَرَسِرونه، که بَسی یَندی نَه خِش بِبییَم. 12 اَمَه نَبی قائنی شیوار بِبییَم هَ کسی که اَ شَریری شِن بَه و اِشتَن بِرا کِشتِشه. و چیرا اَئی کِشتِشه؟ چوم اِشتَنِش اَعمال بَد بَه و چَیی بِرا اَعمال دُرست بَه. 13 اِی بِرا اِن، تعجب مَکَرَه اِمی واسی که دنیا شِمَه کا بیزارَه. 14 اَمَه بَزنیمون که مَرگی کا رَد آبَییمونه و آرَستَییمونه بِه زندگی، چوم بِرا اون نَه خِشیمونه. هَر کسی که محبت نِکَرِه، مرگی دیلَه کا بَمَندی. 15 هَر کسی که اِشتَن بِرا کا بیزارَه، قاتلَه و شِمَه بَزنیرون که هیچ قاتلی دیلَه کا اَبَدی یَه زندگی دَری نییَه. 16 محبتی اوآنه یاد گِتِمونه که اَ، اِشتَن جانی چَمَه راه کا فیدا کَردِشه، و اَمَه نی بَسی چَمَه جانی چَمَه بِرا اون راه کا فیدا بِکَرَم. 17 امّا اَگم ایی نفر دنیا مال و مَنالی بِداره و بِوینَه چَیی بِرا محتاجَه، با اِم حال اِشتَن دیلی بَری چَیی دیمی کا دَوَندِه، چِنتَه خِدا محبت اِنتَه رَه آدَمی دیلَه کا بَمَندی؟ 18 اِی روکَه خِردَنِن، بایَه محبت بِکَرَم، نِه فقط زَوونی نَه و گَف ژَندِه کا، بَلکَم عَمَل و حقیقتی کا! 19 اِمی کا بَزنیمون که حقیقتی کا اِستیمونه، و بَشایمون چَمَه دیلی خِدا پیشی کا مطمئن بَکَرَم؛ 20 چوم هَر موقع که چَمَه دیل اَمَه محکوم بِکَرِه، خِدا چَمَه دیلون کا یالتَرَه و گِردِ چییون بَزنی. 21 اِی عزیزِن، اَگم چَمَه دیل، اَمَه محکوم مَکَرِه، خِدا پیشی کا مُطمئنیمونه؛ 22 و هَر چی که اَیی کا بِپییَم، ویگِرَم، چوم چَیی اَحکامی عَمَل بَکَردیمون و هَر چیی که اَیی خوشحال بَکَردی، اَنجام بَدایمون. 23 و چَیی حُکم اِمَه که چَیی زوعَه عیسای مسیح نومی ایمان بواَرَم و یَندی محبت بِکَرَم، هَتَه که بَمون دستور دوعَشَه. 24 هَر کسی که چَیی اَحکامی عَمَل بَکَردی، خِدا دیلَه کا بَمَندی و خِدا نی چَیی دیلَه کا. اِمی کا بَزنیمون اَ چَمَه دیلَه کا بَمَندی، اَ روحی واسطه نَه که بَمون بَخشستَشه. |
@ 2024 Korpu Company