یوحنا اوّلین نامَه 2 - کتاب مقدس به زبان تالشی شمالی

مسیح چَمَه مُدافع

¹ اِی چِمِن روکَه خِردَنِن، اِم چییون شِمَه را بَنیوشتیم تا گناه مَکَرَه. امّا اَگم کسی گناه کَردِشه، دَده وَری کا ایلَه مُدافع اِستِمونه، یعنی عیسایِ مسیحِ صالِح.

² عیسی چَمَه گناه اون را کَفارَه یَه، نِه فقط چَمَه گناه اون را، بَلکَم گِردِ دنیا گناه اون را.

³ اِمی کا بَزنیمون اَئی آزونَم اَگم چَیی اَحکامون اَنجام بِدییَم.

⁴ اَ کسی که بَواتی اَئی آزونِه، امّا چَیی اَحکامون اَنجام نِدَه، دورعَه واجَه و حقیقت چَیی دیلَه کا نییَه.

⁵ امّا اَ کسی که چَیی کلامی اَنجام بَدای، حقیقتن که خِدا محبت اَیی کا کاملَه. اِمی کا بَزنیمون اَیی کا اِستیمونه که:

⁶ اَ کسی که بَواتی اَیی کا بَمَندی، بَسی هَتَه زندگی بِکَرِه که عیسی زندگی بَکَردی.

⁷ اِی عَزیزِن، از، تازه حُکمی شِمَه را نِنیویسِم، بَلکَم هَ قدیمی یَه حُکمی بَنیویشتیم که صِفته نَه رون اِستبَه. اِم قدیمی یَه حُکم، هَ پیغومی یَه که دَرَسِرونه.

⁸ با اِم حال، ایلَه تازه حُکم اِستَه که شِمَه را بَنیویشتیم که چَیی حقیقت، اَیی کا و شِمَه کا آشکارَه، چوم تاریکی دَوییَرِه و حقیقی یَه نور حِسَه نی دَمَنده دَتاویستِه.

⁹ اَ کسی که بَواتی نوری دیلَه کا یَه امّا اِشتَن بِرا کا بیزارَه، حَلا تاریکی کا مَندَه.

¹⁰ اَ کسی که اِشتَن بِرا نَه خِشَه، نوری دیلَه کا مَندَه و چَیی دیلَه کا هیچی نییَه که لغزشی باعیث بِبو.

¹¹ امّا اَ کسی که اِشتَن بِرا کا بیزارَه، تاریکی کا مَندَه و تاریکی کا قدم ژَنِه، اَ نیمَزنِه کارا کییا بَشی، چوم تاریکی چَیی چِمون کور کَردَشه.

¹² اِی روکَه خِردَنِن، شِمَه را بَنیویشتیم، چوم شِمَه گناه اِن چَیی نومی واسی بَخشِسته بَیینه.

¹³ اِی دَده اِن، شِمَه را بَنیویشتیم، چوم اَ کسی که صِفته نَه اِستَه، آزونَه. اِی جَوونِن، شِمَه را بنیویشتیم، چوم اَ شَریری اَفجور بَییرونه. اِی خِردَنِن، شِمَه را بَنیویشتیم، چوم دَده آزونَه.

¹⁴ اِی دَده اِن، شِمَه را بَنیویشتیم، چوم اَ کسی که صِفته نَه اِستَه، آزونَه. اِی جَوونِن، شِمَه را بَنیویشتیم، چوم قوی ایرونه و خِدا کلام شِمَه کا مَندَه، و شِمَه، اَ شریری اَفجور بَییرونه.

دنیا نَه خِش مَبییَه

¹⁵ دنیا نَه و اَ چیونی نَه که چَیی دیلَه کایَه، خِش مَبییَه. اَگم کسی دنیا نَه خِش بِبو، دَده محبت چَیی دیلَه کا نییَه.

¹⁶ چوم هَر چیی که دنیا دیلَه کایَه، یعنی جِسمی هوا هَوَسِن، چِمی هَوا هَوَسِن و زندگی غُرور، دَده طرفی کا نییَه بَلکَم دنیا طرفی کا یَه.

¹⁷ دنیا و چَیی هوا هَوَسِن دَوییَرِن، امّا اَ کسی که خِدا اِراده اَنجام بَدای، تا اَبَد باقی بَمَندی.

هَشدار دوعه ’ضدّمسیح‘ درباره

¹⁸ خِردَنن، اِم آخِرین ساعتَه و هَتَه که دَرَسَرونه ’ضدّمسیح‘ بومَی، حِسَه نی وِرَه ضِدّ مسیحِن اومَینه، و اِمی واسی بَزنیمون که آخِرین ساعتَه.

¹⁹ اَوِن چَمَه دیلَه کا شیینه بِرون، امّا اَمَه کا نِبینَه؛ چوم اَگم اَمَه کا بِبین، اَمَه نَه بَمَندین. ولی چَوون شییِه نیشون دوشَه که اَوِن هیچ کمیله اَمَه کا نِبینَه.

²⁰ امّا شِمَه، اَ قدوسی طریقی نَه مَسح بَییرونه و گِردِ شِمَه تَمون حقیقتی بَزنیرون.

²¹ از اِمون شِمَه را بَنیویشتیم، نِه اِمی واسی که حقیقتی نیمَزنه، بَلکَم اِمی واسی که اَیی بَزنیرون، و اِمی واسی که هیچ دروعی، حقیقتی دیلَه کا دَری نییَه.

²² دروعَه واج کییَه، اَ کسی غِیراز که اِنکار بَکَردی عیسی، اَ مسیح موعودَه؟ اِنتَه رَه کسی هَ ’ضِدّمسیح‘ اِستَه که هَم دَده و هَم زوعَه اِنکار بَکَردی.

²³ هَر کسی که زوعَه اِنکار بِکَرِه، دَده نی نیشه و هَر کسی که زوعَه اِقرار بِکَرِه، دَده نی هِستِشَه.

²⁴ بِدارَه اَ چیی که صِفته نَه دَرَسَرونه شِمَه کا بومونِه؛ اَگم اَ چیی که صِفته نَه دَرَسَرونه شِمَه دیلَه کا بومونِه، شِمَه نی زوعَه و دَده دیلَه کا بَمَندیرون.

²⁵ و اِمَه اَ چیی که اَ بَمون وعده دوعشَه، یعنی اَبَدی یَه زندگی.

²⁶ اَز اِمون کسونی دربارَه شِمَه را نیویشتِمَه که تقّلا بَکَردین شِمَه گمراه بَکَرِن.

²⁷ امّا شِمَه درباره بَسی بوآجِم اَ مَسحی که اَیی کا ویگِتَرونه، شِمَه دیلَه کا بَمَندی و نیازی نیرونه کسی شِمَه تعلیم بِدَه، بَلکَم چَیی مَسح گِردِ چییون درباره شِمَه تعلیم بَدای. اَ مَسح، حقیقتَه، نِه دوروع. بَس هَتَه که شِمَه تعلیم دوعَشَه، چَیی دیلَه کا بومونه.

خِدا خِردَنِن

²⁸ حِسَه، اِی خِردَنِن، چَیی دیلَه کا بومونه تا موقعی که اَ، ظهور بِکَرِه مطمئن بِبییَم و چَیی اومِه موقع اَیی کا شرمَنده مَبییَم.

²⁹ اَگم زونِستَرونه که اَ صالِح اِستَه، بَزونیرون اَ کسی که صالِح بییِه، بِه جا بواَردی، اَیی کا دنیا اومَه.