یوحنا اوّلین نامَه 1 - کتاب مقدس به زبان تالشی شمالی

زندگی بَخشَ کلام

¹ اَ چیی که صِفته نَه اِستبَه، اَ چیی که دَرَسَمونه و چَمَه چِمون نَه ویندَمونه، اَ چیی که بَیی دییَشتِمونه و چَمَه دَسون نَه لَمس کَردِمونه، یعنی زندگی بَخشَ کلام، اَیی شِمَه را اِعلام بَکَردیمون.

² زندگی ظاهر آبَه؛ اَمَه اَیی ویندَمونه و چیی را شهادتی بَدایمون، اَبَدی یَه زندگی شِمَه را اِعلام بَکَردیمون، هَ اَبَدی یَه زندگی که دَده نَه بَه و چَمَه را ظاهر آبَه.

³ اَمَه اَ کلامی که ویندَمونه و دَرَسَمونه شِمَه را نی اِعلام بَکَردیمون تا شِمَه نی اَمَه نَه رَفاقَت بِکَرَه؛ حقیقتن نی که چَمَه رَفاقَت دَده و چَیی زوعَه نَه، عیسایِ مسیح نَه یَه.

⁴ اَمَه اِمی شِمَه را بَنیویشتیمون تا چَمَه شادی کامل آبو.

نوری کا زندگی کَردِه

⁵ اِم پیغومی یَه که اَییکا دَرَسَمونه و شِمَه را اِعلام بَکَردیمون: که خِدا نورَه و هیچ تاریکی اَصلا چَیی دیلَه کا دَری نییَه.

⁶ اَگم اَمَه بوآجَم اَیینه رَفاقَت اِستِمونه، با اِمکه تاریکی کا زندگی بَکَردیمون، دورع بَواتیمون و حقیقتی عمل نِکَرَم.

⁷ امّا اَگم نوری کا زندگی بِکَرَم، هَتَه که خِدا نوری دیلَه کا یَه، یَندی نَه رَفاقَت اِستِمونه و چَیی زوعَه، عیسی خون، اَمَه گِردِ گناه اون کا پاک آکَرِه.

⁸ اَگم بوآجَم که گناه کَردَه نیمونه، اِشتَن گول ژَندَمونه و چَمَه دیلَه کا حقیقتی نییَه.

⁹ اَگم چَمَه گِناه اون اِعتراف بِکَرَم، اَ که وفادار و عادِلَه، چَمَه گناه اون بَبَخشِستی و هَر نادرستی کا اَمَه پاک آکَرِه.

¹⁰ اَگم بوآجَم که گناه کَردَه نیمونه، اَئی دروعَه واج نیشون بَدایمون و چَیی کلام چَمَه دیلی دِیله کا جِگایی نیشَه.