اوّلین نامَه قورَنتیانیرا 9 - کتاب مقدس به زبان تالشی شمالیپولُس، اِشتَن حقی کا گِذَرِه 1 مَگم از آزاد نیمَه؟ مَگم از رسول نیمَه؟ مَگم چَمَه خِداوند عیسی ویندَه نیمَه؟ مَگم شِمَه چِمِن کارون نتیجه خِداوندی کا نیرونَه؟ 2 اَگم خَلکی را رسول مَبوم، لااَقل شِمَه را که اِستیمَه؛ چوم شِمَه مُهر تائیدی اِستیرونه که ثابت بَکَردی از خِداوندی کا رَسولیمَه. 3 اِمَه چِمِن دفاع کَردِه اَ کَسونی پیشی کا که چِمِن درباره قِضاوت بَکَردین. 4 مَگم حق نِدارَم بَرَم و بِنجَم؟ 5 مَگم حق نِدارَم اَلباقی رسولون شیوار و خِداوندی بِرااون و کیفا شیوار، ایلَه ایماندارَه ژِنی چَمَه همراه بِدارَم؟ 6 فقط از و بَرنابا ایمونه که چَمَه زِندگی را بَسی کار بِکَرَم؟ 7 کَمیله سربازَه که اِشتَن خِدمتی خَرجی آدَه؟ کییَه که ایلَه اَنگرَه باغی آمادَه آکَرِه و چَیی محصولی کا مَرِه؟ یا کییَه که ایلَه رَمَه ای شوونَه تی بِکَرِه و چَیی شِتی کا مَرِه؟ 8 مَگم اِم چییون اِنسانی یَه فیکرون نَه بَواتیم؟ مَگم شریعت نی اِمی نِواجِه؟ 9 چوم موسی شریعتی کا نیویشته بییَه که: «ایلَه گایی گَ که کارا خَرمَن کوفِه مَدَوِند.» یعنی خِدا گااون را دیل نیگرانَه؟ 10 مَگم راس راسی اِمی چَمَه درباره نِواجِه؟ ها، اِم کلام اَمَه را نیویشته بییَه، چوم وختی که ایی نفر زمین شوم ژَنه، و یا خَرمَن کوفِه، بَسی اُمید بِدارِه که اَ محصولی کا بهره بَبَردی. 11 اَگم اَمَه روحانی یَه چیون شِمَه دیلَه کا کاشتِمونه، مَگم وِرَه که شِمَه کا کمک مالی ویگِرَم؟ 12 اَگم خَلک حق دارِن که اِنتَه رَه چییون شِمَه کا بِپین، مَگم اَمَه وِرتَر حق نِدارَم؟ امّا اَمَه اِم حقی کا اِستفادَه نِکَردِمونه، بَلکَم هَر چی تاو بوعَردیمون تا مسیح اِنجیلی راه سَری کا مانعی نوعَه مون مَبو. 13 مَگم نیمَزنه کسونی که معبدی دیلَه کا کار بَکَردین، چَوون غذا معبدی کا تأمین بَبی، و قِربونگاه خادِمِن، اَ چیونی کا که قِربونگا کا قِربونی بَبی بَهرَه بَبَردین؟ 14 اِنتَه نی، خِداوند حُکم کَردَشَه کسونی که اِنجیلی اِعلام بَکَردین، بَسی اِشتَن روزی، اِنجیلی کا بِه دَس بواَرِن. 15 امّا از، هیچ اِم حق و حقوقی کا استفادَه نِکَردِمَه و اِمی نی نِنیویسِم تا چِمِن حقّی کا اَ کاری بِکَرَه. چوم اَگم بِمِرِم چاکتَرَه تا اِم که ایی نفر چِمِن اِم اِفتخاری هیچ بِکَرِه. 16 چوم اَگم از اِنجیلی موعظه بَکَردیم اِم حقی بَه مِن آنِدَه که اِفتخار بِکَرِم، چوم که چِمِن وظیفه یَه که اِم خدمتی اَنجام بِدَم؛ وای بَر مِن اَگم اِم اِنجیلی موعظه مَکَرِم! 17 چوم اَگم چِمِن مِیلی نَه اِم کاری اَنجام بَدایم، چِمِن پاداشی ویگِرِم؛ ولی اَگم چِمِن مِیلی نَه مَبو، فقط چِمِن وظیفه اَنجام بَدایم. 18 بَس چِمِن پاداش چَه؟ فقط اِم که اِنجیلی مِفتَکی موعظه بِکَرِم و اَ حق و حقوقی که اَیی کا دارِم هیچی مَویگِرِم. 19 چوم هَر چَن که گِردِ چیی کا آزادیمَه، اِشتَن گِردی نوکَر وَج آکَردِمَه تا وِر کَسون مسیح را بِه دَس بواَرِم. 20 یهودیون وَری کا ایلَه یهودی شیوار بیمَه، تا یهودیون، مسیح را بِه دَس بوعَرِم. کسونی نَه که شریعتی حُکمون جیری کا اینه، کسی شیوار بیمَه که شریعتی حُکمون جیری کا یَه تا کسونی که شریعتی حُکمون جیری کا اینه مسیح را بِه دَس بوعَرِم. (هر چَن اِشتَن شریعتی حُکمون جیری کا نیمَه). 21 کسونی وَری کا که شریعتی حُکمون جیری کا نینه، کسی شیوار بیمَه که شریعتی حُکمون جیری کا نییَه تا کسونی که شریعتی حُکمون جیری کا نینه مسیح را بِه دَس بوعَرِم.(هَر چَن اِشتَن بیدون خِدا شریعت نیمَه، بَلکَم مسیح شریعتی کا فرمان بَبَردیم). 22 ضَعیفون نَه، ضَعیف بیمَه تا ضَعیفون مسیح را بِه دَس بوعَرِم. هَمه‌کسی را هَمه چیی بیمَه تا هَر جوری که اِستَه بعضی اون نجات بِدَم. 23 از گِردِ اِم کارون اِنجیلی واسی بَکَردیم، تا بَلکَم چَیی بَرکَتون کا سهم بِدارِم. 24 مَگم نیمَزنه که مسابقه دو کا، گِرد کارا بَوریتین، امّا فقط ایی نفر جایزه بَبَردی؟ بَس شِمَه اِنتَه بیرویجه که بِبَرَه. 25 هَر کسی که مسابقه را بَشی گِردِ چیون کا اِشتَن پیشی بَگَتی. اَوِن اِم کاری بَکَردین تا اَ تاجی که از بِین بَشی بِه دَس بوعَرِن؛ ولی اَمَه اِم کارون بَکَردیمون تا اَ تاجی بِه دَس بوعَرَم که از بِین نِشو. 26 بَس از بیدون هدف نیرویجِم؛ از اَ کسی شیوار که هَوا مُشت ژَنِه مُشت نِژَنِم. 27 بَلکَم از چِمِن بَدنی سختی بَدایم و اَیله بَردَه شیوار اَیی اَسیر بَکَردیم، تا نَبادا خَلکی را موعظه کَردِه پَش، اِشتَن رَد آبوم. |
@ 2024 Korpu Company