اوّلین نامَه قورَنتیانیرا 8 - کتاب مقدس به زبان تالشی شمالی

قِربونی بُتون را

¹ و حِسَه بُتون را قِربونی بییَه غذا درباره: بَزنیمون که «اَمَه گِرد آدَمونی دانا ایمونه.» اِم دانایی، غرور بواَردی، امّا محبت آدَمی بَنا بَکَردی.

² اَگم ایی نفر خَیال بَکَردی ایی چیی بَزنی، حَلا اَ چی که بَسی بِزونه، نیمَزنِه.

³ امّا اَ کسی که خِدا نَه خِشَه، خِدا اَیی آزونِه.

⁴ بَس، قِربونی یَه غذااون هَردِه درباره که بُتون را تقدیم بَبی، بَزنیمون که اِم دنیا کا «بُت هیچَه،» و «ایلَه خِدا غِیراز، دِ خِدایی نییَه.»

⁵ هَر چَن کسونی اِستینه که آسِمون و زمینی کا اَوون نَه خِدااون بَواتین، هَتَه که واقعاً نی وِرَه ’خِدااون‘ و وِرَه ’خِداوَندون‘ اِستَه-

⁶ با اِم حال اَمَه فقط ایلَه خِدا هِستِمونه، یعنی آسمونیَه دَده، که گِردِ چیی اِن اَیی کا اینه و اَمَه چَیی شِنیمونه؛ و فقط ایلَه خِداوند اِستَه، یعنی عیسایِ مسیح، که گِردِ چیی اِن چَیی واسطه نَه یَه و اَمَه چَیی واسطه نَه ایمونه.

⁷ هَر چَن که گِرد اِم دانایی نیشونه. ولی بعضی اِن چوم که پیشتری بُتون نَه وِر سَر و کار دارین اَگم هِم الان نی غذایی بَرِن که راس راسی بُتون را قِربونی بییَه، چوم چَوون وِجدان ضَعیفه، نِجِس بَبین.

⁸ «غذا، اَمَه بِه خِدا نِزدیک آنِکَرِه»؛ نِه نییَردِه نَه بَدتر بَبیمون، نِه هَردِه نَه چاکتَر.

⁹ امّا ویرا بِبییَه، شِمَه اِم حق باعیث مَبو که ضَعیفه آدَمِن لَغزش بِکَرِن.

¹⁰ چوم اَگم ایی نفر که ضَعیفه وِجدان دارِه، بِوینِه تِه ایی که اِم جریانی درباره دانایی هِستِرَه، بُتخانه اون کا نِشتیش و غذا بَردیش، مَگم اَ نی وسوسه نییَب اَ غذایی که بُتون را قِربونی بییَه، بَرِه؟

¹¹ اِنتَه، اِشتِه دانایی، اَ ضَعیفَ آدَمی هَلاک بییِه باعیث بَبی که مسیح چَیی واسی مَردَه.

¹² بَس وختی اِنتَه شِمَه بِرااون ضِد گناه بَکَردیرون و چَوون ضَعیفه وِجدانی صَدمَه بَژَیرون، مسیح ضِد گناه بَکَردیرون.

¹³ اِمی واسی، اَگم غذا چِمِن بِرا لَغزشی باعیث بِبو، هَرگز گوشت نییَرِم، نبادا که چَیی لَغزشی باعیث و بانی بِبوم.