اوّلین نامَه قورَنتیانیرا 6 - کتاب مقدس به زبان تالشی شمالیدعوا مُرافه ایماندارون دیلَه کا 1 هَر وخت ایی نفر شِمَه کا اَ ایلَه کا شکایت بِدارِه، چِنتَه جرئت بَکَردی اَیی، نِه مقدسون وَر، بَلکَم بِبَرَه گناه کارون محکمۀ دیلَه؟ 2 مَگم نیمَزنَه که مقدسِن دنیا داوری بَکَردین؟ بَس شِمَه که قرارَه دنیا داوری بِکَرَه، چِنتَه نیمَشایَه اِم روکَه جریانون داوری بِکَرَه؟ 3 مَگم نیمَزنَه که اَمَه ملائیکه اون داوری بَکَردیمون؟ چِه بِرسَه بِه اِم زِندگی جریانون داوری کَردِه دربارَه. 4 بَس چیرا وختی اِنتَه رَه اِختِلافِن شِمَه دیلَه کا اِتِفاق دَلَکِن، بَبَردیرون کسونی وَر که کلیسا کا کسی حِساب نِبون؟ 5 اِمی بَواتیم تا شِمَه شَرمنده بِکَرِم. یعنی شِمَه دیلَه کا ایی نفر حکیم نِبَه که بِشا اِم جریانون بِرااون دیلَه کا حَل فصل بِکَرِه؟ 6 ولی، بِرا، بِرا ضِد بَشی مَحکمه را، اَ نی چِه، بی ایمانون وَر؟ 7 اَصلاً اِنتَه رَه دعوا مُرافه شِمَه دیلَه کا، اِشتَن شِمَه را سَرشِکَستگی یَه. چیرا نِپیسترونه اَ بَدی قَبول بِکَرَه؟ چیرا حاضر نیرونه ضَرر بِکَرَه؟ 8 ولی شِمَه بِه اِشتَن بَدی بَکَردیرون و دییَرون ضَرر ژَنَه، حتی شِمَه بِرااون. 9 مَگم نیمَزنَه که ظالِمَ آدَمِن خِدا پاُتشایی وارث نِبون؟ گول مَرَه! بی‌عفتِن، بُت‌پرستِن، زِناکارِن، لواط گَرِن، 10 دِزدِن، طمع کارِن، عَرقَ هَرِن، گَ خَراوِن و کلاهبَردارِن، خِدا پاُتشایی وارث نِبون. 11 بعضی شِمَه کا پیشتری اِنتَه بیرونه. امّا عیسایِ مسیحِ خِداوندی نومی کا و چَمَه خِدا روح واسطه نَه شوشتَه بیرونه، تقدیس بیرونَه و صالح حساب بَییرونَه. بی عفتی کا دَوَزَه 12 «هَمَه چی بَه مِرا رَوایَه،» امّا هَمَه چیی فایده نیشَه. «هَمَه چی بَه مِرا روایَه،» امّا نییَرزِم هیچی بَه مِن اَفجور بِبو. 13 بَواتین: «غذا اِشکمی شِنَه و اِشکم غذا شِن، و خِدا، هَم اِمی و هَم اَیی نابود بَکَردی.» بَدَن بی‌عفتی شِن نییَه، بَلکَم خِداوندی شِنَه و خِداوند نی بَدَنی شِن، 14 و خِدا، خِداوندی مَردَه اون دیلَه کا زِنده آکَردِشه و اَمَه نی اِشتَن قوتی نَه زِنده آکَرِه. 15 مَگم نیمَزنه که شِمَه بَدَنِن مسیح اَعضا اینه؟ یعنی مسیح اَعضا پِگِرِم و اَوون ایلَه فاحشه اَعضا شیوار وَج آکَرِم؟ هَرگز! 16 مَگم نیمَزنَه کسی که ایلَه فاحِشه نَه بِخِسِه، اَیی نَه ایلَه بَدَن بَبی؟ چوم توراتی کا نیویشته بییَه که: «اَ دِ نفر ایلَه بَدَن بَبین.» 17 امّا اَ کسی که خِداوندی نَه ایلَه بَبی، اَیی نَه ایلَه روحَه. 18 بی‌عفتی کا دَوَزَه! آدَم هَر گناه دییَری که بِکَرِه بَدنی بِرونی کایَه، امّا کسی که بی‌عفتی بِکَرِه، اِشتَن بَدنی نَه گناه بَکَردی. 19 مَگم نیمَزنَه که شِمَه بَدن روح القدسی معبدَه که شِمَه دیلَه کایَه و اَیی خِدا کا ویگِتَرونه؟ شِمَه دِ شِمَه شِن نیرونه. 20 چوم شِمَه خِرییِه بییِه را بها آدوعَه بَه، بَس شِمَه بَدنی دیلَه کا خِدا جلال بِدییَه. |
@ 2024 Korpu Company