اوّلین نامَه قورَنتیانیرا 3 - کتاب مقدس به زبان تالشی شمالیجِدایی کلیسا دیلَه کا 1 امّا اِی بِرااِن، از نِشاستِمَه کسونی شیوار گف بِژَنِم که خِدا روح چَوون دیلَه کایَه، بَلکَم کسونی شیوار گف ژَنِم که جِسمانی اینه، یعنی کسونی شیوار که مسیح کا تَرَه خِردَنی نَه. 2 از، شِمَه شِت آدومَه نِه گوشت، چوم که اَیی را آمادَه نِبیرونه و حَلا نی آمادَه نیرونَه، 3 چوم که حَلا جِسمانی یَه چییون دومله کا ایرونه. وختی شِمَه دیلَه کا حَسودی و دعوا مُرافه یَه، مَگم هِم نیشون نِدَه که جِسمانی یَه چییون دومله کا ایرونه و بَشری یَه راه دیلَه کا رفتار بَکَردیرون؟ 4 چوم که وختی ایی نفر بَواتی: «از پولُسی کا پیروی بَکَردیم،» و اَ ایلَه بَواتی: «از آپولُسی کا پیروی بَکَردیم،» مَگم بقیه آدَمون شیوار نیرونَه؟ 5 مَگم آپولُس کییَه؟ پولُس کییَه؟ اَوِن فقط خادِمونی اِستینه که خِدا هَر کَمیله اَوون ایلَه وظیفه‌ای آدوشَه تا شِمَه چَوون واسطه نَه ایمان بواَرَه. 6 از دونه کاشتِمَه و آپولُس اَیی آو دوشَه، امّا خِدا بَه که اَیی سَوز آکَردِشه. 7 بَس نِه اَ کسی که بَکاشتی چیی یَه و نِه اَ کسی که آو بَدای، بَلکَم فقط خِدا یَه که اَیی سَوز آکَرِه. 8 اَ کسی که بَکاشتی و اَ کسی که آو بَدای، هر دِ نفر ایلَه اینه و هَر کَمیله، اَ زحمتی اَندازه که کَشِن، مُزد ویگِرِن. 9 چوم که اَمَه خِدا همکارونیمونه. شِمَه خِدا کِشت و کارَه زمین و خِدا عِمارتی رونه. 10 اَ فیضی نَه که خِدا بَه مِن آدوشَه، ایلَه ماهرَه معماری شیوار پاکار کَندِمه و ایی نفر دییَر اَ پاکاری سَری کا، ساختمون وَج آکَرِه. هَر کسی بَسی ویرا بِبو که چِنتَه وَج آکَرِه. 11 چوم هیچکس نیمَشا اَ پاکاری غِیراز که نوعَه بییَه، یعنی عیسایِ مسیح، ایلَه دییَر پاکاری بِنَه. 12 حِسَه اَگم کسی اِم پاکاری سَری کا اَ عِمارتی، طِلا و نِقرَه یا گِرونه سِنگون کا یا چو و واش یا کِلَشی کا وَج آکَرِه، 13 هَر کسی کار آشکار بَبی، چوم که اَ ’روز‘ گِردِ چییون بَرمَلا بَکَردی. چوم آتش کاری نتیجه معلوم بَکَردی، و آتش هر جورَه کاری که آدَمِن بِکَرِن آزمایش بَکَردی. 14 اَگم اَ کاری که اَ پاکاری سَری کا وَج آبَه باقی بومونِه، اَ آدَم اِشتَن مُزدی ویگِرِه. 15 اَگم ایی نفری کار آتش بِگِرِه ضَرَر بَکَردی؛ هَر چَن اِشتَن نِجات پیدا بَکَردی، امّا اَ کسی شیوار بَبی که آتشی شعله اون دیلَه کا جان بِه در بَردَش بِبو. 16 مَگم نیمَزنه که شِمَه خِدا مَعبدیرونه و خِدا روح شِمَه دیلَه کا مَندَه؟ 17 اَگم کسی خِدا معبدی خَراو آکَرِه، خِدا اَئی نابود بَکَردی؛ چوم که خِدا معبد مقدّسَه و شِمَه اَ معبدیرونه. 18 هیچکس اِشتَن گول مَژَنِه. اَگم شِمَه دیلَه کا اینفر خَیال بِکَرِه اِم دورَه زمانه کا حَکیمَ آدَمَه، بِدا که نادون بِبو تا شاید حکیم بِبو. 19 چوم که اِم دنیا حِکمت، خِدا نظری کا نادونی یَه. هَتَه که ایوبی کیتابی کا نیویشته بییَه که: «حَکیمَ آدَمون چَوون اِشتَن فَنی نَه گیرفتار بَکَردی.» 20 و هَنی مزموری کیتابی کا نیویشته بییَه که: «خِداوند حَکیمَ آدَمون فیکرون کا خَوَرِش اِستَه و بَزنی که اَ فیکرِن پوچی نَه.» 21 بَس دِ کسی بِه آدَمون اِفتخار مَکَرِه. چوم گِردِ چیی اِن شِمَه شِنی نه، 22 چِه پولُس بِبو، چِه آپولُس، چِه پطرس، چِه دنیا، چِه زِندگی بِبو، چِه مَرگ، چِه زمان حال بِبو چِه زمان آینده، گِردِ اِمِن شِمَه شِنَه 23 و شِمَه مسیح شِنیرونه و مسیح خِدا شِن. |
@ 2024 Korpu Company