اوّلین نامَه قورَنتیانیرا 2 - کتاب مقدس به زبان تالشی شمالی

مسیح اَ نی چِه مصلوب بییَه

¹ اِی بِرااِن، از نی وختی که اومیمَه شِمَه وَر، نومیمَه که خِدا سِرّون شِمَه را یال یالَه گفون، یا حکمتی نَه اِعلام بِکَرِم.

² چوم تصمیم گِتَم بَه که شِمَه دیلَه کا چیی مَزونِم عیسایِ مسیح غِیراز، اَ نی چِه، مصلوب بییَه عیسی.

³ از، ضَعفی نَه و وِرَه ترس و لَرزی نَه اومیمَه شِمَه وَر.

⁴ و چِمِن گفِن و چِمِن پِیغوم، حکیمانه گفون نَه نِبَه که قانع بَکَردی، بَلکَم خِدا روح و خِدا قدرتی نَه واتِمَه.

⁵ تا شِمَه ایمان آدَمی یَه حِکمتی نَه مَبو، بَلکَم خِدا قدرتی نَه بِبو.

حِکمت، خِدا روح کا

⁶ با اِم حال، اَمَه یالَ آدَمون دیلَه کا حِکمتی بَواتیمون، امّا نِه حِکمتی که اِم دورَه زمونه شِن بِبو، یا اِم دوره زمونه حاکِمون شِن بِبو که بِه نابودی مَحکومینه،

⁷ بَلکم اَمَه خِدا حِکمتی کا که ایلَه نِینَ سِرّی یَه گف ژَنَم. اَ حِکمتی که خِدا، دنیا خَلق کَردِه پیش، چَمَه جلالی را معّین کَردِشه.

⁸ اِم دورَه زمونه حاکِمِن هیچ گِله، اِم حِکمتی نفهمِستِشونه، چوم اَگم اَیی فهمِستَشون بَه، خِداوندِ جَلالی مصلوب نِکَرین.

⁹ هَتَه که اِشعَیای پِیغمبری کیتابی کا نیویشته بییَه که: «اَ چیی که هیچ چِمی وینده نیشَه، هیچ گوشی دَرَسه نیشَه، و هیچ اِنسانی فِکری کا آرَستَه نییَه، خِدا کسونی را حاضر آکَردَشَه که اَوون نَه خِشَه.»

¹⁰ خِدا اِشتَن روح واسطه نَه، اِم چییون اَمَه را آشکار آکَردَشَه. چوم که خِدا روح گِردِ چیون گَردِه، حتی خِدا عَمیقترین سِرّون نی.

¹¹ چوم کییَه که آدَمی فیکرون کا خَوَر بِدارِه، چَیی اِشتَن روح غِیراز که چَیی دیلَه کایَه؟ اِمی واسی، فقط خِدا روحَه که خِدا فیکرون کا خَوَر دارِه.

¹² حِسَه، اَمَه نِه اِم دنیا روح، بَلکَم ایلَه روح بِه دَس وَردَمونه که خِدا کایَه تا اَ چیی که خِدا بَمون هدیه آدوعَشه، بِزونَم.

¹³ و اَمَه هِمی کا گَف ژَنَم، اَ نی نِه گفونی نَه که آدَمی یَه حِکمتی کا آموتَمون بِبو، بَلکَم اَ گفونی نَه که خِدا روح بَمون آموجِه؛ و اِمی واسی روحانی یَه حَقیقَتون، کسونی واسی که خِدا روح اِشتَن دیلَه کا دارِن، بَواتیمون.

¹⁴ آدَمی که هَواهَوسی دومله بِبو چییونی که خِدا روح مربوطَه قبول نِکَرِه، چوم چَیی نظری کا نادونی یَه، و نیمَشا اَوون بِفهمِه، چوم که فقط خِدا روح نَه بَبی چَیی دُرست بییِه تشخیص بِدَی.

¹⁵ کسی که خِدا روح هِستِشَه، گِردِ چییون درباره داوری بَکَردی، ولی هیچکس نیمَشا چَیی درباره داوری بِکَرِه.

¹⁶ «چوم کییَه که خِداوندی فیکری بِفهمه تا اَیی تعلیم بِدَه؟» ولی اَمَه مسیح فیکری هِستِمونه.