اوّلین نامَه قورَنتیانیرا 15 - کتاب مقدس به زبان تالشی شمالیمسیح زِندَه آبییِه 1 اِی بِرااِن، حِسَه پیستِمَه اِنجیلی که شِمَه را موعظه کَردِمَه شِمَه ویر بواَرِم، هَ اِنجیلی که اَیی قبول کَردِرونه و اَیی کا پابَر جا ایرونه. 2 و چَیی واسطه نَه نجات پیدا بَکَردیرون، البته اَگم اَ کلامی که شِمَه را موعظه کَردِمَه، مُحکم غَم بَرَه. اَگم نِه که، بیخودی ایمان وَردَرونه. 3 چوم از مهمترین چیی که بَه مِن آرَستَه، شِمَه را اِعلام کَردَمَه: اِمکه مسیح چَمَه گناه اون واسی مَردَه هَتَه که مقدّس نیویشته اون دیلَه کا اومَه، 4 و اِمکه دَفن بَه، و اِمکه سوّمین روز مردَه اون دیلَه کا زِنده آبَه هَتَه که مقدّس نیویشته اون دیلَه کا اومَه، 5 و اِمکه اِشتَن بَر کیفای معروف بِه پطرس آشکار آکَردِشه و دومله اَ دونزَه گِله شاگِردی را. 6 چَیی پَش، ایی کَرَه پونصد گِلَه بِرااون را نی وِرتَر آشکار آبَه. وِر کَسِن اَوون کا حَلا زنِده اینه، هَر چَن بعضی اَوون کا مَردَه اینه. 7 دومله یعقوبی را آشکار آبَه و دومله گِردِ رسولون را. 8 آخِرسَر بَه مِن نی، ایلَه روکَه خِردَنی شیوار که نارَس دنیا اومَه آشکار آبَه. 9 چوم از رسولونْ دیلَه کا کَمترینیمَه، و روکتِه نی قابل نیمَه که مِنه خِدا رسول بوآجِن، چوم که خِدا کلیسا اَذیت آزار بَکَردیم. 10 اِمی که الان بَویندیرون اِستیمَه خِدا فیضی واسی یَه که اِستیمَه و اَ فیض بَه مِرا بی فایدَه نِبَه. بَرعکس، از چَوون گِردی کا چَتینتَر کار کَردِمَه، امّا نِه اِشتَن، بَلکم خِدا فیضی واسی که مِنه یَه. 11 بَس چِه از و چِه اَوِن، اَمَه اِنتَه موعظه بَکَردیمون و شِمَه اَتَه ایمان بواَردیرون. مَردَه اِن زِنده آبون 12 حِسَه اَگم اِعلام بَبی که مسیح مَردَه اون دیلَه کا زِنده آبییَه، چِنتَه یَه که بعضی شِمَه کا بَواتیرون مَردَه اِن زِنده آنِبون؟ 13 ولی اَگم مَردَه اِن زِنده آنِبون، بَس حتی مسیح نی مَردَه اون دیلَه کا زِنده آبَه نییَه. 14 و اَگم مسیح مَردَه اون دیلَه کا زِنده آبَه نییَه، بس هَم چَمَه موعظه هیچَه، و هَم شِمَه ایمان هیچ. 15 اَمَه حتی خِدا را دوروعَه شاهِدون حساب بَبیمون، چوم خِدا درباره شاهادت دوعَمونه که مسیح مَردَه اون دیلَه کا زِنده آکَردِشَه، که اَگم مَردَه اِن زِنده آنِبون، بَس خِدا نی اَیی زِنده آکَردَه نیشَه. 16 چوم اَگم مَردَه اِن زِنده آنِبون، بَس حتی مسیح نی زِنده آبَه نییَه. 17 و اَگم مسیح زِنده آبَه نییَه، شِمَه ایمان هیچَه و شِمَه حَلا شِمَه گِناه اون دیلَه کا ایرونه. 18 بَس کسونی که بِه مسیح ایمان دارین و مَردی نه، هَلاک بینَه. 19 اَگم اَمَه فقط اِم زِندگی کا بِه مسیح اُمید هِستِمونه، اَمَه گِردِ دییَر آدَمون کا بَدبختتَریمونه. 20 ولی مسیح حَقیقتَن مَردَه اون دیلَه کا زِنده آبییَه و اوّلین کسی یَه که مَردَه اون دیلَه کا زِنده آبییَه. 21 چوم هَتَه که مرگ ایلَه آدَمی واسطه نَه اومَه، مَردَه اون زِنده آبییِه نی ایلَه آدَمی واسطه نَه بومَی. 22 چوم هَتَه که گِرد، آدَمی کا بَمَردین، مسیح کا نی گِرد زِنده آبون. 23 امّا هَر کس اِشتَن نوبۀ نَه: اوّل مسیح که نوبَر بَه؛ و دومله، کسونی که چَیی اومِه موقع، مسیح شِن اِستینه. 24 چَیی بِه دومله آخِر زمان آرَستِه. اَ موقع که پاُتشایی دَسپَرِه خِدای دَده دَس، یعنی اَ موقع که هَر حکومت و اِقتدار و هَر قدرتی نابود بَکَردی. 25 چوم اَ بَسی تا وختی که اِشتَن دِشمَنون گِردی اِشتَن پا جیری کا بِنه، سلطنت بِکَرِه. 26 آخِرین دِشمَنی که بَسی از بِین بِشو، مرگَه. 27 چوم که خِدا «گِردِ چییون چَیی فرمانبُردار کَردِشَه و چَیی پا جیری کا نوشَه.» امّا وختی بَواتی: «که گِردِ چییون چَیی فرمانبُردار کَردِشَه و چَیی پا جیری کا نوشَه»، معلومه که خِدا اِشتَن، اَیی که گِردِ چیون مسیح فرمانبُردار کَردِشَه و چَیی پا جیری کا نوشه، در بَر نِگِرِه. 28 وختی که گِردِ چیی اِن چَیی فرمانبُرداری نَه، بَس زوعَه اِشتَن نی اَ کسی فرمانبُردار بَبی که گِردِ چییون چَیی فرمانبُردار کَردِشَه و چَیی پااون جیری کا نوشَه، تا خِدا کُل در کُل بِبو. 29 اَگم نِه مردمی منظور، چَه که مردَه اون نیابَتی نه غُسل تعمید بَگتین؟ اَگم مَردَه اِن اَصلا زِنده آنِبون، چیرا مردم چَوون نیابَتی نه تعمید بَگتین؟ 30 چیرا اَمَه هَر ساعت چَمَه جانی خطری کا دَرَفنَم؟ 31 بِرا اِن، اَ اِفتخاری که چَمَه خِداوند مسیحْ عیسی کا شِمَه درباره اِستِمَه سَر قَسَم، که از هَر روز بَمَردیم. 32 اَگم از اَفِسُسی شهری آدَمون نَه که وَحشی یَه حَیوونون مونِن، جنگ کَردِمَه، بَه مِرا چه فایده ایشی اِستبَه؟ آدَمی دیدی کا گف ژَنِم، اَگم مَردَه اِن زِنده آنِبون، «بایَه بَرَم و بِنجَم چوم که صَبا بَمَردیمون.» 33 گول مَرَه: «بَدَه همنشین، چاکه اَخلاقی فاسِد آکَرِه.» 34 اِم بیخودی یَه گفون کا که چَوون مَست آبَه ایرونه بِه اِشتَن بایَه و دِ گناه مَکَرَه؛ چوم بعضی اِن اِستینه که خِدا آنِزونِن. اِمی بَواتیم تا شرمَنده بِبییَه. بَدنی که زِنده آبو 35 امّا ایی نفر دَفَرسِه: «مَردَه اِن چِنتَه زِنده آبون و چِنتَه رَه بَدنی نَه بومَین؟» 36 اِی اَحمقَ آدَم! اَ چیی که بَکاشتیش، تا مَمِره زِنده آنییَب. 37 و اَ چیی که تِه بَکاشتیش، اَ بَدَنی که بَسی بِبو نییَه، بَلکَم فقط ایلَه دونه یَه، چِه گندم چِه دییَر دونه اِن. 38 امّا خِدا، اَ دونه را اَ بَدَنی که اِشتَن اِنتخاب کَردَشَه آدَه و هَر دونه ای را چَیی اِشتَن بَدَن مخصوصی آدَه. 39 چوم که گِردِ بَدَنِن ایی جور نینه. آدَمِن ایی جور بَدَن دارِن، حَیوونِن نی ایی جور دییَر؛ پرندَه اِن ایی جور دییَر؛ و ماهی اِن نی ایی جور دییَر بَدَن هِستشونه. 40 هِنتَه نی، آسِمونی یَه بَدَنِن و زمینی یَه بَدَنِن. امّا آسِمونی یَه بَدَنون جلال ایی جورَه و زمینی یَه بَدَنون جلال نی ایی جور دییَر. 41 آفتاو اِشتَن جلالی هِستِشَه، مانگ اِشتَن جلالی، و ستاره اِن نی اِشتَن جلالی هِستِشونه؛ چوم که هَر ستاره جلال، اَ ایلَه ستارۀ جلالی نَه فرق هِستِشَه. 42 مَردَه اون زِنده آبییِه نی اِنتَه یَه. اَ چیی که کاشتَه بَبی، از بِین بَشی؛ اَ چیی که زِنده آبو، از بِین نِشو. 43 ذِلّتی کا کاشته بَبی، عِزتی کا پِرِزِه. ضَعفی کا کاشته بَبی، قوّتی کا پِرِزِه. 44 جسمانی یَه بَدَن کاشته بَبی، روحانی یَه بَدَن پِرِزِه. اَگم جسمانی یَه بَدَن اِستَه، روحانی یَه بَدَن نی اِستَه. 45 هَتَه که توراتی کا نیویشته بییَه که: «اوّلین اِنسان، یعنی آدَم، موجود زِنده آبَه»؛ آخِرین آدَم، زِندگی بَخشه روح آبَه. 46 ولی اوّل روحانی نِه اومَه، بَلکَم جسمانی اوّل اومَه، و چَیی پَش روحانی. 47 اوّلین اِنسان زمینی کا بَه و اِنسانی، خاکی کا، دوّمین اِنسان آسِمونی کا. 48 هَتَه که، اِنسان خاکی یَه، کسونی که خاکی کا اینه هَتَه اینه؛ و هَتَه که اِنسان آسِمونی یَه، کسونی که آسمونی کا اینه هَتَه اینه. 49 و هَتَه که اِنسانِ خاکی شِکلی اِشتَن کا گِتِمونه، اِنسانِ آسِمونی شِکلی نی بَگتیمون. 50 اِی بِرااِن، اِمی شِمَه نَه بَواتیم که: جسم و خون نیمَشا خِدا پاُتشایی وارث بِبو و اَ چیی که از بِین بَشی، نیمَشا اَ چیی وارث بِبو که از بِین نِشو. 51 گوش بِدییَه! ایلَه سِرّی شِمَه نَه بَواتیم: اَمَه گِرد نِمِرَم، بَلکَم گِرد تبدیل بَبیمون. 52 ایی لحظه کا و ایلَه چِم بِه هَم ژَندِه کا، اَ موقع که آخِرین شیپور ژَندَه بِبو. چوم که شیپوری ژَنِن و مَردَه اِن بی اِمکه از بِین بِشون زِنده آبون و اَمَه تبدیل بَبیمون. 53 چوم اِم بَدنی که از بِین بَشی بَسی اَ بَدَنی که از بِین نِشو دَکَرِه و اِم فانی یَه بَدَن بَسی اَ بَدَنی که اَبَدی یَه دَکَرِه. 54 وختی که اِم بَدن که از بِین بَشی اَ بَدنی که از بِین نِشو دَکَرِه و بَدنی که فانی یَه بَدنی که فانی نییَه دَکَرِه، اَ موقع اِشعَیای پِیغمبری اَ نیویشته اِتِفاق دَلَکِه که بَواتی: «پیروزی، مرگی ویبَردَشه.» 55 «اِی مرگ، اِشتِه پیروزی کییارَه؟ و اِی مرگ، اِشتِه نیش کییارَه؟» 56 مرگْی نیش گناهَ و گناه قوّت، شریعت. 57 امّا شُکر خِدا که چَمَه خِداوند عیسایِ مسیح واسطه نَه بَمون پیروزی آدوعَشَه. 58 بَس، چِمِن عَزیزَه بِرااِن، پابَرجا و بَرقرار بِبییَه، همیشه خِداوندی کاری وِرتَر و وِرتَر اَنجام بِدییَه، چوم که بَزنیرون خِداوندی کا شِمَه زحمت کَشِه اَلَکی نییَه. |
@ 2024 Korpu Company