اوّلین نامَه قورَنتیانیرا 14 - کتاب مقدس به زبان تالشی شمالی

نبوت کَردِه و دییَر زَوونون نه گف ژَندِه

¹ محبتی دومله بِبییَه و غِیرتی نه روحانی یَه عطیَه اون بِپییَه، مخصوصاً اِم که نبوّت بِکَرَه.

² چوم اَ کسی که دییَر زَوون نَه گَف ژَنِه، نِه اِم که آدَمون نَه بَلکَم خِدا نَه گَف ژَنِه. چوم هیچکس چَیی گفی نِفهمه؛ ولی اَ آدَم، خِدا روح واسطه نَه، سِرّون بَواتی.

³ امّا اَ کسی که نبوّت بَکَردی، آدَمون نَه گف ژَنِه تا اَوون بَنا بِکَرِه و تشویق بِکَرِه و اَوون دیلداری بِدَه.

⁴ اَ کسی که دییَر زَوون نَه گَف ژَنِه اِشتَن بَنا بَکَردی، امّا اَ کسی که نبوّت بَکَردی کلیسا بَنا بَکَردی.

⁵ حِسَه از پیستِمَه که گِردِ شِمَه دییَر زَوون نَه گف بِژَنه، امّا وِرتَر پیستِمَه که نبوّت بِکَرَه. اَ کسی که نبوّت بَکَردی، اَ کسی کا که دییَر زَوونون نَه گف ژَنِه، یالتَرَه، مَگم اِم که ایی نَفر ترجمه بِکَرِه تا کلیسا بَنا بِبو.

⁶ حِسَه اِی بِرااِن، اَگم از بام شِمَه وَر و دییَر زَوونون نَه گَف بِژَنِم، چِه مَنفعتی شِمَه را هِستِشه، مَگم اِم که مکاشفه، دانایی، نبوّت یا ایلَه تعلیمی شِمَه را بِدارِم؟

⁷ حتی بی جانَ سازِن نی، لَله و چَنگی شیوار، اَگم درست ژَندَه مَبون، چِنته بَبی فهمِسته که چِه آهنگی کارا ژَندَه ببَی؟

⁸ اَگم شیپور چاک سَس مَدَه، کی جنگی را آمادَه بَبی؟

⁹ شِمَه درباره نی هِنتَه یَه. اَگم شِمَه زَوونی نه گفی بِژَنه که نییَب فهمِستِه، چِنتَه ایی نفر بِفهمِه که چِه بَواتیرون؟ چوم اَ موقع اِنگاری که هوا نَه کارا گف ژَنَه.

¹⁰ بیدون شک دنیا کا وِر جور بَه جورَه زَوونِن اِستینَه و هیچ گِله بی معنی نینه.

¹¹ ولی اَگم از مَشام ایی نفر دییَری گفون معنی بِفهمِم، کسی نَه که مِنَه گف ژَنِه بیگونه‌ ایمَه و اَ نی بَه مِنَه بیگونه یَه.

¹² شِمَه درباره نی اِنتَه یَه. اوآنَه که غیرتی نَه خِدا روح ظاهر بییِه دومله ایرونه، تَقَّلا بِکَرَه که کلیسا بنا کَردِه واسی ترقّی بِکَرَه.

¹³ بَس اَ کسی که دییَر زَوون نَه گَف ژَنه بَسی دعا بِکَرِه تا بِشا اِشتَن گفون ترجمه بِکَرِه.

¹⁴ چوم اَگم از دییَر زَوون نَه دعا بِکَرِم، چِمِن روح دعا بَکَردی، امّا چِمِن عقل بی بهره بَمندی.

¹⁵ بَس از چِه بَسی بِکَرِم؟ چِمِن روح نَه دعا بَکَردیم ولی چِمِن عقلی نَه نی دعا بَکَردیم؛ چِمِن روح نَه سرودِ ستایش بَخَندیم ولی چِمِن عقلی نَه نی سرودِ ستایش بَخَندیم.

¹⁶ چِمی غیراز اَگم تِه روح کا شُکرگزاری بِکَری، چِنتَه ایی نفری که نِفهمه تِه چِه بَواتیش اِشتِه شُکر کَردِه را آمین بوآجِه؟ چوم که نیمَزنِه تِه چِه بَواتیش!

¹⁷ چوم تِه دُرست شُکر بَکَردیش، امّا اِشتِه شُکر کَردِه باعث نییَب ایی نفر دییَر بَنا بِبو.

¹⁸ خِدا شُکر بَکَردیم که شِمَه گِردی کا نی وِرتَر دییَر زَوونون نَه گَف ژَنِم؛

¹⁹ امّا اِمی بَزنیم که کلیسا کا پینج کلمه چِمِن عقلی نَه گَف بِژَنِم که خَلکی تعلیم بِدَم چاکتَرَه، تا اِم که هَزارون کلمه دییَر زَوونون نَه گف بِژَنِم.

²⁰ اِی بِرااِن، فیکر کَردِه کا خِردَنون شیوار مَبییَه، بَلکَم بَدی کَردِه کا خِردَنون شیوار بِبییَه. ولی فیکر کَردِه کا یالَه آدَم بِبییَه.

²¹ توراتی کا نیویشته بییَه که: «خِداوند بَواتی: ”دییَر زَوونون نَه و خَلکون لِوون نَه اِم قومی نَه گف ژَنِم، حتی هَنی اَوِن چِمِن گفی گوش نِدَن.“‌»

²² بَس دییَر زَوونِن، ایلَه نیشونه ای یَه، نِه ایماندارون را بَلکَم بی ایمانون را؛ امّا نبوّت ایلَه نیشونه ای یَه ایماندارون را و نِه بی ایمانون را.

²³ بَس، اَگم کلیسا آدَمِن گِرد یَندی نه جمع آبَه و گِرد دییَر زَوونون نَه گف بِژَنَه، و هَ موقع کسونی که هیچی کا خَوَر نِدارِن یا کسونی که ایمان نِدارِن بان مِجلِسی دیلَه، مَگم نِواجِن که شِمَه تور و دیونه ایرونه؟

²⁴ امّا اَگم گِرد نبوّت بِکَرَه و کسونی که هیچی کا خَوَر نِدارِن و یا کسونی که ایمان نِدارِن، بان مِجلسی دیلَه گِرد باعیث بَبیرون که اَ آدَم قانع بَبو که گناه کارَه، و اَ گِردی پیشی کا داوری بَبی،

²⁵ و اَ آدَمی دیلی سِرِن بَرمَلا بَبین. اَ موقع اِشتَن دیمی سَر زمین بَلَکه و خِدا پرستش بَکَردی و اِعلام بَکَردی که: «حقیقتَن خِدا شِمَه دیلَه کا یَه.»

²⁶ بِرااِن، بَس منظور چَه؟ وختی یَندی نه جمع آبییَه، هَر کس ایلَه ستایشَ سرودی، ایلَه تعلیمی، ایلَه مکاشفه‌ای، ایلَه زَوونی و یا ایلَه ترجمه‌ای هِستِشَه. بِدارَه اِمِن گِرد بنا بییِه را اِستفاده بِبون.

²⁷ اَگم کسی ایلَه دییَر زَوونی نَه گَف بِژَنه، بِدارَه فقط دِ یا نهایت سِه نفر، اَ نی نوبتی نَه گَف بِژَنِن و ایی نفر نی ترجمه بِکَرِه.

²⁸ امّا اَگم کسی نییَه که ترجمه بِکَرِه، هَر کَمیله اَوون کا بَسی کلیسا کا ساکت بومونِن و اِشتَن دیلی کا و خِدا نَه گف بِژَنِن.

²⁹ بِدارَه دِ یا سِه نفر کسونی کا که نبوّت بِکَردین گف بِژَنِن و بقیه چَوون گفی سبک سنگین بِکَرِن.

³⁰ و اَگم ایی نفر دییَر که اوآکا نِشتَه ایلَه مکاشفه‌ای ویگِرِه، اَ بَسی اوّل ساکیت بومونِه.

³¹ چوم گِرد بَشایرون نوبتی نَه نبوّت بِکَرَه تا گِرد تعلیم بِگِرِن و تشویق بِبون.

³² اَنبیا روح، اَنبیا کا فرمان بَبَردی.

³³ چوم خِدا، هَرج و مَرجَه خِدا نییَه، بَلکَم صلح و سلامتی خِدا یَه. هَتَه که گِردِ مقدسون کلیسا اون کا اِنتَه اینَه.

³⁴ ژِنَکِن بَسی کلیسا کا ساکِت بومونِن. چوم که اَوون اِجازه دوعَه بَه نییَه که گف بِژَنِن، بَلکَم بَسی عِین هَ چیی که شریعت بَواتی، فرمان بِبَرِن.

³⁵ اَگم پیستِشونَه چیی یاد بِگِرِن، کَ کا اِشتَن شو کا دَفَرسِن؛ چوم که گف ژَنی کلیسا کا، ژِنکی را عِیبَه.

³⁶ مَگم خِدا کلام شِمَه کا اومَه؟ یا فقط بِه شِمَه آرَستَه؟

³⁷ اَگم ایی نفر خَیال بَکَردی که ایلَه پِیغمبرَه یا ایلَه آدَمی یَه که خِدا روح هِستِشه، اَ بَسی تصدیق بِکَرِه که اَ چی که شِمَه را بَنیویشتیم ایلَه حُکمی یَه خِداوندی طرفی نَه.

³⁸ اَگم کسی اَیی تصدیق مَکَرِه، اِشتَن نی تصدیق نییَب.

³⁹ بَس اِی چِمِن برااِن، غِیرتی نه چِمی دومله بِبییَه که نبوت بِکَرَه و دییَر زَوونون نَه گف ژَندِه پیشی مَگِرَه.

⁴⁰ امّا گِردِ چییِن بَسی دُرست و قائده نَه اَنجام بِبون.