اوّلین نامَه قورَنتیانیرا 13 - کتاب مقدس به زبان تالشی شمالی

محبتی راه

¹ اَگم آدَمون و ملائیکه اون زَوونون نَه گف بِژَنِم، ولی محبت مَدارِم، ایلَه سِنجی شیواریمَه که وِر سَرصِدا بَکَردی و ایلَه تِییَه طبلی شیواریمَه.

² و اَگم نبوّت کَردِه قدرتی بِدارِم و بِشام دنیا گِردِ سِرّون و دانایی درک بِکَرِم، و اَگم اِنتَه کامِلَه ایمانی بِدارِم که بِشام کوه اون جا‌بجا بِکَرِم، امّا محبت مَدارِم، هیچی نیمَه.

³ اَگم چِمِن گِردِ مال و مَنالی صدقه آدَم و چِمِن جانی آتشی شعله اون تسلیم بِکَرِم، امّا محبت مَدارِم، هیچ فایدَه ای بَه مِرا نِدارِه.

⁴ محبت میهروون و صبورَه؛ محبت حَسودی نِکَرِه و فَخر نِکَرِه، محبت غرور نیشَه.

⁵ محبت بی اَدب نییَه و اِشتَن مَنفعتی دومله نییَه؛ محبت غِیض نِگِرِه و کینه ای نییَه؛

⁶ محبت بَدی کا شاد آنِبو، امّا حقیقتی نَه شادی بَکَردی.

⁷ محبت همه چیی تحمل بَکَردی، محبت همه چی باوَر بَکَردی، هَمَش اُمید هِستِشَه و هَمه چی تاو بواَردی.

⁸ محبت هَرگز تمون آنییَب. امّا نبوّتِن از بِین بَشین و زَوونِن تمون آبون و دانایی از بِین بَشی.

⁹ چوم که چَمَه دانایی ناچیزَه و چَمَه نبوّت نی ناچیز؛

¹⁰ امّا وختی کامل بومَی، ناچیز از بِین بَشی.

¹¹ اَ موقع که تَرَه خِردَن بیمَه، روکَه خِردَنون شیوار گَف ژَنیم و روکَه خِردَنون شیوار فیکر بَکَردیم و روکَه خِردَنون شیوار دلیل بواَردیم. وختی یالَه مِردَکی بیمَه، روکَه خِردَنَه کِردِکاری نومَه کَنار.

¹² چوم اَ چیی که حِسَه بَویندیمون، ایلَه تارَه عکسی شیوارَه آواینَه دیلَه کا؛ امّا موقعی آرَستِه که دیمادیس بَویندیمون. حِسَه چِمِن دانایی ناچیزَه؛ امّا موقعی آرَستِه که کامل بَزنیم، هَتَه که خِدا چِمِن درباره همه چی کامل بَزنی.

¹³ بَس حِسَه، اِم سِه گِله چی باقی بَمَندی: ایمان، اُمید و محبت. امّا چِمون دیلَه کا محبت یالتَرینَه.