اوّلین نامَه قورَنتیانیرا 12 - کتاب مقدس به زبان تالشی شمالیروحانی یَه عطایِن 1 حِسَه اِی بِرااِن، نِپیستِمَه که روحانی یَه عطااون درباره بی خَوَر بِبییَه. 2 بَزنیرون وختی که بُت‌پرست بیرونه، گمراه بیرونه، و کَشیستَه بَبیرون لالَ بُتون طرفی را. هَر جور که بَبی شِمَه کَشونین. 3 بَس شِمَه نَه بَواتیم که هَر کسی که خِدا روح واسطه نَه گَف بِژَنه، هرگز نِواجِه لَعنت بِه عیسی، و هیچ‌کس روح القدسی واسطه غِیراز نیمَشا بوآجِه: «عیسی خِداوندَه.» 4 عطیَه اِن جور بَه جوری نَه، امّا روحْ هَ اِستَه؛ 5 خِدمَتِن جور بَه جوری نَه، امّا خِداوند هَ اِستَه؛ 6 کارِن جور بَه جوری نَه، امّا هَ خدایَه که گِردِ کَسون، گِردِ چیون کا قوَت بَدای. 7 خِدا روح ظاهر آبییِه هَر کسی را، گِردی مَنفعتی را آدوعَه بَبی. 8 چوم که ایی نفری خِدا روح واسطه نَه، حِکمتی کلام آدوعَه بَبی، هَ روح واسطه نَه به ایی نفر دییَر معرفتی کلام. 9 و ایی نفری هَ روح واسطه نَه، ایمان و بِه ایی نفر دییَر هَنی هَ روح واسطه نَه، شفا دوعِه عطایا. 10 ایی نفر دییَری معجزه اَنجام دوعِه قدرت آدوعَه بَبی، ایی نفر دییَری نبوّت، و ایی نَفری اَرواح تشخیص دوعِه قدرت آدوعَه بَبی. ایی نفری گف ژَنده بِه جور بَه جورَه زَوونون، و ایی نفر دییَری جور بَه جورَه زَوونون ترجمه کَردِه آدوعَه بَبی. 11 گِردِ اِمِن، هَ ایلَه روح واسطه نَه که خِدا روحَه قوَت گِرِن و اَته که اِشتَن پیستِشَه اَوون سهم بَکَردی و هَر کسی آدَه. ایلَه بَدَن، وِرَه اَعضا نَه 12 چوم هَتَه که بَدَن ایلَه یَه و وِر عضو هِستِشَه؛ و گِردِ بَدنی اَعضا با اِم که وِری نَه، ایلَه بَدنی نَه. مسیح نی هِنتَه یَه. 13 چوم گِردِ اَمَه، چِه یهود و چِه یونانی، چِه نوکَر و چِه آزاد، ایلَه روح کا غُسل تعمید گِتَمونه تا ایلَه بَدَن بِبییَم؛ و گِردِ اَمَه ایلَه روح کا هِنتِه بَیمونه. 14 چوم بَدن نِه ایلَه عضوی نه، بَلکَم وِرَه اَعضا کا وَج آبییَه. 15 اَگم پا بوآجِه، «چوم که از دَس نیمَه، بَدنی شِن نیمَه،» اِم دلیلی نییَب که بَدَنی ایلَه عضو مَبو. 16 و اَگم گوش بوآجِه، «چوم که چِم نیمَه، بَدَنی شِن نیمَه،» اِم دلیلی نییَب که بَدَنی ایلَه عضو مَبو. 17 اَگَم گِردِ بَدن چِم بِبی، چِنتَه بَسی دَرَسیمون؟ و اَگم گِردِ بَدن گوش بِبی، چِنته بَسی بو آکَریمون؟ 18 امّا اِنتَه، خِدا، بَدنی اَعضا اَتَه که اِشتَن پیستَش بَه ایلَه ایلَه بَدَنی کا نوشَه. 19 اَگم گِردِ اَعضا ایلَه بِبین، بَدَن کییا کا وجود داریستِه؟ 20 امّا اَعضا وِری نَه، در حالی که بَدَن ایلَه یَه. 21 چِم نیمَشا دَسی نَه بوآجِه، « بَه تِن اِحتیاج نیمَه!» و هَتَه نی سَر نیمَشا پااون نَه بوآجِه، «شِمَه اِحتیاج نیمَه!» 22 بَرعکس، بَدنی اَ اَعضایی که ضَعیفتری نَه، وِر واجبتَری نَه. 23 و بَدَنی اَ اَعضایی که فیکر بَکَردیمون کمتر حُرمت دارِن، اَوون وِرتَر حُرمت بَنایمون، و اَعضایی که قشنگ نینَه وِرتَر رَسیدگی بَکَردیمون؛ 24 در حالی که چَمَه قشنگه اَعضا اِنتَه رَسیدگی لازِم نِدارِن. امّا خِدا بَدنی اِنتَه منظم وَج آکَردَشَه که اَ اَعضایی که کمتر حُرمت دارِن وِرتَر حُرمت بِنییَه، 25 تا بَدنی کا جِدایی مَبو، بَلکَم بَدنی اَعضا ایی اندازه یَندی فیکری کا بِبون. 26 و اَگم ایلَه عضو عذاب بِکَشِه، گِردِ اَعضا اَیینه عذاب کَشِن؛ و اَگم ایلَه عضو حُرمت بِدارِه، گِرد ذوق بِکَرِن. 27 اِنتَه، شِمَه مسیح بَدَنیرونه و گِلَه بِه گِلَه چَیی اَعضا ایرونه. 28 خِدا کلیسا دیلَه کا، اوّل رسولون، دوّم پِیغمبرون، سوّم معلّمون؛ دومله معجزه اَنجام دوعِه قدرت، چَیی بِه دومله شفا دوعِه عطیه اِن و کمک کَردِه و مدیر بییِه و جور بَه جورَه زَوونون نَه گف ژَندِه، تعیین کَردِشَه. 29 مَگم گِرد رَسولی نَه؟ مَگم گِرد پِیغمبری نَه؟ مَگم گِرد معلّمی نَه؟ مَگم گِرد معجزه اَنجام دوعِه قدرتی هِستِشونه؟ 30 مَگم گِرد شفا دوعِه عطایا هِستِشونه؟ مَگم گِرد جور بَه جورَه زَوونون نَه گَف ژَنِن؟ مَگم گِرد ترجمه بَکَردین؟ 31 امّا شِمَه صِدق دیلی نَه یالتَرَه عطیَه اون دومله بِبییَه، و از چاکتَرین راه، شِمَه را نیشون بَدایم. |
@ 2024 Korpu Company