اوّلین نامَه قورَنتیانیرا 11 - کتاب مقدس به زبان تالشی شمالی

¹ بَس، بَه مِن کا سَرمشق بِگِرَه، هَتَه که از مسیح کا سَرمشق بَگتیم.

سَری پوشوندِه

² حِسَه شِمَه کا تعریف بَکَردیم که گِردِ چیون کا مِن ویر بواَردیرون و حتی اَ رسم و رسوماتی هَتَه که دَسپَردَمَه شِمَه، هِستِرونه.

³ امّا پیستِمَه بِفهمَه که هَر مِردی سَر، مسیحَه، ژِنی سَر، مِردَه، و مسیح سَر، خِدایَه.

⁴ هَر مِردی که اِشتَن سَری بوپوشونه و دعا یا نبوّت بِکَرِه، اِشتَن سَری بی‌حُرمت کَردَشَه.

⁵ ولی هَر ژِنی که سَر لُخت دعا یا نبوّت بِکَرِه، اِشتَن سَری بی‌حُرمت کَردَشَه؛ چَیی اِم کار درست اِمی شیوارَه که اِشتَن سَری تِراشتَه ش بِبو.

⁶ چوم که اَگم ایلَه ژِنی سَر لُخت بِبو، بَس بَسی اِشتَن مو کِتا آکَرِه؛ ولی چوم ژِنی را باعیث خِجالتَه که اِشتَن مو کِتا آکَرِه یا اِشتَن سَری بِتراشه، بَس، بَسی اِشتَن سَری بوپوشونه.

⁷ مِرد نَبی اِشتَن سَری بوپوشونه، چوم که اَ، خِدا دیم و جَلالَه؛ امّا ژِن، مِردی جلالَه.

⁸ چوم که مِرد، ژِنی کا بِه وجود اومَه نییَه، بَلکَم ژِن، مِردی کا بِه وجود اومَه؛

⁹ و مِرد، ژِنی را خَلق نِبَه، بَلکَم ژِن، مِردی را خَلق بَه.

¹⁰ اِمی واسی، ملائیکه اون واسی، ژِن بَسی نیشونه ای قدرت و اِختیاری کا اِشتَن سَری کا بِدارِه.

¹¹ با اِم هَمه، خِداوندی کا، نِه ژِن، مِردی کا جِدایَه، نِه مِرد ژنی کا.

¹² هَتَه که ژِن، مِردی کا بِه وجود اومَه، مِرد نی ژِنی واسطه نَه بِه وجود بومَی، و گِردِ اِم چیِن خِدا کااینه.

¹³ شِمَه اِشتَن قِضاوت بِکَرَه: ژِنی را دُرُسته که سَر لُخت خِدا درگاه کا دعا بِکَرِه؟

¹⁴ مَگم طبیعت، اِشتَن شِمَه یاد نِده که اَگم ایلَه مِرد بلندَه مو بِدارَه، اَیی را عارَه،

¹⁵ امّا اَگم ایلَه ژِن بِلندَه مو بِدارَه، اَیی را اِفتخاره؟ چوم بِلندَه مو، پوشِشی واسی آدوعَه بییَه ژِنی.

¹⁶ امّا اَگم کسی پیستِشَه اِشتَن سازی بِژَنه، بَسی بوآجِم که نِه اَمَه را و نِه خِدا کلیسااون را اِنتَه رَه دَبی نییَه.

خِداوندی سور

¹⁷ امّا اَ چیی کا که حِسَه شِمَه را حکم بَکَردیم، هیچ شِمَه کا تعریف نِکَرِم، چوم وختی شِمَه یَندی نه جمع آبَه، فایده که نِدارِه هیچ، ضَرَر نی هِستِشَه.

¹⁸ اوّل اِم که دَرَسِم، اَ موقَعی که کلیسا را یَندی نه جمع آبییَه، شِمَه دیلَه کا دِ دَسته ای دَلَکِه، و اِمی تِلی باوَر بَکَردیم.

¹⁹ چوم که شِمَه دیلَه کا بَسی اِم دِ دَسته ای بِبو تا اِنتَه شِمَه دیلَه کا کسونی که راس راسی ایمان دارِن، معلوم بِبون.

²⁰ وختی که شِمَه ایی جِگا کا یَندی نه جمع آبییَه، خِداوندی سوری هَردِه را نییَه.

²¹ چوم غذا هَردِه موقع، شِمَه کا هَر کمیله بیدون اِم که اَ ایلَه منتظر بِبو اِشتَن سوری بَردی، جوری که ایی نفر وِشی بَمَندی و اَ ایلَه سیری کا مَست آبو.

²² مَگم کَ نِدارَه که اَیی کا بَرَه و بِنجه؟ یا اِم که خِدا کلیسا بی حُرمت بَکَردیرون و نَدارون روک آکَرَه؟ شِمَه نَه چِه بوآجِم؟ اِم کاری واسی شِمَه کا تعریف بِکَرِم؟ نِه نِکَرِم.

²³ چوم از، هَر چیی دَسپَردَمَه شِمَه که خِداوندی کا ویگِتَمَه، که عیسایِ خِداوند اَ شَوی کا که اَئی، آدوشونه دِشمنی دَس، نونی پِگِتِشه

²⁴ و چَیی شُکر کَردِه بِه دومله، نونی پَلَه کَردِشَه و واتِشه: «اِم چِمِن بَدنَه شِمَه را. اِمی چِمِن یادی را اَنجام بِدییَه.»

²⁵ اِنتَه نی، سورَه پَش، قَدَرَه پِگِتِشه و واتِشه: «اِم قَدَرَه، تازه عهدی یَه چِمِن خونی کا. هَر کَرَه که اَیی کا هِنجَه، چِمِن یادی را اِنتَه بِکَرَه.»

²⁶ چوم که هَر موقع اِم نونی بَرَه و اِم قَدَرَه کا بِنجَه، خِداوندی مرگی اِعلام بَکَردیرون تا موقعی که آگَردِه.

²⁷ بَس هَر کسی اَتَه که دُرست نییَه اِم نونی بَرِه و خِداوندی قَدَرَه کا بِنجِه، عیسایِ خِداوندی خونی واسی تقصیرکار بَبی.

²⁸ هَر کسی پیش از اِم که نونی کا بَرِه و قَدَرَه کا بِنجِه، اِشتَن آزمایش بِکَرِه.

²⁹ چوم هَر کسی که بیدون اِمکه خِداوندی بَدَنی تشخیصِ بَده، بَرِه و بِنجِه، در اَصل اِشتَن محکومیتی هَردَشه و هِنتَشه.

³⁰ اِمی واسی یَه که شِمَه دیلَه کا وِر کَسِن ضَعیف و مریضی نَه و گروهی نی مَردَه اینه.

³¹ امّا اَگم بَر اِشتَن حکم بَکَردیمون، چَمَه سَر حُکم نِبی.

³² ولی اَ موقع که خِداوند چَمَه سَر حُکم بَکَردی، اَدَب بَبیمون تا دنیا نَه محکوم مَبییَم.

³³ بَس اِی چِمِن بِرااِن، وختی هَردِه را یَندی نه جمع آبییَه، بقیه منتظر بِبییَه.

³⁴ اَگم ایی نفر وِشی یَه، اِشتَن کَ کا غذا بَرِه تا شِمَه جمع آبییِه یَندی نه بِه محکومیت خَتم مَبو. بقیه چییون درباره نی وختی اومیمَه شِمَه وَر، شِمَه نَه بَواتیم چِه بَکَرَه.