اوّلین نامَه قورَنتیانیرا 10 - کتاب مقدس به زبان تالشی شمالیهُشدار بُت پرستی ضِد 1 چوم اِی بِراان، نِپیستِمَه اِم جَریانی کا غافل بِبییَه که چَمَه دَده اِن گِرد خِری جیری کا بینَه و گِرد دریا وسطی نَه دَوییَردینه. 2 اَوِن گِرد خِری کا و دریا کا غُسل تعمید گِتِشونَه، و اِم کاری نَه نیشون دوشونَه که موسی پیرو بَبین 3 و گِرد هَ روحانی یَه غذا هَردِشونه 4 و هَ روحانی یَه هِنتِه ای، هِنتِشونه. چوم اَ روحانی یَه صَخره کا هِنجِین که چَوون دومله کارا بومَی، و اَ صخره مسیح بَه. 5 با اِم هَمه، خِدا وِرتَرِ اَوون کا راضی نِبَه، اِمی واسی ویاوونی کا چَوون جَنازه اون زمینی سَری کا وِلا آکَردِشه. 6 حِسَه، اِم چیی اِن گِرد اِتِفاق دَلَکینه تا اَمَه را سَرمشق بِبو، تا اَمَه چَوون شیوار بَدی کَردِه دومله مَبییَم. 7 بَس بُت‌پرست مَبییَه، هَتَه که بعضی اَوون کا بینَه؛ هَتَه که توراتی کتابی کا نیویشته بییَه که: «مردم عیش و نوشی را نِشتینه و اَلواتی و عَرَقَ هَری را پِرِشتینه.» 8 و اَمَه نَبی بی‌عفتی بِکَرَم، هَتَه که بعضی اَوون کا کَردِشونه، و ایی روزی کا بیست و سه هَزار نفر هَلاک بینَه. 9 و اَمَه نَبی مسیح آزمایش بِکَرَم، هَتَه که بعضی اَوون کا کَردِشونه و نَلتیون نَه کِشتَه بیینه. 10 و هِنتَه نی غُرغُر مَکَرَه، هَتَه که بعضی اَوون کا کَردِشونه و هلاک‌َ کَراری نه هلاک بینَه. 11 حِسَه اِم چیی اِن چَوون سَر اومینَه تا سَرمشق بِبو و نیویشته بَه تا درس عبرتی بِبو اَمَه را که اِم دورانی کا زندگی بَکَردیمون که آخِر زمانَه. 12 بَس، اَ کسی که خَیال بَکَردی پابَرجایَه، چَیی هواس جمع بِبو که مَبَلَکِه! 13 هیچ آزمایشی شِمَه را اومَه نییَه که اَلباقی مردمی را اومَه مَبو. خِدا وفادارَه؛ اَ نییَرزِه که شِمَه تَوانی کا وِرتَر آزمایش بِبییَه، بَلکَم آزمایشی موقع نی، ایلَه راهی دَوَشته را بَنای تا شِمَه چَیی تاو و تحملی بِدارَه. 14 بَس اِی چمِن عَزیزِن، بُت‌پرستی کا دَوَزَه. 15 چِمِن گف کسونی نَه یَه که فَهمِن؛ شِمَه اِشتَن، اَ چیی درباره که از بَواتیم قِضاوت بِکَرَه. 16 مَگم اِم بَرَکتی قَدَرَه که اَیی را شُکر بَکَردیمون، مسیح خونی کا شریک بییِه، نییَه؟ و مَگم اِم نونی که پَلَه بَکَردیمون، مسیح بَدنی کا شَریک بییِه، نییَه؟ 17 چوم که نون ایلَه یَه، اَمَه وِریمونه، ایلَه بَدَنیمونه، چوم که گِرد ایلَه نونی کا سهم بَبَردیمون. 18 قوم اِسرائیلی دَیِسه: مَگم اَوِن که قِربونیون کا بَردین قِربونگاه کا شریک نِبینَه؟ 19 بَس چِمِن منظور اِم گفون کا چَه؟ اِمکه اَ غذایی که بُتی را تقدیم بَکَردین اِرزِش هِستِشه، یا اِمکه بُت اِرزِش هِستِشه؟ 20 نِه، چِمِن منظور اِمَه که بُت‌پرستون قِربونییِن، دیوون را تقدیم بَبین نِه خِدا را، و از نِپیستِمَه که شِمَه دیوون نَه شریک بِبییَه. 21 شِمَه نیمَشایَه هَم خِداوندی قَدَرَه کا بِنجَه هَم دیوون قَدَرَه کا؛ شِمَه نیمَشایَه هَم خِداوندی سِفره کا بَرَه، هَم دیوون سفرۀ کا. 22 مَگم پیستِمونه خِداوندی غِیرتی بِکَرَم؟ مَگم اَمَه، اَیی کا قَویتَریمونه؟ 23 «هَمَه چیی جایِزَه» - امّا هَمَه چیی فایدَه نیشَه. «هَمَه چیی رَوا یَه» - امّا هَمَه چیی بَنا نِکَرِه. 24 هیچ‌کس اِشتَن مَنفعتی دومله مَبو، بَلکَم اِشتَن خَمسوعَه مَنفعتی دومله بِبییَه. 25 هَر گوشتی که قصابی کا خِرَشِن بَرَه، بیدون اِمکه شِمَه وِجدانی را سوالی دَفَرسَه، 26 چوم که ”زمین و هَر چیی که چَیی دیلَه کایَه خِداوندی شِنَه.“ 27 اَگم ایلَه بی‌ایمان شِمَه دعوت بَکَردی غذا هَردِه را و شِمَه نی میل دارَه بِشَه، هَر چیی که شِمَه پیشی کا بَنای بَرَه بی اِم که شِمَه وجدانی واسی سوالی دَفَرسَه، 28 ولی اَگم ایی نفر شِمَه نَه بوآجِه: «اِم گوشت، بُتون را تقدیم بییَه.» اَ موقع اَیی مَرَه، اَ کسی واسی که اِم گفی شِمَه نَه واتِشه و وجدانی واسی- 29 چِمِن منظور اَ آدَمی وجدانَه نِه شِمَه وجدان. چوم چیرا بَسی ایی نفر دییَری وجدان چِمِن آزادی را حُکم بِکَرِه؟ 30 اَگم غذایی شُکر کَردِه نَه بَردیم، چیرا بَسی اَ چیی واسی که خِدا اَیی را شُکر بَواتیم، مِن مَحکوم بِکَرِن؟ 31 بَس هَر چِه بَردیرون، یا هَر چِه که بِنتیرون یا هَر کاری که بَکَردیرون، گِردی خِدا جلال دوعِه را اَنجام بِدییَه. 32 هیچ‌کسی ناراحت مَکَرَه، چِه یهودیون، چِه یونانیون و چِه خِدا کلیسا، 33 هَتَه که از تَقَّلا بَکَردیم تا گِردی هَر کاری دیلَه کا که بَکَردیم راضی آکَرِم. چوم که چِمِن مَنفعتی دومله نیمَه، بَلکَم وِر کَسون مَنفعتی دومله کا ایمَه، تا نِجات پیدا بِکَرِن. |
@ 2024 Korpu Company