First Timothy 2 - Indian Standard Version (ISV) Nagamese

Aradhana Nimite Samjai Diya

¹ Etu nimite, sob pora shuru te, ami tumikhan ke binti kori ase sob manu khan nimite amikhan Isor logote prathana koribi,

² raja khan aru adhikari khan nimite, titia amikhan ekta shanti aru bhal aru pobitro jibon chola bole paribo.

³ Amikhan laga Tran-Korta nimite prathana kora to bhal aru khushi kotha ase.

⁴ Isor he sob manu khan ke bacha bole, aru hosa gyaan dibole itcha kore.

⁵ Kilekoile ta te ekjon Isor ase, aru Isor aru manu majote kotha milai diya ekjon ase, Jisu Khrista.

⁶ Tai sob udhar koribo nimite thik somoite nijor jibon di dise, ekta sakhi hobo nimite.

⁷ Etu nimite he, moi nijorke Isor aru manu khan majote ekjon hikai diya aru ekjon apostle hobole basi loise. Moi Khrista te hosa koi ase- misa kowa nohoi. Porjati khan nimite biswas aru hosa hikai dibole moi ekjon hikhok ase.

⁸ Etu nimite, moi itcha ase aradhana kora sob jagate, manu khan pobitro hath uthaikene prathana kori bole, ghusa aru jhagara nakorikena.

⁹ Thik etu nisena, ami itcha kori ase kineka kapra lagai le sonman pai, eitu khan lagabi aru nijorke rukhai kene bhal pora thakibi. Chuli khan te kiba-kiba nabonabi, nohoile suna, moti, aru daam kapra khan nalagabi,

¹⁰ kintu Isor jana mahila nimite ki bhal kaam ase eitu khan he kori kene dikhabi.

¹¹ Ekjon mahila to shanti, nomro aru, mon dikene sikhibo lage.

¹² Mahila khan pora mota khan uporte Sikhsa dibole aru adhikar cholabole karone ami anumati nadibo, kintu taikhan aradhana to chup-chap koribo lage.

¹³ Kile mane poila Adam ke bonaise, etu pichete Eve ke bonaise.

¹⁴ Aru Adam pora paap kora nai, kintu Eve he Saitan pora poila thogai khaise aru tai he poila paap korise.

¹⁵ Kintu, taikhan bacha jonom diya te bachibo, jodi taikhan biswas, morom, aru bhabona to pobitro kori kene sob mani thakile.