YOSHUA 9 - Biblía Axweesantá Hhohho' ar Mungú 2004

Yoshua kuwa al/aáy nee múk Gibeoni

¹ Baalír xoorór Israeli kawa axaás, waawitá sleémeero oo yaaér Yordaniro gayuú /uwí dirií', nee oo yaamaá gongoama', nee oo baraá xatsoowo, nee kuduú afaá tlawtá Mediteraneárí tseewá' amór yaamaá Lebanoni, oo múk Hiti, nee oo múk Amori nee oo Kana'ani, nee oo Perisi, nee oo Hifi nee oo Yebusiro,

² tiri kilooín iigu'usiyé' as tawa slaqwarár ay amór Yoshua nee múk Israeli ar muunuú wákleelí.

³ Ala yaamuloouusér gixsár Gibeoni kangwdá' Yoshua aa tleéhh baraá gixsadaá Yeriko nee Airo kuwa axaás,

⁴ inooín al/ayma kana tleéhh. Tina ya/abuuse tleehhiyé', muruú /ayma ngway amohhe'eesiyé' nguri tsa/aasiyé' gawaá daandemaá daqwaayer'ín, tlabaá slaxareemo ngiri dahaasiyé' nee tlakwa'aá kadu awa taa warqaát awa difaái ngiri taatahhiyé',

⁵ nee ya/ataá taa waraáq ngay dahaasiyé', nee tlabaá naa qaruuruyé' ngay tsiitiyé'. Mikaátér /aymar'ín ka kaaharen nee aa dir/akút.

⁶ Inooín nay tlayé' ay dír xafoó múk Israeli kuduú Gilgali. Inooín Yoshua nee múk Israeliwo ngiri bayé', «Atén amór ta dahhaan a amór hhapaá sawen, atén gár ni sla'aan a masók al'axweesani an tleehhaán dinkwa nee kuungá'.»

⁷ Aluuwo múk Israeli iri oó' dír múk Hifi, «Atén nee kuungá' gár al'axwesantá wayda kas alkaahaan a milá? Hám wané kuungá' tundu yaameerí tseéw.»

⁸ Inooín Yoshua ngway bayé', «Atén a sagadiyuuseerók.» Yoshua giri yaahaás, «Kuungá' a ín heemá? Kuungá' amór ta dahha' a amoomá?»

⁹ Inooín nay ooiyé', «Atén amór ta dahhaan a amór yaamaá saawá', asma atén aga axasaán daanduú AAKOÓ MUNGÚ, Munguúhunge, tidá' inós aa tleéhh dír múk yaamaá Misri,

¹⁰ nee tidá' aa tleéhh dír waawitaadá' tsár oo Amori, kuduú bihhaá da/aáw awa Yordani, waawutmo Sihoni oo Heshboni nee Ogu waawutmoó Bashani, kudaádá' aa hoot Ashtarotír wa ale.

¹¹ Geeraharuuseerén nee muu sleémeero kudaádá' baraá yaamuurén i dirií' atén tina bayé', ‹Tlawsé', muruú /aymár aai amohhe'eesaak, ti doge' nee xoorór Israeli, daqaní ka beera', atén a sagadiyuuserhúng, na'asé', atén nee kuungá' al'axweesantá wayda a alkaahaán.›

¹² Qaytsité' mikaáterén, qoomár atén niwa tlawaán mikaáteerí i haán, xáy ga/aawaak, daxta aa qaroó kát nee aa dir/akút.

¹³ Tlakw'iikaá kadu kiwa dalaa/aán ma'aywo ki /aben, ala qaytsité' naa qaroó qaruuruyé', tam tlabaarén nee ya/ataawo naa slaxaruutiyé' as aa'aá tleerá'.»

¹⁴ Múk Israeli muruú /aymaadá' ta kon nee mukduú Gibeoni kuri /aáy as kawa laqan ar adór al'axweesantadá' kara ya/án. Ala múk Israeli AAKOÓ MUNGÚ gwaa yaahasiiká gawaá daanduú tihe.

¹⁵ Yoshua al'axweesani gari oó' ar múk Gibeoni kuwa tsu/iiká nee múk Israeli. Bariisér Israeli kaangwí guri ya/aán boo/eesaro.

¹⁶ Deelo tám iwa waaráhh alaá axweesantidae, múk Israeli gari tsaáhh adór múk Gibeoni kur inslaawaydií tseéw.

¹⁷ Bál tám múk Israeli tana tláy dír xafay'ín wa alé, tay hardáh ay dír gixsadudaá múk Gibeoni. Gixsaduín a Gibeoni nee Kefira, nee Be'eroti nee Kiriat-yearimu.

¹⁸ Ala múk Gibeoni sleeme kwa tsu/iiká nee múk Israeli, as al'axweesantadár wayda taa káh ar baraá umuú AAKOÓ MUNGÚ, Munguú Israeli. Aluudae muu sleémeero tari qununuú/ dír geeraharuuser'ín daanduú tihe.

¹⁹ Ala geeraharuusér Israeli muk'ín guna beér, «Adoodá' al'axweesani ngiwa tsáp wa ooaán ar umuú AAKOÓ MUNGÚ, Munguú Israeli, as adoorí hamí i kwatitanaaká.

²⁰ Inooín in slafíngwí mawaán as al'axweesantarén. Atén bar adoorí aga tleehhaniiká Aako atén ti slahh'eemisuú úr i huuw.

²¹ Gimsé' mawaak i hootiye', gadiyér migír feehhamis nee ma'aay hhekw a tooín.» Adoorí an adór geeraharuusér Israeli aa ó'.

²² Múk Gibeoni kuri ateét nee Yoshua giri báy, «Ahaá a milá, atén mista beeré' kuungá' amór ta dahha' ka saaw, laatí dír ta hota' aqo diirí tseew.

²³ Asma adoorí kawa tlehhé', Mungú kuungá' naa lu'ús, mukhúng i lawaale tleehhiit, migír kun tlaaq, nee a hheekuusér ma'aá doó Munguú Israeli.»

²⁴ Inooín nari ooiyé', «Atén a xuaán adór AAKOÓ MUNGÚ, Munguúhúng, sagadiyusmoowós Mose ngura ádbáy múk baraá yaamuuká' nguwa hhaamisi, nee yaamuuká' ngiwa kuungá' i haniisi. Gawaá adoorihe atén ana da'ayuutaán. An gár adoorí ngisa tleehhaán.

²⁵ Ala atén daxta a baraá dabaawók i diriiaán, tidá' hhoo' kuúng taa aán aténí tleehharo, tleehheek.»

²⁶ Adoorí an adoodá' Yoshua aa tleéhh. Inós múk Gibeoni guna baáq, nee inós sleeme aa ya/aniká múk Gibeoni kuwa tsu/i.

²⁷ Alaá deelór niinawe Yoshua múk Gibeoni guri lawaale tleéhh ar migír feehhamis, nee ar ma'aay hhekw awa múk Israeli, nee awa kitángw ilahhooa kawa hanmiisi. Ay laarí inooín i kumamitiyá' gadiyeérihe, didá' AAKOÓ MUNGÚ aqo tsawaari as sluufmis.