YOSHUA 8 - Biblía Axweesantá Hhohho' ar Mungú 2004

Gixsár Ai kawa gaás nee kawa hayóh

¹ Naagáy AAKOÓ MUNGÚ Yoshua guri báy, «Kuúng ma da'ayumiitaar laqaá ma hhaslitaar, slaqwaruuse amohhe'eeseek. Daqaní ta tleerá' ay Ai, ga/aaweek, aníng waawutmoó Ai nee mukose nee gixsarose nee yaamuuwose ngaa dabaawók i qaás.

² Adoodá' kuúng taa tléhh dír múk Yerikór i alé, an adór kuúng ta tlehh dír múk Ai nee waawutmooín. Haasaáng ku koohúng tlehhá'. Gixsar'ín haramaamahhataak, amór alaá gixsa nar oohaak.»

³ Yoshua slaqwaruuse gari amohhe'eés tawa haratlay Ai. Slaqwaruusér kume mibeeri tám gana tsawaár, gari ya/aáw ay Ai xweeraawo.

⁴ Yoshua giri báy, «Kuungá' maamahhaté' ar alaá gixsa ma saweesara' bihhaá gixsaro, ala masók tundu amohhoó' umuú qoomaaro.

⁵ Aníng nee mukdá' ti alkoomá' a tseewuwaán amór gixsa. Inooín birtinda ti'iít adoodár geeraá wa ale, atén an geeraaín wa guwaán, inooín atén tiri aluú wa alta'ainá', atén ngiri ar guwaán ay dír ki ar saweesaan dír gixsaro.

⁶ Inooín daqaní taqo ooi, ‹Múk Israeli aa geeraarén wa goów.› Inooín niqo aluurén wa ta'aainá', nee atén daqaní inooín ir puruutsaán iisaapoó gixsaro.

⁷ Kuungá' daqaní ni /akumitá' baraá xwaansláydá' tay nahhati'i, daqaní ta datá' baraá gixsa. Asma AAKOÓ MUNGÚ, Munguúhúng gixsa ngi gawaá dabaahúng i qaas.

⁸ Kuungá' bara daté' baraá gixsa, gixsa ka da/á' ar asla. Adoodá' AAKOÓ MUNGÚ ngira oó' na tleehhaak, ga/aawaak, adoorí aníng ngaa oó' dirhúng.»

⁹ Naagáy Yoshua inooín giri báy, «Tlawsé', umuúqo heewo dír nahhatarós ngi leeleehhi.» Inooín tay bihhaá /uwaá áy awa gixsár Ai, tla/ángw gixsár Ai nee Beteli. Ala Yoshua iri deél baraá xafoó Israeli xweeraadae.

¹⁰ Yoshua matlaatlér boo/e iri tseewa tláy, muu guri burumbuúr, inós nee bariisér Israeli tari geeraá múk wa tláy ay amór gixsár Ai.

¹¹ Slaqwaruuseedá' sleémeero nee inós ti koomá' tay tseewúy dír gixsa, xafay'ín kuri tleéhh bihhaá /iya awa gixsár Ai. Inooín nee gixsár Ai xatsa gaa tla/a sláhh.

¹² Yoshua múk kume kooán guna giirór wa luú/ bihhaá /uwa awa gixsa, tla/ángw Ai nee Beteli.

¹³ Slaqwaruusér yaariir kana qaás bihhaá /iya awa gixsa, nee bartá hatlá' ar aa met kana qaás bihhaá /uwa awa gixsa. Yoshua xweeraawo iri qaát baraá xatsa.

¹⁴ Waawutmoó Ai adoorí ngiwa ár, inós nee mukós tindiri gaanslár ti'iít amór xatstá Araba as nee slaqwaruusér Israeli tiwa harasihhimiitiya' slaqwaraaro. Ala inós ga xuiika adór gixsarós kingira aluú wa haramaamahhaát.

¹⁵ Yoshua nee múk Israeli sleémeero nari guwiyé' kwaáo' kina baál, tay ta'aaín ay amór yaamaá gwa/aatá'.

¹⁶ Múk gixsár Ai sleémeero, Yoshua nee mukós kiri aluú wa guús, inooín karir goów nay saweesiyé' dír gixsár Aiwo.

¹⁷ Umuú heé aa meet baraá gixsár Ai nee Beteli i kaahh, asma sleémeero múk Israeli nguna guusiyé', nee gixsar'ín ina kilós mét.

¹⁸ Aluuwo AAKOÓ MUNGÚ Yoshua guri báy, «Lawaalaasír gawaá dakók loloqooseek amór Ai, aníng Ai ngi gawaá dabaawók i qaás.» Yoshua lawaaladá' gay looloqoós amór gixsadár Ai.

¹⁹ Mukdádá' aa nahhaat Yoshua nguwa ár lawaalarós gaa gáwtí tleés, inooín nina gaanslár ta'aainé' amór gixsár Ai, ngay hayoohiyé', ngiri da/iyé' ar asla.

²⁰ Múk Ai tana alií qaytsiít, quui kana ár i tsa/a/aán gawaá doori. Inooín nay ya'a' tsatitiyé' adór tar /akuuti iri qwát. Asma múk Israeli kudaádá' aa geeraín wa goow ay yaamaá /awaak, gaa harawarqáy.

²¹ Yoshua nee mukose quui ngina ariyé', ngay tsaahhiyé' adór slaqwaruuseedá' aa nahhat gixsa ngira hayót, ngay da/iyé' ar asla, quui iri tsa/aán gawa. Inooín múk Ai ngway harawarqayé' tsu/utaaro.

²² Mukduú Israeli aa baraá gixsár Ai dah, nee asla gaa qaas, inooín sleeme nay haratla/uú ayé' kiri haraweél, múk Ai kuri tsuú/ sleémeero. Hee tumu wák oo aa meet i kaahh baraá tla/angw'ine.

²³ Waawutmoó Ai slaqwaruusér Israeli guna ót kuri slafi huúw amór Yoshua.

²⁴ Múk Israeli muu sleémeero oo Ai tsu/utaro nguwa hhe'eesiyé' dír tsee/aá /awaák wa alé, inooín nay ki/iyé' baraá gixsár Ai. Mukdá' aa meet kuri hhaamiís ar paánga.

²⁵ Yoshua nee mukós múk kume mibaá nee tsár hhawaate nee /ameena kudá' baraá gixsár Ai diriiá', kina tsuú/.

²⁶ Yoshua dakós kudá' lawaalarós gaa looloqoos amór gixsár Ai, gwaa alií ki/isiiká ay qoomár múk gixsár Ai sleémeero nguwa hhaamiís.

²⁷ Múk Israeli, hikwa nee xoosladá' taa baraá gixsarí áy kari huúw haasaáng wa ale ar adoodá' AAKOÓ MUNGÚ Yoshua ngura hara'ayín.

²⁸ Yoshua nee mukós gixsár Ai ngiri da/iyé', iri huuhu'uún, iri ufe tleehhít tam ay laarí.

²⁹ Inós waawutmoó Ai guri tarereé' gawaá xa'ano ay tsiindo. Nee qoomár tsiindi iwa darat, Yoshua muu guna báy, «Slaqwtós hingeesaak gawaá xa'anoowo, ka kwahhá' afkú gixsa.» Naagáy tlaa/e kay gawaá tuuadií burumbuúr adór ufa, tam ay laarí ufuudá' i deer.

Hara'ayár Mose kawa gawaá tloomár Ebalír wa soomuús

³⁰ Naagáy Yoshua kitángw ilahhooa kawa haniis dír AAKOÓ MUNGÚ, Munguú Israeli, guri tleéhh gawaá tloomár Ebali.

³¹ Yoshua kitángw ilahhooa guna tleéhh ar adoodá' Mose sagadiyusmoó AAKOÓ MUNGÚ ngira oó' dír múk Israeli, nee adoodá' kara gooín baraá kitaábuú dabér Mosewo, iwa kaahi, «Kitángw ilahhooa ku tleehhi ar tlaa/aá taa dakwiiká ar muqsli.» Múk Israeli sleémeero ilahhooár da/a kari haniís dír AAKOÓ MUNGÚ, nee ilahhooár muruú ta tsu/i ar wayda sleeme.

³² Yoshua dabér Mose gay dír ilaá múk wa gooín gawaá tlaa/e.

³³ Múk Israeli sleémeero dinkwa nee geeraharuuser'ín nee bariise nee har'ohuuseero nee hooma sleémeero ar baraá tla/angw'íní dirii', tana sihhiít bihhér sandakmoó alqado, dír geeraá kaahamuusér Mungú ar tlahhoó Laáwi, tidá' sandakmooduú alqadór AAKOÓ MUNGÚ loohamamiis. Muu tina tla/a tsaát, bahh'alé ta geeraá tloomár Gerisimu wa sihhimiit, bahh'alé ta geeraá tloomár Ebali, adoodá' Mose, sagadiyusmoó AAKOÓ MUNGÚ ngira qaroó oó', tawa adór múk Israeli kur tsuuqi.

³⁴ Aluuwo Yoshua dabér Mose sleémeero gari soomuús ar afór ur dír múkwí ale, dinkwa nee tsuuqaawo, nee lo'ooro. Inós gana soomuús ar adoodá' kara gooín baraá kitaábuú dabeero.

³⁵ Baraá axweesanaydá' Mose aa gooini tam /aymuú wák oo Yoshua aa soomusiiká i kaahh dír múk Israelírí ale dinkwa nee /ameenaaro nee na/iiwo nee hoomaadá' baraá tla/angw'ín hoota.