YOSHUA 7 - Biblía Axweesantá Hhohho' ar Mungú 2004

Tlakweemaá Akani aa tleéhh

¹ Múk Israeli inkihhimu gwa tleehhiiká daanduú muruudá' tawa oó' ku hhaamisi, ala Akani garmoó Karmi garmoó Sabdi, garmoó Sera, oo tlahhoó Yuda, muruudá' tawa oó' ku hhaamisi inós guna bahh qawti ar tláy, AAKOÓ MUNGÚ iri daa/atúy buhhtaawo dír múk Israeli.

² Yoshua muu guna ya/aáw amór gixsár Yerikór wa ale ay amór yaamaá Ai, gixsadár bihhaá da/aáw awa Beteli, ar iisaapoó Bet-aweni, inooín giri báy, «Tlawsé' yaamuudá' tsawtsawuusare'.» Inooín tari tláy gixsár Ai ngiri tsawtsawuusiyé'.

³ Inooín niwa ki/iyé' amór Yoshua ngway bayé', «Gár muu sleémeero is daawiiti daqeemuuwo i káhh, hhawaataá daqawá' masók a har afiqoomár kume tsár laqaá tám, gixsár Ai kawa i haratlay, asma múk gixsár Ai ku ureeká.»

⁴ Múk kume tám iri tláy as múk gixsár Ai nguwa muxiya', ala inooín kingiri guús nee múk gixsár Ai.

⁵ Múk Israeli kuri guús nee mukduú gixsár Ai dír afkú gixsár wa ale ay /etángw Shebarimu. Múk mibeeri tám nee lahhoó' oo Israeli kuri tsuú/. Múk Israeli gur'e ma'aay ngiri dalaa/iyé'.

⁶ Yoshua nee bariisér Israeli tlabaaín ngina feehhamisiyé' as gurhaami, inooín tari gwangwara'amiít dír geeraá sandakmoó alqadór AAKOÓ MUNGÚ. Nina didá' wa iwaawitiyé' ay tsiindo, slám sager'ín ngaa teerírí qamaaminé'.

⁷ Yoshua iri firín, iri oó', «A tsaxwaarén, xáy Aakoó MUNGÚ, gár atén tisa waarahhás Yordaniro a tin hanísa dír múk Amori as tiwa xooro qwaareesi? Tsiní bar geeraawo aga meetaán gayuú yaaér Yordani.

⁸ Xáy Aáko, aníng gár ni oo' a milá múk Israeli barnaxés taa goów geeraá wakuuser'ín wa alé?

⁹ Múk Kana'ani nee muu sleémeero oo baraá yaamuudá' i dirií' kaangwí bur ngwa axaasiyé', atén tin harweeriyá' tiri hhaamiis, aluuwo daqaní kuúng adór umuuwók kudá' xiríf kur iiatleeres?»

¹⁰ AAKOÓ MUNGÚ Yoshua guri báy, «Ahaá waáy, masa yaamií gwangwara'át giti kari yaamúr ót? Sihhiít!

¹¹ Múk Israeli tlakweema gaa tleéhh, alqadoodá' án nee inooín naa axweesaán ngaa si'iyé', inooín xosluudá' taa paraátl as kiwa qororo'oosi ngina bahh taatahhiyé', slám ngina fisisiné', ngiri lu/iyé' baraá xosluuín, lama ngiri tsatiyé'.

¹² Gawaá adoorihe múk Israeli sihhitanór geeraá wakuuser'ín ga baloó aleeslayká. Inooín aqo tan geeraá wakuuser'ín wa gogoow, asma gár naa tleehhiyé' a gár gi hhaamiis. Aníng nee kuungá' a dinkwaarooká ay dír muruudá' taa paraátl as kuwa hhaamisi kway qororo'osa'.

¹³ Sihhiít, muu hheehhe'eeseek nee ti amohhe'eesiye', matlo tindiwa dír geeraaeé' hardihi. Asma aníng AAKOÓ MUNGÚ, Munguú Israeli, muu gár ngu baw i deer. Asma xosluudá' aníng niwa oó', qororo'oosaak, i baraá tla/angwhúng i dirii'iyá'. Gawaá adoorihe kuungá' sihhtanór geeraá wakuuserhúng a aleesleera'aaká ay dír xosluudá' ki qororo'osa' baraá tla/angwhunge.

¹⁴ Gimáy muu ádbaweek, matlo muu ni faakisi dír geeraaeé', tlahh'aá Israeli ti wakeetine' dír geeraaeéní ale. Tlahhoó án naa óh gur'ér maray'ín ti wakeetiin, guruú do'dá' án naa óh muu ti wakeetin.

¹⁵ Heé naa harati'iít oo muruudaádá' taa paraátl gu koóm ku daa/ baraá asla, inós nee múk do'ose, nee muruudá' sleémeero i kona. Asma alqador'eé' gaa sií', gár alsi'ím gaa tleéhh baraá múk Israeliwo.»

¹⁶ Aluuwo Yoshua matlaatlér boo/e iri tseewa ti'iít, xoorór Israeli gari dinkwárí burumbuúr, tlahhi'i gina wakeetín, nee tlahhoó Yuda guri óh.

¹⁷ Tlahhoó Yuda gway geerií ateét nee guruú doó Sera kuri sláy. Guruú doó Sera guri geeraá múkwí ateét, múk guruú do'odá' guri wakeetín ateetiingo nee doó Sabdi kuri sláy.

¹⁸ Múk doó Sabdi kuri wakeetín ateetiingo, Akani garmoó Karmi, garmoó Sabdi garmoó Sera, oo tlahhoó Yuda kuri sláy.

¹⁹ Yoshua Akani guri báy, «Garmaaeé', na'ás, AAKOÓ MUNGÚ, Munguú Israeli, xirfayeeseek, lama ma tsataar. Daxta gadaádá' taa tléhh na ooang dir'eéní ale. Nee ma gaa lu/aar tam ar wák dir'eene.»

²⁰ Akani iri oó', «Ar ló' án AAKOÓ MUNGÚ, Munguú Israeli, ugwa sadakuús, nee gadaádá' aníng naa tleéhh a tí:

²¹ Tlawuuko wák oo hhoohhoó', oo Shinárír daáhh una ár baraá tla/ángw haasaáng wa ale, nee muqslír /awaak ar ta tlehhahhiti ar peésa ar har afiqoomoó kílo tsár, nee hhartá niina ar taa tleéhh ar sahaábu, iilooeemaawós a har afiqoomár tlaqtá kílo, muruuwí nguri waatlakweés, nguri ar tláw, nguri luú/ baraá guruú xaftaeé', nguri yaamií foól, slám peésa i baraá guruudií dirí'.»

²² Aluuwo Yoshua ya/abuuse gari ya/aáw, nay tlayé' baraá heémár Akani, naxés muruudaádá' kwaa luú/ baraá guruú heémár Akani, peésa i guruú baraá hát.

²³ Inooín xosluudá' ngay duuxiyé' baraá heémár Akani wa alé, ngiri huwiyé' amór Yoshua nee múk Israeli sleémeero. Xosluudá' kiri qaás dír geeraá AAKOÓ MUNGÚ.

²⁴ Aluuwo Yoshua nee múk Israeli sleémeero Akani garmoó Sera nguri oohiyé', nee muqslaadá' /awak ar ta peésár ar tlehhahhiti, nee tlawuudá', nee sahaábu, nee na/iiwós awa daaqaay nee awa dasuuwo nee hikwaawose, nee bee/aangose, nee daqwayeerose, nee heémarose, nee umuúqo gaarós tidá' i kona, kiri huúw baraá xatstá Akori.

²⁵ Yoshua iri oó', «Xáy, asma milá, kuúng gár slahh'amu ngusa húp baraá tla/angwréní alé? AAKOÓ MUNGÚ slahh'amu ngu dirók i huuw laarí.» Akani kuri tlaquút ar tlaa/e nee múk Israeli sleémeero, kuri gaás. Múk do'ós sleeme kuri tlaquút ar tlaa/e, kuri tsuú/ nee kuri daá/ ar asla.

²⁶ Inooín ufuú tlaa/e ngway gawaawósií burumburiyé'. Ufuduú tlaa/e i deer tam ay laarí. Aluuwo AAKOÓ MUNGÚ mune gay guú/. Nee didaádá' kari báy xatstá Akori tam ay laarí.