YOSHUA 6 - Biblía Axweesantá Hhohho' ar Mungú 2004

Huu'umaá gixsár Yeriko

¹ Afkú gixsár Yeriko kuna tseék nee kuri xún asma múk Israeli kuwa tsee/ií ilaa/i. Tam heé ti'inángw tsee/a gwaa aleeslay i kaahh tumu wák, laqaá heé dahma gaa aleeslay i kaahh.

² AAKOÓ MUNGÚ Yoshua guri báy, «Aníng gixsár Yeriko ngi gawaá dabaawók i qaás, nee waawutmoowós nee slaqwaruuseerós sleémeerowo.

³ Kuúng nee slaqwaruuseerók gixsár Yeriko harweeraak wai wak umuú baalaaro, adoorí tleehhaak deelo lahhooe.

⁴ Kaahamuusér Mungú ar faanqw ar tarumbeétadaá faánqw koom awa taa tleéhh ar xareemaá gwaandaawe, i geeraá sandakmoó alqadór wa hi'it. Bál faanqwe kuungá' sleémeero gixsár Yeriko hi'iitano tir harwede' sagaáwa faanqw. Kaahamuusér Mungú i geeraá sandakmoó alqadór wa hi'it, nee tarumbeéta ngi ufhhane'.

⁵ Qoomár kaahamuusér Mungú tarumbeéta binga ufáhh ar afór ur, kuungá' sleémeero bar aga axasé', ta tseá' ar afór ur, daqaní koo/ír Yeriko iqo hú', umuúqo heewo didií dirii'i i geerií hi'iiti, gixsa ngi i haratlay.»

⁶ Naagáy Yoshua garmoó Nuni kaahamuusér Mungú gari ateét nee giri báy, «Sandakmoó alqadór AAKOÓ MUNGÚ taatahhaak, nee kaahamuusér faanqw baraá tla/angwhunge tarumbeétadaá taa tleéhh ar xareemaá gwaandaawe ngi gagat, nee ta geeraá sandakmoó alqadór Aakoó Mungú wa hi'iiti.»

⁷ Inós muu sleémeero guri báy, «Tlawsé' geera wa hi'iitaak, gixsa harweeraak, mukduú xooslaá slaqwarár koóm i geeraá sandakmoó alqadór AAKOÓ MUNGÚ wa hi'iiti.»

⁸ Yoshua muu nguwa sangw ádbáy, kaahamuusér Mungú ar faanqw tidá' tarumbeétadaá faánqw koom awa taa tleéhh ar xareemaá gwaandaawe, geeraá AAKOÓ MUNGÚ ngin wa tlayé', i tarumbeetaduuín ufahhaná', nee sandakmoó alqadór AAKOÓ MUNGÚ ku aluuín wa loohiis.

⁹ Kaahamuusér Mungú tidá' tarumbeétadaá ufahhaam kana geerahaár nee slaqwaruuse, nee xuumuuse bahh'ale i alaá sandakmoó alqadór wa hi'ít nee tarumbeetadu kiri alkomkaakón ufahhaango.

¹⁰ Ala Yoshua mukós guri báy, «Ma tseeara', aforhúng makawa axaás, tam /aymu mu ooara', ay baalár aníng kaangw ngway oo', daqaní ta tseá'.»

¹¹ Naagáy Yoshua muu guri adoodá' laáq gixsa kawa harweeri ki/ima wak umuú baalaaro taqo sandakmoó alqadór AAKOÓ MUNGÚ kón, xweeraawo tari kii/ baraá xafay'ín.

¹² Aluuwo Yoshua iri matlaatlér boó/ tláy, inós nee kaahamuusér Mungú sandakmouduú alqadór AAKOÓ MUNGÚ nguri taatahhiyé'.

¹³ Kaahamuuseedár Mungú ar faanqw ar tarumbeétadaá faánqw loohiis, awa taa tleéhh ar xareemaá gwaandaawe, ina geeraá sandakmoó alqadór AAKOÓ MUNGÚ wa hi'ít ta hara tarumbeétadaá ufhhán. Slaqwaruuse i geeraá kaahamuuseedá' wa hi'ít. Xuumuusér hatlá' ta alaá sandakmoó alqadór AAKOÓ MUNGÚ wa hi'iit. Qoomaarihe tarumbeetadu ki alkón ufhhaango.

¹⁴ Bál tsare gixsa sleeme ngina harweeriyé' ki/ima wak, nee nay ki/iyé' baraá xafay'ín. Inooín adoorí ngina tleehhiyé' deelo lahhooe.

¹⁵ Bál faanqwe inooín nina tlayé' matlaatlér boo/e gixsa ngiri harweeriyé' adoodár /iisír alé. Ala baalaadae gixsa ngina harweeriyé' sagaáwa faanqw.

¹⁶ Harweermór faanqw kawa hhe'eés, qoomár kaahamuusér Mungú tarumbeetadu ngiwa ufáhh, Yoshua mukós guri báy, «Tsee'é'! Asma AAKOÓ MUNGÚ gixsarí nga dirhúngí haniís.»

¹⁷ Gixsa nee umuúqo gár baraadií diriia naasuwaak tawa ilahhooár taa haniís dír AAKOÓ MUNGÚ. Aqo har Rahabudár tsaatuso'o kilós na meetisaak, nee múk do'ose, asma inós mukdá' taa qawti ya/awaán guna lú/.

¹⁸ Ala kuungá' ti harmagahhe', gaa ló' ma baloó taatahhara' baraá muruudá' ta hhitina, as kahhó' xafoó Israeli kuwa hhitinká.

¹⁹ Ala peésa sleémeero nee sahaábuwo nee xooslaá taa tleéhh ar muqslár da/aten nee awa muqslaro a xooslaá taa paraátl as Aakoó Mungú, adoorihe kin qaas baraá qaasír AAKOÓ MUNGÚ.

²⁰ Naagáy muu iri tseé', tarumbeetadu kiwa ufaáhh. Muu afór tarumbeetadu kawa axaás, tari ak tseé' ar afór ur, nee koo/i iri huhu'uún, muu iri dáh baraá gixsa umuú heewo ar didií sihhiít, inooín gixsa ngiri hayoohiyé'.

²¹ Umuúqo gaaro baraá gixsaro kana hhaamiís, hhaawaate nee /ameenaaro, tam masoomba nee bariiseero, hikwa nee bee/aangw nee daqwaayeero, sleémeero kina tsuú/ ar paánga.

²² Yoshua mukdá' tsár aáng taa ya/aáw as yaamu kiwa tsawtsawuusi, guri báy, «Tlawsé' baraá doó Rahabudár tsaatuso'o, /ameenisíng tsee/ií duuxare' nee umuúqo gaarose ar adoodá' kara al'axwesé' nee inós.»

²³ Masoombadár tsawtsawuuse iri dát baraá do'dá', Rahabu kari tsee/ií duúx nee baabuúwose nee aayoorose nee hhaeewose nee mar'eefowose, kiri huúw ay dír tsee/aá xaftá múk Israeli.

²⁴ Aluuwo umuúqo gár baraá gixsadá' i diriia kari daá/ ar asla, ala gár taa da/iiká a peésa nee sahaábu, nee xooslaá taa tleéhh ar muqslír daa/aat nee muqsla. Xosluuká' kiri qaás baraá qaasír doó AAKOÓ MUNGÚ.

²⁵ Rahabu tidár tsaatuso'o nee mar'eefoowós sleémeero Yoshua gina slafíngwí máy. Rahabu ina hót tla/ángw múk Israeli wa ale tam ay laarí, asma inós mukdaádá' Yoshua aa qawti ya/aáw as gixsár Yeriko ngiwa tsawtsawuusiya', guna lú/ baraá do'ós i alé.

²⁶ Yoshua lo'oorí gari dír geeraá múk wa huúw, iri oó', «Hee bar gixsár Yeriko gaa malé tleéhh, inós ku lu'usi nee AAKOÓ MUNGÚ. Heé iihhafiiri gaa iiar qaasaro aqo na/aywós oo baris kun gaas, nee umuúqo heé afér gixsa gaa tleehh aqo garmaawós oo alutmo kun gaas.»

²⁷ Naagáy AAKOÓ MUNGÚ a dinkwa nee Yoshua baraá umuúqo gaaro ar aa tleehhi, nee xirfuú Yoshua sleeme kuri axaás nee muu sleémeero.