YOSHUA 5 - Biblía Axweesantá Hhohho' ar Mungú 2004

¹ Waawitá sleémeero oo Amori, kuduú gayuú /uwií dirií' yaaér Yordaniro, nee waawitá sleémeero oo Kana'ani, kuduú afaá tlawtá Mediteraneár i tseéw, ngiwa axaasiyé' adoodá' AAKOÓ MUNGÚ Yordani ngira kahaás ay qoomár múk Israeli iwa waaraáhh, inooín gur'er'ín ma'aay ngay dalaa/iyé', nee migti'ín iri fák as múk Israeli.

Múk Israeli kuwa dír Gilgalír wa al/utlín

² Aluuwo AAKOÓ MUNGÚ Yoshua guri báy, «Tsiingáruú tlaa/e tleehheek, nee múk Israeli kudá' taa al/utliiká al/utleek.»

³ Gawaá adoorihe Yoshua tsiingáruú tlaa/e guri tleéhh, inós múk Israeli guri al/utlín baraá yaamaá Gibea-ha'aralotír wa ale.

⁴ Yoshua mukwí gár ngusa al/utlór áy a tí: Hhawaate sleémeero kudá' naa baraá Misrír wa ti'iitiye', kudá' afiqoomár slaqwara nga aye', nina qatliyé' baraá xaanxaay, alaá niwa ti'iitiyé' baraá Misrír wa ale.

⁵ Mukdá' sleémeero naa baraá yaamaá Misrír wa ti'iit kwaa qaroó al/utlín. Ala mukdá' sleémeero taa laqwaál baraá xaanxáy ale, alaá tindiwa ti'iít baraá Misriro, kwaa al/utlinká.

⁶ Asma xoorór Israeli ina baraá xaanxáy wa harweerariín kureeri mibeeri tsiyáhh, ay qoomár hhawaate sleémeero awa afiqoomár slaqwara ngaa aye', kudá' naa baraá yaamaá Misrír wa ti'iitiye' niwa hhané', as afór AAKOÓ MUNGÚ ngiwa iialooeesi'iiká. Asma AAKOÓ MUNGÚ lo'o gana /aáy daanduuine ar yaamuudá' aa dír baabi'ii'íní al'axweés, kudaá diihhooár ilwa nee dane, daxta ngiwa sangw baloó ariiaaká.

⁷ Daaqoó mukwí na baraá Misrír wa ti'iit AAKOÓ MUNGÚ guna ureemiís kitángw baabi'ii'ín wa alé, mukwí an kudá' Yoshua aa al/utlín, asma baraá xaanxaywo kwaa al/utlinká.

⁸ Hhawaataá Israeli sleémeero al/utlooro kiwa hhe'eés, tari meét dír xafay'ín i alé, ay qoomár niwa hungu/uma hhe'eesiyé'.

⁹ AAKOÓ MUNGÚ Yoshua guri báy, «Daxta mureewaslayduú kuungá' tawa lawalér múk Misri laarí ugwa hingeés dirhunge.» Gawaá adoorihe didá' kari báy Gilgali tam ay laarí.

¹⁰ Qoomár múk Israeli xafay'ín nguwa tleehhiyé' amór Gilgali dír xatstá bihhaá Yeriko, deelór Pasaáka ngay tleehhiyé' tsiindoowo bál slahhaangw tawa mibaá nee tsiyáhh.

¹¹ Looaytleérós alaá deeloodár Pasaákuwo balángw yaamuudá' ngway /ayiyé'. Kooko nguna pu/áy tleehhiyé', nee oo hatlá' ngway tleehhiyé' ar mikaátér taa sluuftisiiká.

¹² Baalaadár kilae muruú /aymaadá' ta /aa/ayi ta bay maána iri alhhe'eesuút. Iimír baalaadae Mungú maána gaa malé hanisiiká. Inooín gár taa /aáy a balángw kurkudae taa doósl baraá yaamaá Kana'anír wa ale.

Yoshua nee heé símér koóm

¹³ Looarka wake Yoshua iiwa isaapoó gixsár Yeriko, Yoshua heé símér koóm gway ár i geeraawós wa sihhmiit. Yoshua iri amoorós i hi'iít guri báy, «Xáy, kuúng a bartá slaqwaruusér ayaaréne laqaá bartá wakaruuseerén?»

¹⁴ Heedaádá' iri oó', «Aasla'áy, án bartá naa áw i káhh, aníng a diirí dirií', asma aníng a geeraharusmooduú malaykér AAKOÓ MUNGÚ.» Yoshua iri tumbarara'aát, giti gari yaamúr óh as ilaiwa/ame, iri oó', «Aakooeé', aníng a sagadiyusmoowók, gár kuúng ta sla' ar ni tleehh a milá?»

¹⁵ Geraharusmooduú malaykér AAKOÓ MUNGÚ Yoshua guri báy, «Ya/ataawók duuxeek, asma diisíng ti sihhít a dír hhoohhoo'.» Yoshua adoodá' kwa báy gari tleéhh.