YOSHUA 4 - Biblía Axweesantá Hhohho' ar Mungú 2004

Tlaa/aá inslaslaangw kiwa siíhh

¹ Qoomár xoorór Israeli sleémeero yaaér Yordani ngiwa waaráhh, AAKOÓ MUNGÚ Yoshua guri báy,

² «Hhawaataá mibaá nee tsár tsawaareek, umuú tlahhaywo hee wak.

³ Daqaní hhawaateedá' ki beer, umuúqo heewo tlaa/ano ngu taataahhi dír tla/ángw yaaér Yordanír wa ale, didár kilár ya'aá kaahamuuse i dirii'iya'. Ki hubá' ay didá' kuungá' tay qatuú eera' xweeraawo.»

⁴ Aluuwo Yoshua mukduú mibaá nee tsár aa tsawaár guri dinkwár i ateét, umuúqo tlahhaywo hee wak,

⁵ guri báy, «Tlawsé', geeraá sandakmoó alqadór AAKOÓ MUNGÚ, Munguúhúng, i waaraahhaak, ay baraá yaaér Yordani. Umuúqo heewo dirhunge tlaa/anoó wák ngu taataahhi daanduú umuúqo tlahhoó Israeli wá ale, ngu gawaá suumarós i qaasi.

⁶ As kahhó' tlaa/eeká' niwa laya tleehhitiya' dír múk Israeliwo nee dír na/ii'ine de'emaá hi'iita'a, barnaxes nu yaahamiisiyá' iwa kaahiya', ‹Tlaa/eeká' awa adoomá?›

⁷ Kuungá' ki beera', ‹Sandakmooduú alqadór AAKOÓ MUNGÚ kuwa waarahhamisi yaaér Yordaniro, ma'aá yaaér Yordani nina tla/a qasiitiyé'.› As adoorí tlaa/eeká' an inslaslángw tlehhmuuwí dír xoorór Israeliwo ay kureeraá kureér.»

⁸ Mukdaádá' adoodá' AAKOÓ MUNGÚ Yoshua ngwaa báy kari tleéhh, inooín tlaa/aá mibaá nee tsár ngina taataahhiyé', ngiri gagaariyé' dír tla/ángw yaaér Yordani wa ale, umuú tlaa/anowo as daanduú tlahhoó Israeli. Tlaa/eedá' kina gagaár ay didá' tay qatuú ay, ngiri didií qaasiyé'.

⁹ Yoshua tlaa/aá mibaá nee tsár giri qaás baraá tla/ángw yaaér Yordani, didá' kaahamuuseedá' sandakmoó alqadór loohiis iwa sihhmit. Tlaa/eedá' i dayá' tam ay laarí.

¹⁰ Kaahamuuseedár Mungú sandakmoó alqadór loohiis ina sihhmaamít baraá tla/ángw yaaér Yordani wa ale. Tana sihhmaamiít ay qoomár umuú gaaro iwa hhooeér, tidá' AAKOÓ MUNGÚ aa hara'ayín dír Yoshua, as ngiwa hara'ayin dír muu, ar adór muruudá' sleémeero Mose aa hara'ayín dír Yoshua. Muu iri waaraáhh ar gaanslaay.

¹¹ Qoomár sleémeero tawa gayuú hatlá' i waaraáhh, kahaamuuseedá' sandakmoó alqadór AAKOÓ MUNGÚ loohiis iri geeraá múk wa hi'ít.

¹² Hhawaataá tlahhoó Reubeni nee awa Gadi nee tlaqtá tlahhoó Manase tina amohhe'eesiyé' slaqwaraaro, niri geerií waaraahhiyé' dír muu sleémeero, inooín adoodá' Mose ngaa báy ngiri tleehhiyé'.

¹³ Mukdaádá' xooslár slaqwarár koóm a kume mibeeri tsiyáhh, niri geeraá AAKOÓ MUNGÚ ar waaraahhiyé' ay baraá xatstá iisaapoó Yeriko, taa amohhe'eesiyé' slaqwaraaro.

¹⁴ Baalaadae AAKOÓ MUNGÚ Yoshua guri xirfayeés dír xoorór Israeli sleémeerowo, inooín Yoshua nguri ilaiwawa/iyé' adoodá' Mose ngura ilaiwawa/iyé' baraá slafiingós sleémeero.

¹⁵ Aluuwo AAKOÓ MUNGÚ Yoshua guri báy,

¹⁶ «Kaahamuuseedaádá' sandakmoó alqadór loohiis, baraá yaaér Yordani ngi geexeer.»

¹⁷ Yoshua giri báy, «Qwalaasé' baraá yaaér Yordani geexawaare'.»

¹⁸ Kaahamuuseedá' sandakmoó alqadór AAKOÓ MUNGÚ loohiis niwa ti'ít baraá tla/ángw yaaér Yordaniro, gangeefír yaae ngiwa kalaa/iyé', ma'aá yaaér Yordani niri wa/iyé' niri hatsiyé' adoodár geera i dirii'iya'.

¹⁹ Slahhángw geera bál tawa mibaangw, muu yaaér Yordani gana waaraáhh, xafay'ín ngway tleehhiyé' yaamaá Gilgali, bihhaá da/aáw awa Yeriko.

²⁰ Yoshua tlaa/eedaá mibaá nee tsár tinda Yordanír wa huúw giri sihhtís baraá Gilgali.

²¹ Yoshua xoorór Israeli gari báy, «Baalarkaaro na/iihúng burna yaahasiyé', iwa kaahiya', ‹Tlaa/eeká' awa milá?›

²² Daqaní ki beera', ‹Tlaa/eeká' atén ti inslawtimisiyá' daanduú bál xoorór Israeli yaaér Yordani ngiwa waaráhh ar yaamaá kaahaar.›

²³ Asma AAKOÓ MUNGÚ, Munguúhúng, ma'aá yaaér Yordani gina kahaás as kuungá', ay qoomár kuungá' tawa waarahhé', ar adoodá' aa tleéhh dirén, qoomár tlawtá Shamu ngiwa kahaás, ay qoomár atén tawa waarahhaán.

²⁴ As kahhó' xoordu sleémeero awa baraakaá yaamu ngiwa tsaahhiya' adór dákw AAKOÓ MUNGÚ ir /uuruú kón, nee as kahhó' kuungá' AAKOÓ MUNGÚ, Munguúhúng, kuwa ilaiwawa/a' ay kureeraá kureér.»