YOSHUA 3 - Biblía Axweesantá Hhohho' ar Mungú 2004

Múk Israeli yaaér Yordani kawa waaraáhh

¹ Looaytleérós matlaatlér boo/e Yoshua nee múk Israeli sleémeero, tana dír xaa'aá ta bay Shitiímúr wá tláy, nari hardihiyé' ay afaá yaaér Yordani, nari didií deelo tlaatla/iitiyé' dír nira waaraahhii'iiká.

² Alaá deelo tám iwa waaráhh geeraharuuse iri tleér, iri afér xafoó múk ar waaráhh.

³ Muu ngway bayé', «Kuungá' bara aandé' kaahamuusér Mungú ar tlahhoó Laáwi i sandakmoó alqadór AAKOÓ MUNGÚ Munguúhúng loohisiyá', daqaní kuungá' kitaangw ku gasá', ta aluuín wa tleerá'.

⁴ Asma adoorí an adór kuungá' loohi kar tsahha', asma loohirí aga ar baloó oti'iiká. Ala gár wake ma tseewuwaara' dír sandakmoduú hara'ayár koóm, ala kuungá' masók aluuine tundu saáw har afiqoomoó miíta tsiire gwaleél.»

⁵ Yoshua muu guri báy, «Gimsé' ti kiloohúng hhoohhoese', asma matlo AAKOÓ MUNGÚ muruú waa/oo/amo gu tleehh baraá tla/angwhúng wa ale.»

⁶ Aluuwo Yoshua kaahamuusér Mungú gari báy, «Sandakmooduú alqadór AAKOÓ MUNGÚ ga koóm gawaá sum'iihúng i qaasaak, nee geeraá muu na wa hi'iimitaak.» Inooín adoodá' Yoshua ngaa báy ngiri tleehhiyé'.

⁷ AAKOÓ MUNGÚ Yoshua guna báy, «Laarí u iimu/uúm xirfayeesaro dír geeraá xoorór Israeli sleémeeró wá ale, as kahhó' muu ngiwa xui adór aníng tar dinkwa nee kuúng, ar adoodá' aníng nee Mose tara dinku'uusaán.

⁸ Kuúng kaahamuuseedá' sandakmoó alqadór loohiis, ki ádbeer as qoomár bar taa hardáh afaá ma'aá yaaér Yordani tawa sihhiiti.»

⁹ Aluuwo Yoshua múk Israeli guri ateét, guri báy, «Qwalaas tseewuwaaré', axweesantá AAKOÓ MUNGÚ, Munguúhúng, i kaahi iiárií qaasaak.»

¹⁰ Yoshua iri oó', «Daxta a tsahhá' adór Munguú slaáf ir baraá tla/angwhúng i dirií', nee mukwí gu baloó mayká hingeesaro dír geerahunge: Múk Kana'ani, nee múk Hiti, nee múk Hifi, nee múk Perisi, nee múk Girgashi, nee múk Amori, nee múk Yebusi.

¹¹ Qaytsité' sandakmooduú alqadór Aakoó yaamu sleémeero in geerahúngií waaraahh ay baraá yaaér Yordani.

¹² Gimsé' daxta, múk mibaá nee tsár, baraá tlahh'aá Israelír wa tsawaarare', umuúqo tlahhaywo hee wak.

¹³ Nee qoomár ya'aá kaahamuusér Mungú, tidá' sandakmoó alqadór AAKOÓ MUNGÚ, Aakoó yaamu sleémeero loohiis, ma'aá yaaér Yordani birnga kalaa/iyé', ma'aá yaaér Yordani nin tla/a qasiitiyá', kudá' gáwtá wa wa/amiimá' nin sihhiitiyá', wa/amiingw ngun mayá', sleeme nin burumburitiyá' dír wák adór ufa.»

¹⁴ Muu iri tláy baraá xafay'ín wa ale as yaaér Yordani kawa waaraahhi, nee kaahamuuseedá' sandakmoó alqadór loohiis iri geeraá múk wa tleér.

¹⁵ Qoomaarí an qoomár bu'uungw, nee qoomaarír bu'uungo yaaér Yordani in hatsatsiín ay afaá tsee/a. Qoomár kaahamuuseedá' sandakmoó alqadór loohiis iwa hardát baraá yaaér Yordani, nee ya'aaín ma'aay ngiwa kwatitiyé',

¹⁶ ma'aydá' gáwtá wa wa/amiimá' niri sihhiitiyé' adór ufa, niri saweesiyé' ay amór yaamaá Adam, iisaapoó gixsár Saretani. Qoomár yaae wa/amíngw amór Tlawtá Diwi nguwa meér, muu iri waaraáhh gayuú Yeriko.

¹⁷ Qoomár kaahamuuseedá' sandakmoó alqadór AAKOÓ MUNGÚ gu loohiis iwa sihhít baraá ma'aáy, ma'aá didá' niri /oné', inooín nina didá' wa sihhmamitiyé' ay qoomár muu sleémeero iwa faakiís warahhuuwo ar baraá yaamaá kaahaar.