YOSHUA 24 - Biblía Axweesantá Hhohho' ar Mungú 2004

Yoshua muu nguwa baraá Shekemúr wa ii axweés

¹ Aluudae Yoshua xoorór Israeli gari ateét baraá yaamaá Shekémúrí ale, dinkwa nee bariiser'ine nee geeraharuuser'ine nee har'ohuuser'ine nee múk urén oo Israeliwo. Nari hardihiyé' dír geeraá Mungú.

² Yoshua muu sleémeero guri báy, «AAKOÓ MUNGÚ, Munguú Israeli, i kaahi, ‹Aáng baabi'iihúng, Tera, baabuú Abrahamu, nee Nahori afaá yaaér Eufrate ngina hotaatiné'. Inooín munguaá hatlá' ngiri sagadiyuusiyé'.

³ Aníng baabuúhúng Abrahamu nguri ar tláw afaá yaaeedá' wa ale, nguri geerahaár baraá yaamu sleémeero awa Kana'ani, nguri xwaylár yaariírií haniís. Nguri Isakawí haniís.

⁴ Isaka nguri Yakobo nee Esauwí haniís. Esau nguri tlom'aá yaamaá Seirírí haniís tawa aalirós. Ala Yakobo nee na/iiwós nina /eetiyé' Misri.

⁵ Aluuwo aníng Mose nee Aroni ngiri ya/aáw, yaamaá Misri ngiri muúx ar tlehhmi'iidá' naa tleéhh baraá ayaadá' wa ale, kuungá' nuri duúx baraadá' wa ale.

⁶ Baabi'iihúng ngiri baraá Mísrír wa duúx, tari hardaté' afaá tlawtá Shamu. Aluuwo xoorór Misri xwaylitérhúng ngiri aluú wa gús. Múk farsuú i tsa/aa/ám kuri ya/aáw nee gaarduuín awa muqsla ay afaá tlawtá Shamu.

⁷ Xoorór Israeli niwa amór AAKOÓ MUNGÚ wí /aa/ír, aníng giwti ngari tla/angwhúngí qaás nee múk Misri, ma'aá tlawi ngiri gawaaíní xoptís. Kuungá' ilahunge muruudá' naa tlehhiít ugwa aandé'.› «Aluuwo kureeraá yaariire tari baraá xaanxáy wa hoté'.

⁸ Aluuwo nuri huúw ay baraá yaamaá múk Amori, kudá' gayuú da/aáw oo yaaér Yordanír hoót. Inooín nina slaqwarár ayé' amorhúng. Aníng ngiri gawaá dabaahúngií qaás, ngiri hhaamiís. Kuungá' yaamuuín kiri hayoté'.

⁹ Aluuwo Balaki garmoó Sipori, waawutmoó xoorór Moabu, niri slaqwarár áy amór xoorór Israeli. Inós Bala'amu garmoó Beori guri ateét as kuungá' nuwa lu'usi.

¹⁰ Ala aníng firór Bala'amu ana sií', inós kuungá' nuri tsuúq. Gawaá adoorihe aníng kuungá' nuri baraá dabaá Balaki wa tuú/.

¹¹ Aluuwo yaaér Yordani kari waarahhé', tari hardaté' Yerikórí ale. Múk Yeriko nari slaqwarár áy amorhúng. Tina alkoné' nee xoorór Amori, nee ar Perisi, nee ar Kana'ani, nee ar Hiti, nee ar Girgashi, nee ar Hifi, nee ar Yebusiro. Aníng xoorduuká' ngiri gawaá dabaahúngií qaás.

¹² Aníng xoorduudá' ngiri diwílí tleés, waawituú tsár oo xoorór Amori nguri tlatlahhaás ar diwíl, ala a ar paangaduhungeeká, laqaá ar ga/alduuhungeeká.

¹³ «Yaamaá tawo ina sleeré' awa ta hamér wa xintsi'iiká nee gixsadaá taa tlehhi'iiká ina i daté', nee mamaá sabibuú taa dosli'iiká ina /agé', nee awa seituúniro.

¹⁴ «Gimsé', AAKOÓ MUNGÚ ilaiwawa/aak nee sagadiyusaak ar muunuú /awaák nee ar inkihhimu. Munguiidá' baabi'iihúng naa sagadiyusiyé' gayuú yaaér Eufrátér wa ale, nee baraá yaamaá Misriro, amoosíngí kwahhaak, daqaní AAKOÓ MUNGÚ ku sagadiyusá'.

¹⁵ Barnaxes kuungá' AAKOÓ MUNGÚ kuwa sagadiyusa' a sla'a'aaká, gimsé', tsawdimé' laarí munguaá ta sagadiyusa' slawaak. Bar awa ta sla'a' an kudá' baabi'iihúng naa sagadiyusiyé' afaá yaaér Eufrátér wa ale, laqaá bar awa ta sla'a' an kudá' múk Amori ni sagadiyusiya', mukdá' ayaaín hamí ta hota', tlawsé'. Ala aníng nee múk dooeé' sleémeero AAKOÓ MUNGÚ un sagadiyusaán.»

¹⁶ Muu sleémeero tari oó', «Tisíng i amoosií pa/, atén mitiwa sleér, ar atén AAKOÓ MUNGÚ nguwa geexawaan sagadiyeede, nari munguaá hatlá' sagadiyér awaán.

¹⁷ Asma AAKOÓ MUNGÚ, Munguúrén, inós an kudá' atén nee baabi'iirene taa duux baraá yaamaá Misrír wa ale, yaamaá lawaali'iima kawa /ayaán. Slám laydaá uren awa waa/oo/amór koomá' gina tleéhh dír ilaarén wa ale. Inós tari deaaén baraá lohduudá' sleémeero nira ohiimani, nee baraá tla/eeraá xoorduudá' sleémeero nira waraahhani.

¹⁸ Nee slám AAKOÓ MUNGÚ xoorduudá' sleémeero gina geeraarén wa tlatlahhaás, ín xoorór Amori, kudá' baraá yaamuuká' ngaa hootiye'. Gawaá adoorihe atén sleeme AAKOÓ MUNGÚ un sagadiyusaán, asma inós an Munguúrén.»

¹⁹ Ala Yoshua mukdá' guri báy, «Kuungá' AAKOÓ MUNGÚ sagadiyede u asleera'aaká, asma inós a Munguú hhoohhoó'. Slám a Munguú da/itá koóm, nee inós tlakweemaahúng nee dakumisuhunge gi gurtlayká.

²⁰ Kuungá' barnaxes AAKOÓ MUNGÚ ugwa gunqaaresé', munguaá /eetuuse kiri sagadiyusé', inós aqo nun al warqáy, nuri slahh'eemiis, nuri xooro qwaarees kitangw nuwa hhooeemáy tlehhahhiít.»

²¹ Ala inooín Yoshua nguri bayé', «Aasla'áy no. Atén aqo AAKOÓ MUNGÚ un sagadiyusaán.»

²² Yoshua mukdá' guri báy, «Kuungá' a lamabu'uuse daandemoohunge adór tara tsawdiindé' AAKOÓ MUNGÚ kuwa sagadiyusa'.» Inooín nguri bayé', «Kahhoo', atén a lamabu'uuse daandemoorene.»

²³ Yoshua giri báy, «Gimsé', munguidaá /eetuuse amoosií kwahhaak, kudá' baraá tla/eerihúngií diriiá', daqaní faakisé' baraá munerhunge amór AAKOÓ MUNGÚ, Munguú Israeli.»

²⁴ Mukdá' Yoshua nguri bayé', «Atén AAKOÓ MUNGÚ Munguúrén un sagadiyusaán, nee hara'ayaarós an iialooeemisaán.»

²⁵ Gawaá adoorihe Yoshua alqadu giri oó' dír xoorór Israeli baalaadae, axweesantós nee kaahirose giri dír xoorór Israelírí oó' baraá Shekemúr wa ale.

²⁶ Yoshua axweesanaydá' sleémeero guri gooín baraá kitaábuú dabér Mungú, tlaa/ár yaangaariir gari sláy, gari foól bihhaá xa'anoó ta/eewi didá' heémár AAKOÓ MUNGÚ i diri'.

²⁷ Yoshua xoorór Israeli gari báy, «Ga/aawaagáy, tlaa/arí aa lamabu'uso'o tleehhít daandemoorene, asma axweesantadá' AAKOÓ MUNGÚ naa diréní aaín inós gaa axamís. Gawaá adoorihe, bar kuungá' Munguúhúng ugwa satlaké', tlaa/arí i lamabu'uún daanduuhunge, as kahhó' Munguúhúng mu satlaankara'.»

²⁸ Yoshua muu guri pa/ángwií haniís tawa watli amór maray'ín.

Gwa'arár Yoshua nee ar Eleasari

²⁹ Alaá kaangwihe Yoshua garmoó Nuni sagadiyusmoó AAKOÓ MUNGÚ iri gwaá', kureeri ngaa /aáy a tsiiruú wák nee mibaangw.

³⁰ Kuri foól baraá yaamuudaá aalirós awa ta babay Timnat-sera, tidá' alaá tlom'aá yaamaá Efraimúrí dirii', bihhaá /iya awa tloomár Ga'ashi.

³¹ Xoorór Israeli AAKOÓ MUNGÚ guri sagadiyús de'emadá' sleémeero Yoshua iwa slafi, tam alaá iwa gwaá' nari kumiitiyé' nguwa sagadiyuusiya' de'emaá bariise iwa kumit, tidá' tlehhmaá'a AAKOÓ MUNGÚ aa tlehhaahhiít dír xoorór Israeli gaa ar'aa'aan ilaaine.

³² Fadaá slaqwtá Yosefu, kudá' aáng tinda huúw nee xoorór Israeli iimír yaamaá Misrír wa ale, kiri foól yaamaá Shekemu, dír yaamuudá' Yakobo aa tlaáxw dír daaqoó Hamórí wa ale baabuú Shekemu, ar parhheemaá muqslír peésa awa tsiiruú wák. Yaamuuká' aluuwo tari aalír xwaylár Yosefu.

³³ Aluuwo tam Eleasari garmoó Aroni sleeme iri gwaá'. Kuri foól baraá gixsár Gibea, tidá' taa garmaawós Finehasí haniís. Gixsarí i baraá tlom'aá yaamaá Efraímúrí dirí'.