YOSHUA 23 - Biblía Axweesantá Hhohho' ar Mungú 2004

Alqadaá Yoshua dír múk Israeli

¹ Alaá qoomár tleere AAKOÓ MUNGÚ xoorór Israeli gari waydií haniís, slaqwarár nee wakuuser'ín iri fák badu sleémeero, qoomaarihe Yoshua a aakoó kureeraá yaariir gaa /aay.

² Yoshua múk Israeli sleémeero guri dinkwárí ateét, bariiser'ín nee geeraharuuseero nee har'ohuuseero nee múk urene, giri báy, «Hám daxta aníng a aakoó aa ló'wa din,

³ kuungá' tlehhmi'iidá' sleémeero AAKOÓ MUNGÚ aa tlehhaahhiít as kuungá' dír xoordudá' baraá yaamuuká' hootá' iga aandé'. Asma AAKOÓ MUNGÚ, Munguúhúng, kuungá' nuna aleeslaáqw.

⁴ Ga/aawaak, aníng yaamu sleémeero awa xoorduudá' naa meetiye' nee kudá' naa tlatlahhaasani nga dirhúngií ka'amaamiís iimír yaaér Yordanír wa tleemu ay Tlawtá Tla/aangw bihhaá /uwaawo.

⁵ AAKOÓ MUNGÚ, Munguúhúng, xoorduuká' naa meetiye' giqo tlatlahhaas ar /uuru geeraahúng wa alé, giri guus dír ilahunge. Kuungá' yaamuuín kiri alá' ar adoodá' AAKOÓ MUNGÚ, Munguúhúng, ngira al'axweés.

⁶ Gawaá adoorihe, axweesanaydá' sleémeero taa gooín baraá kitaábuú hara'ayár Mose oohaak, nee tleehhaak ar ilakaahara, ma warqawaara' laqaá ma bihhií paslaara'.

⁷ Kuungá' nee xoorduuká' naa meetiye' ma aldinku'uumisaara', tam muruudá' taa tleéhh hariimár Mungú ló' wa ale, mu sluufmisuú awaara', nee umer'ín ma ateetimaara', laqaá lo'o ma /ayaara' ar umer'ín, laqaá mi sagadiyuusara', nee sleeme mi i tumbarara'amitara'.

⁸ Ala kuungá' AAKOÓ MUNGÚ, Munguúhúng, na alnag'ataak ar adoosír kilá' hamí ta tlehhita'.

⁹ Asma AAKOÓ MUNGÚ xoorduudá' uren nee awa /uureemaá koomá' gina geeraahúng wa tlatlahhaás, nee heé kuungá' naa tlaampa'aas ay laarí i kaahh.

¹⁰ Heé wák baraá tla/angwhunge kumuú xooro gun tlatlahhaas, asma AAKOÓ MUNGÚ Munguúhúng kuungá' nun aleeslaaqw ar adoodá' ngira al'axweés.

¹¹ Gimsé', ti kiloohúng harmagahhe' as AAKOÓ MUNGÚ, Munguúhúng kuwa sla'a'.

¹² Ala barnaxes aga dososoxoté' aaluúwí ale, tari alqaatusé' nee xoorduudá' naa meetiye' baraá tla/angwhúngí ale, tari dir'ín wa duuxuxuundé', inooín nari dirhúng wa duuxuxuné',

¹³ looeemaawo xuaak adór AAKOÓ MUNGÚ, Munguúhúng xoorduusingá' gi sangw alkonká duuxaro baraá yaamuuwoge. Ala xoorduusingá' tari dukutsmoohúng, nee tsaaxweelirhúng, nee tari adór qawoó ta kuungár muxi, nee laqayaá ta ilahúngár mutin, ay dír tay faka' qatlooro baraá yaamuuká' hhooá' awa AAKOÓ MUNGÚ, Munguúhúng naa dirhúngií haniisi.

¹⁴ «Hám daxta gwa'arar'eé' naa naká/, ar adoodá' muu sleémeero kuwa hariím. Ala kuungá' baraá munerhunge nee baraá qeereemohunge a xu'uti hhe'esá', adór muruudá' sleémeero hhó' oo AAKOÓ MUNGÚ, Munguúhúng, naa dirhúngií al'axweesi, tam ar wák ar taa boo/eesiiká i káhh. Muruudá' sleémeero aa boó/ adoodá' AAKOÓ MUNGÚ ngura al'axweés.

¹⁵ Ala adoodá' muruudá' sleémeero oo hhó' AAKOÓ MUNGÚ, Munguúhúng naa dirhúngií al'axweés ira boó/, adoorí an adoodá' sleeme AAKOÓ MUNGÚ muruú tlákw ngur aleesláy gawaahúngií huwto ay dír kuungá' tay hhaanda' baraá yaamuuká' hhooe awa tinda haniís nee AAKOÓ MUNGÚ Munguúhúng.

¹⁶ Kuungá' barnaxes alqadoodá' AAKOÓ MUNGÚ, Munguúhúng naa dirhúngií hara'ayín kawa ota', aga geeqeeré', munguaá hatlá' kiri sagadiyusé', nee kiri i tumbarara'amituú eeré', daqaní AAKOÓ MUNGÚ kuungá' nun i buuhh, kuungá' tari hhaandá' ar wa'aá wák baraá yaamuuká' hhooá' awa naa dirhúngií haniisi.»