YOSHUA 22 - Biblía Axweesantá Hhohho' ar Mungú 2004

Yoshua tlahh'aá da/aáw ngiwa watlís

¹ Yoshua tlahh'aá Reubeni nee Gadiwo nee tlaqtá tlahhoó Manasewo giri ateét.

² Giri báy, «Kuungá' muruudá' Mose, sagadiyusmoó AAKOÓ MUNGÚ, naa báy ugwa qoomesé' nee afor'eé' kuungá' aga iialooesé' baraá tidá' naaqo ooi.

³ Slám hhaeehúng iga tawo meeri'iiká qoomaarí sleémeero ay laarí. Ala hara'ayár AAKOÓ MUNGÚ, Munguúhúng ana eehadé' ar tsáp.

⁴ Nee hamí AAKOÓ MUNGÚ, Munguúhúng hhaeehúng gaa waydií haniís ar adoodá' ngira al'axweés. Gimsé' daxta kuungá', ki/é' baraá yaamuuhúng kudá' Mose sagadiyusmoó AAKOÓ MUNGÚ naa haniís kiwa ala', kudaá gayuú da/aáw yaaér Yordaniro.

⁵ Ala ló'wa ilakaahareesé' hara'ayár AAKOÓ MUNGÚ nee dabeerós kiwa ooha hhe'esa', tidá' Mose sagadiyusmoó AAKOÓ MUNGÚ nuwa hara'ayín iwa káh, ‹AAKOÓ MUNGÚ, Munguúhúng na sla'aak, tidá' i kaahi na tlehhiitaak, hara'ayaarós na oohaak, dirós i naga'ataak, nee sagadiyusaak ar mune sleémeero nee ar qeereemo sleémeero.› »

⁶ Yoshua inooín giri tsuúq, iri ya/án niwa watliya' amór maray'ín.

⁷ Mose tlaqtá tlahhoó Manase gaa qaroó aalírí haniís ar yaamaá Bashani. Nee Yoshua tlaqtadár hatlá' gaa aalírí haniís tla/ángw hhaeeín amór bihhaá /uwa yaaér Yordaniro. Daxta qoomár ngiwa ya/aámár i haniís niwa watliya' amór maray'ín, inós gina tsuúq.

⁸ Giri báy, «Hám a watlá' ar daqaari'iimár yaariir, tidá' naa haasaáng wa hubé' amór wakuuserhúng wa alé. Muruuwí qasmiisaak nee hhaeehúng, hikwa nee peésa nee sahaábu nee muqslár sirdaa/aten nee muqslár hatlá' nee tlabaá yaariire.»

⁹ Naagáy múk tlahh'aá Reubeni nee oo Gadiwo nee tlaqtadár tlahhoó Manasewo tari paraatliyé' nee tlahh'aá hatlá' awa Israeli dír Shílór wa ale baraá Kana'ani. Tari waátl ay ayaaín kudá' Mose aa dir'íní haniís oo Gileadi, tawa aalir'ín ar adoodá' AAKOÓ MUNGÚ Mose ngura hara'ayín.

Kitángw ilahhooa oo taa tleéhh afaá yaaér Yordani

¹⁰ Niwa hardihiyé' afaá yaaér Yordani awa /uwa, kitángw yangaariír oo ilahhooa kawa da/aa/an nguri tleehhiyé' afaá yaaeérií ale.

¹¹ Kaangwí iri hardáh baraá iaá tlahhi'iidaá hatlá' awa xoorór Israeli, adór tlahh'aá Reubeni nee Gadiwo nee tlaqtá tlahhoó Manase kitángw yangaariír oo ilahhooa ngura tleehhiyé' dír digmuú yaamaá Kana'ani afaá yaaér Yordani, gayuú yaamaá múk Israeli.

¹² Kaangwí kuwa axaás, xoorór Israeli iri burumburít Shílórí ale as tawa slaqwarár ay amór tlahhi'iidaá gayuú da/aáw.

¹³ Ala xoorór Israeli Finehasi garmoó kaahamusmoó Mungú Eleasari guri ya/áp ay amór tlahh'aá Reubeni nee Gadiwo nee tlaqtá tlahhoó Manase awa yaamaá Gileadi.

¹⁴ Tari alkoné' nee geeraharuusér mibaangw ar tlahh'aá xoorór Israeli. Umuúqo heewo a heé úr baraá tlahhaywose.

¹⁵ Niwa hardihiyé' dír tlahhi'iidaá Israeli awa yaamaá Gileadi, tlahhoó Reubeni nee oo Gadi nee tlaqtá tlahhoó Manasewo, ngiri bayé',

¹⁶ «Alqaati sleémeero ar múk AAKOÓ MUNGÚ i kat, ‹Ahaá gár tlaakw ar adór tí masa tlehhé' dír Munguú Israeli? Kuungá' laarí masa dee/aanuté', AAKOÓ MUNGÚ kway meeré' eeharto, as kitangwhúng oo ilahhooa kawa hanmiisi kuwa tlehhé'. Adoorihe kuungá' aga dee/anuti'iikáhe, AAKOÓ MUNGÚ kway meeré' eeharto?

¹⁷ Ahaá, tlakweemaadá' taa tleehhaán baraá Peorír wa ale naa alení'i? Kuungá' a ga/eera'aakáhe, tam hamí taa hhoohhooesaniiká, nee hám tiqtír pu/i ana qo wa mak ti'imitaniiká.

¹⁸ Ahaá waáy, AAKOÓ MUNGÚ eeharto musa male sié'? Asma kuungá' laarí bura sié' eeharto, inós matlo in qa/iit dír xoorór Israeli sleémeero.

¹⁹ Ala bar baraá ayaahunge dabaá tlakw i dayá', Mungú kuwa ilahhooárí hanmisa' baraá ayaahúng wa ale bir ya/aandaaká, qwalaasaré' gayuú ayaarén i waaraahhare' amoorí heémár AAKOÓ MUNGÚ i diri', nee aalirhúng baraá tla/angwrén tiwa sleere'. Ala AAKOÓ MUNGÚ mu siaara' nee atene as kitángw hatlá' oo ilahhooa kuwa tlehhtuú eera' ta kuduú AAKOÓ MUNGÚ, Munguúrén.

²⁰ Kuungá' a insleera'aakáhe adór Akani garmoó Sera ira inkihhimu wasleés baraá muruudá' taa hhoohhooeesi as Mungú, Mungú iri buúhh amór xoorór Israeli sleémeero? Slám tlakweemaadaá Akani aa tleéhh inós kilós ngwa gaasi'iiká.› »

²¹ Mukduú tlahh'aá Reubeni nee Gadi nee tlaqtadár tlahhoó Manasewo geeraharuuseedár tlahh'aá Israeli ngari bayé',

²² «Munguúduú Aleesleemusmo inós an AAKOÓ MUNGÚ kilós! Munguúduú Aleesleemusmo inós an AAKOÓ MUNGÚ kilós! Inós gár naa tleehhaán ga xuu', nee dirhunge sleeme ngi ooaán, barnaxes atén ana dee/aanutaán, laqaá AAKOÓ MUNGÚ haratlintaaoro una siaán, daqaní ti tsu/e', tam panmo miwa meét.

²³ Barnaxes atén kitángw ilahhooár da/a/aangw kawa hanmiisaan una tleehhaán, nee ilahhooár balaango, nee ilahhooár wayduwo, daqaní AAKOÓ MUNGÚ li/aywós ngu bui diréní ale.

²⁴ Aasla'áy. Ala gár kasa tleehhaán a atén ana xuruutaán as aluuwo alér tlede na/iihúng koorén ngi bayá'aáke, ‹Kuungá' nee AAKOÓ MUNGÚ, Munguú múk Israeli a milá?

²⁵ Asma AAKOÓ MUNGÚ yaaesír Yordani gana qaás tawa digmuú atén nee kuungaásingaá hhay Reubeni nee hhay Gadi. Daxta kuungá' dirhúng i káhh dír AAKOÓ MUNGUHE.› Gawaá adoorihe na/iihúng na/iirén ngi gee/asliyá', AAKOÓ MUNGÚ nguri mayá' sluufmisuwo.

²⁶ As adoorí tari ooaán, kitángw ilahhooa hanmis u tleehhaán, ala u ilahhooár wa da/aanaaká, tam ilahhooár muruú ta tsu/i a gawaadá' wa haniisanaaká.

²⁷ Ala una tleehhaán as tawa laya tla/ángw atén nee kuungá', nee tla/ángw xwaylarén ar aluú wa hi'iit, adór inooín ir hariná' AAKOÓ MUNGÚ nguwa sagadiyuusiya', ar ilahhooár da/a/aangw nee ilahhooár muruú ta tsu/i nee ilahhooár wayda, as kahhó' na/iihúng koorén mingiwa bayé', ‹Kuungá' dirhúng i káhh dír AAKOÓ MUNGUHE.›

²⁸ Atén kawa xuaán geeraawo bar kangwdá' kunga atén báy, laqaá tam kwaa xwaylarén ar hi'iít báy, daqaní atén tari ooaan, ‹Ga/aawaak slaqsaywuú kitángw ilahhooa oo AAKOÓ MUNGÚ, kudá' baabi'iirén naa tleehhiyé', ala kwí ku ilahhooár wa da/aa/anká, tam ku ilahhooár muruú ta tsuú/ wa haniisiiká, ala gár kusa tleéhh a as tawa laya tla/ángw atén nee kuungá'.›

²⁹ Kangwsíng atén tiwa pa/i, oo atén niwa dee/aanutaan, nee niwa warqawaan dír AAKOÓ MUNGUHE, atén kitángw hatlá' oo ilahhooa kawa da/aa/an kuwa tleehhaan laqaá oo ilahhooár bu'uungw, laqaá oo ilahhooár muruú ta tsu/i ta kuduú AAKOÓ MUNGÚ, Munguúrén, oo baraá heémarósí dirií'.»

³⁰ Finehasi kaahamusmoó Mungú, nee geeraharuusér tlahh'aá xoorór Israeli kudá' nee inós taa alkone', axweesanoó tlahh'aá Reubeni nee oo Gadi nee tlaqtá tlahhoó Manase kuwa axaás, tari qwalaá/.

³¹ Finehasi garmoó Eleasari, kuduú kaahamusmoó Mungú tlahhi'iidaá Reubeni nee Gadi nee Manase giri báy, «Atén laarí aga tsaahhaán adór AAKOÓ MUNGÚ ir dinkwa nee atén, asma kuungá' inós ugwa ahhi'iiká nee as tlehhmusinge kuungá' xoorór Israeli aga tu/é' baraá xaraasleemaá AAKOÓ MUNGUHE.»

³² Aluuwo Finehasi garmoó Eleasari, kuduú kaahamusmoó Mungú nee geeraharuuseedár hatlae, tlahhi'iidaá Reubeni ngari deelór bayé', nari watliyé' ay Kana'ani amór xoorór Israeli, kangwdá' nguri alki/iitiyé'.

³³ Xoorór Israeli kari qwala/aás nee axweesanaydá' taa alki/iít, Mungú nguri sluufisiyé', tam slaqwaraadá' i ado warqeemisiya' ar tawa slaqwarár ay amór tlahhoó Reubeni nee oo Gadi, ngaa sangw iitleesi'iiká.

³⁴ Tlahha'aá Reubeni nee oo Gadi kitangwdá' nguri bayé' «Lamabu'uungw.» asma ta kaahi, «Kitaangwí a lamabu'usmoorén oo ga laqaqaám adór AAKOÓ MUNGÚ tar Mungú.»