YOSHUA 21 - Biblía Axweesantá Hhohho' ar Mungú 2004

Gixsadaá múk tlahhoó Laáwi

¹ Geeraharuusér múk tlahhoó Laáwi iri Shilór keér baraá yaamaá Kana'ani amór kaahamusmoó Mungú Eleasari nee Yoshua nee geeraharuusér uren ar tlahh'aá xoorór Israeli,

² niri ooiyé', «AAKOÓ MUNGÚ Mose guna hara'ayín atén tiwa gixsadúwí haniisi awa ta hootaan nee tlaaqaandoó tawa de'eemana.»

³ Xoorór Israeli gixsadaá tlahhoó Laáwi iwa hootiya' nee tlaaqaandoó tawa de'en ngiri haniisiyé' baraá aalir'ín wa ale ar adoodá' AAKOÓ MUNGÚ ngira hara'ayín.

⁴ Tsawdór geera múk guruú doó Kohati oo tlahhoó Laáwi guna sleér. Bahh'ale baraá xwaylár kaahamusmoó Mungú Aroniwo, yaamuuín kina haniís ar tsawdo baraá yaamaá Yuda wa ale, nee awa Simeon nee awa Benyamini. Gixsadaá taa haniís dinkwaaro a mibaá nee tám.

⁵ Múk guruú doó Kohati oo aa meet kuna gixsadaá mibángw i haniís, kudá' baraá yaamaá tlahhoó Efraímúwí diriiá', nee yaamaá tlahhoó Dani, nee yaamuudá' taa haniís dír tlaqtá tlahhoó Manase.

⁶ Tsawdo kawa tleéhh ar guruú doó Gershoni, gixsadaá taa sláy a mibaá nee tám. Dír kiwa sláy a baraá yaamaá Isakari nee awa Asheri nee wa Naftali nee awa tlaqtá tlahhoó Manase, kudaá gayuú Bashánírí diriiá'.

⁷ Múk guruú doó Merari gixsadu nga sláy mibaá nee tsár baraá tla/ángw yaamaá Reubéní wa ale nee awa Gadi nee awa Sebuluni.

⁸ Xoorór Israeli gixsaduuká' nee tlaaqaandoó de'eengo kina haniís dír tlahhoó Laáwi ar loohír tsawdo ar adoodá' AAKOÓ MUNGÚ Mose ngura hara'ayín.

⁹ Gixsaduuká' taa haniís dír kiwa sláy a baraá yaamaá Yuda nee awa Simeon kina haniís dír

¹⁰ xwaylár kaahamusmoó Mungú Aroni, múk guruú doó Kohati, heé tlahhoó Laáwi. Tsawdór geera inooín gina sleér.

¹¹ Gixsadaá taa haniís a Kiriat-arba, tidá' ta babay Hebroni (Arbawí an baabuú Anaki). Gixsarí i baraá yaamaá Yuda. Kana haniís dinkwa nee qawtantadá' gixsadá' gaa harwedi.

¹² Ala qamaá gixsadá' nee awa yaamuudaá inslaawoó gixsaaro kaa qaroó haniís dír Kalebu garmoó Yefune tawa aalirós.

¹³ Gixsár Hebroni tidá' aáng taa tsawaár tawa gixsár heé aa tsu/uut i gowi, kana haniís dír xwaylár kaahamusmoó Mungú Aroni dinkwa nee qawtantose. Gixsadaá hatlá' sleeme taa haniís a kuká': Libna dinkwa nee qawtantose,

¹⁴ nee Yatiri nee qawtantose nee Eshtemoa dinkwa nee qawtantose,

¹⁵ nee Holoni dinkwa nee qawtantose, nee Debiri dinkwa nee qawtantose,

¹⁶ nee Aini dinkwa nee qawtantose, nee Yuta dinkwa nee qawtantose, nee Bet-shemeshi dinkwa qawtantose. Gixsadaá taa haniís baraá yaamaá tlahhi'iiká' tsare dinkwaaro a gwaleél.

¹⁷ Baraá yaamaá Benyaminiwo gixsadaá taa haniís a gixsár Gibeoni dinkwa nee qawtantose, nee Geba dinkwa nee qawtantose,

¹⁸ nee Anatoti dinkwa nee qawtantose nee Almoni dinkwa nee qawtantose. Gixsadaá taa haniís dinkwaaro a tsiyáhh.

¹⁹ Gixsadu sleémeero awa taa haniís dír xwaylár kaahamusmoó Mungú Aroni, nee qawtanay'ine dinkwaaro a mibaá nee tám.

²⁰ Múk aa meet baraá guruú doó Kohatiwo, heé tlahhoó Laáwi, kina gixsaadukií haniís baraá yaamaá Efraimú wa ale.

²¹ Gixsár Shekemu, tidá' aáng taa tsawaár tawa gixsár heé aa tsu/uut i gowi, kana haniís dinkwa nee qawtantós tidár gawaá tlom'aá Efraímuwí diriia, nee gixsár Geseri dinkwa nee qawtantose,

²² nee Kibsaimu dinkwa nee qawtanay'ine nee Bet-horoni dinkwa nee qawtantose. Gixsaduuká' nee qawtanay'ine dinkwaaro a tsiyáhh kaa haniís.

²³ Baraá yaamaá Daniwo gixsár taa haniís a Elteke nee qawtantose, nee Gibetoni nee qawtantose,

²⁴ Aiyaloni nee qawtantose, Gat-rimoni nee qawtantose. Gixsaduuká' dinkwa nee qawtanay'ine a tsiyáhh kaa haniís.

²⁵ Baraá yaamaá tlaqtá tlahhoó Manasewo gixsár taa haniís a Ta'anaki nee qawtantose nee Gat-rimoni nee qawtantose. Gixsadaá taa haniís a tsár nee qawtanay'ine.

²⁶ Gixsadaá hatlá' awa taa haniís dír múk guruú doó Kohati kudá' aa meet a mibaangw dinkwa nee qawtanay'ine.

²⁷ Nee múk guruú Gershoni, oo tlahhoó Laáwi, kuna gixsadaá tsárí haniís baraá yaamaá tlaqtá tlahhoó Manasewo. Gixsár taa haniís a Golani ar baraá Bashani, tidá' taa tsawaár sleeme tawa gixsár heé aa tsu/uut i gowi, dinkwa nee qawtantose, nee Be'esh-tera nee qawtantose.

²⁸ Baraá yaamaá Isakariwo gixsár taa haniís a Kishioni nee qawtantose, nee Daberati nee qawtantose,

²⁹ Yarmuti nee qawtantose, nee En-ganimu nee qawtantose. Gixsadaá taa haniís dinkwaaro a tsiyáhh nee qawtanay'ine.

³⁰ Baraá yaamaá tlahhoó Asheriwo gixsár taa haniís a Mishali nee qawtantose, nee Abdoni nee qawtantose,

³¹ nee Helkati nee qawtantose, nee Rehobu nee qawtantose. Gixsadukaá kaa haniís dinkwaaro a tsiyáhh nee qawtanay'ine.

³² Baraá yaamaá Naftaliwo gixsár taa haniís a Kedeshi, tidá' aáng taa tsawaár tawa dír heé aa tsu/uut i gowi, tidár baraá Galiláyárí dirii', kana haniís nee qawtantose, nee Hamot-dori nee qawtantose, nee Kartani nee qawtantose. Gixsadu kaa haniís a tám.

³³ Gixsadaá taa haniís dír múk doó Gershoni kudá' aa meet dinkwaaro a mibaá nee tám nee qawtanay'ine.

³⁴ Múk tlahhoó Laáwi oo aa meet, oo guruú doó Merari kina gixsadií haniís baraá yaamaá Sebuluni wa ale. Gixsár taa haniís a Yokneamu nee qawtantose, nee Karta nee qawtantose,

³⁵ nee Dimna nee qawtantose, nee Nahalali nee qawtantose. Gixsadu kaa haniís a tsiyáhh.

³⁶ Baraá yaamaá Reubeniwo gixsár taa haniís a Beseri nee qawtantose, nee Yahasi nee qawtantose,

³⁷ nee Kedemoti nee qawtantose, nee Mefa'ati nee qawtantose. Gixsadu kaa haniís a tsiyáhh dinkwaaro.

³⁸ Baraá yaamaá tlahhoó Gadiwo gixsár taa haniís a Ramoti tidár baraá Gileadi, gixsarí a tidá' taa tsawaár sleeme tawa dír heé aa tsu/uut i gowi, kana haniís dinkwa nee qawtantose, nee Mahanaimu nee qawtantose,

³⁹ nee Heshboni nee qawtantose, nee Yaseri nee qawtantose. Gixsadaá taa haniís dinkwaaro a tsiyáhh nee qawtanay'ine.

⁴⁰ Gixsadu sleémeero awa taa haniís dír múk guruú doó Merari oo aa meet kuduú tlahhoó Laáwi dinkwaaro a mibaá nee tsár.

⁴¹ Gixsadu sleémeero awa taa haniís dír tlahhoó Laáwi baraá yaamaá Israeli sleémeero a mibeeri tsiyáhh nee dakaát dinkwa nee qawtanay'ine.

⁴² Umuúqo gixsaaro kana harweér nee qawtantós.

Xoorór Israeli yaamu ngiwa ál

⁴³ Adoorí an adór xoorór Israeli yaamu sleémeero ngira ál, kudá' taa haniís dir'íní ale nee AAKOÓ MUNGÚ ar adoodá' ngira alqadín dír taati'ii'ín. Inooín yaamuudá' ngiri aaliyé', niri baraadá' wa hootiyé'.

⁴⁴ AAKOÓ MUNGÚ inooín giri waydií haniís umuú diiro baraá yaamuudae ar adoodá' ngira al'axweés dír baabi'ii'ín. Hoomtuú gaa qiitl kwatiitaro i kaahh, asma AAKOÓ MUNGÚ hoomaadá' gana qaás baraá dabaá xoorór Israelírí ale.

⁴⁵ Baraá al'axweesantadá' hhoe sleémeero ar AAKOÓ MUNGÚ aa oó' dír xoorór Israeli, ar aa boo/eesiiká i káhh tam ar wák, al'axweesantós sleémeero iri bó/.