YOSHUA 20 - Biblía Axweesantá Hhohho' ar Mungú 2004

Gixsadaá guwaay

¹ AAKOÓ MUNGÚ Yoshua guri báy,

² «Yoshúa, xoorór Israeli ádbaweek, gixsadu ngi tsawaariye' awa hee i gowi as iwa /uy, ar adoodá' Mose axweesante'eé' tí ngira kuúng báy.

³ Hee bar hee gwa ar pa/aayo, i gowi baraá gixsár wák í ale as iwa /uy, mukuwa gaás nee heé li/oó bu'uúm.

⁴ Heedaádá' aa pa/aayór wa tsu/uut i gowi amór gixsár wák baraá gixsaduudá' ta tsawda'a. Bira hardáh i sihhiiti afkú gixsaárí ale, qaa/aywós kudá' ngu alki/iiti dír bariisér gixsadá'. Aluuwo bariiseedá' ngu ilaaot, dír hotaawós ngi slaye' baraá tla/angw'ín wa ale.

⁵ Barnaxes heedá' li/oó bu'uúm ngwa aluú wa guús ay baraá gixsadá', bariisér gixsadá' heedaádá' munguwa hanís dír kudá' li/oó bu'utuú wa slaá', asma gwaa fahharír wa gaasiiká, gaa a pa/aayo, wakaarír geerií dáw i káhh.

⁶ Heedaádá' aa tsu/uut in baraá gixsadá' wa hoot ay dír kwasleemarós kay tleehhi dír geeraá xoorór Israélír wa ale, nee ay dír kaahamusmoó úr oo Mungú oo qoomaadá' i gwaai. Alaá tihe daqaní heedaádá' watlíngw ayaawós kudá' niwa goów gu aleesláy, nee iwa ki/i amór do'ós.»

⁷ Gawaá adoorihe xoorór Israeli gixsár Kedeshi gari tsawát, tidár baraá Galiláyárí dirii' gawaá tlom'aá Naftali, ar hatlá' a Shekemu tidár baraá tlom'aá Efraimu nee Kiriat-arba, umuuwós oo hatlá' a Hebroni, tidár baraá tlom'aá Yudií dirii'.

⁸ Gayuú Yordaniro, bihhaá da/aáw awa Yeriko, gixsár Beseri kana tsawaár, tidár baraá xatstá xaanxáy dirii', inós anqo wákleelí baraá yaamaá Reubeniwo. Sleeme Ramoti kana tsawaár baraá Gileadiro, inós a gixsár tlahhoó Gadi i dirii'i, nee Golani gixsár Bashani ar baraá yaamaá tlahhoó Manase i dirii'.

⁹ Gixsaduuká' kina tsawaár as xoorór Israeli sleémeero nee dahaayér baraadá' wa hoota, as kahhó' umuúqo heé hee gwa pa/aayór wa gaas, iwa amoodií guwi as mukuwa gaás nee heé li/oó bu'uúm, ay dír kwasleemarós kay tleehhi.