YOSHUA 18 - Biblía Axweesantá Hhohho' ar Mungú 2004

Ka'amisuú yaamaá naa meetiye'

¹ Alaá xoorór Israeli yaamu ngiwa ót, looár wake nina burumburitiyé' Shilórí ale, heémár Mungú ngiri kiki'iyé'.

² Baraá xoorór Israeliro tlahh'aá faanqw na meetiyé' awa ta yaamuuíní ka'asiiká.

³ Naagáy Yoshua xoorór Israeli gari báy, «Ay xaylá kuungá' ta hhawhhaahhaba' yaamuuká' AAKOÓ MUNGÚ, Munguú baabi'iihúng naa kuungií haniís kiwa hayota'aaká?

⁴ Múk tám slawaare' baraá umuúqo tlahhaywo. Aníng inooín i ya/aáw baraá ayaawí sleémeero as yaamu ngiwa tsawtsawuusiya' nee tidá' naa ariyé' ngiwa gooina', kahhó' adór yaamu kir ka'amiisaan kawa xuaan. Daqaní kangwsíng nguri hubá'.

⁵ Inooín yaamu ngi ka'amiisiye' baraá ayeemo faanqw. Ala tlahhoó Yuda i meeti dirós tidá' kway ka'aás amór bihhaá basko, nee xwaylár Yosefu i met dir'ín tidá' ki ka'aás bihhaá /iiko.

⁶ Kuungá' barnaxes yaamu iga qasmisé' baraá ayeemo faánqwí ale, kangwhúng kwisíng ngu hubá' dir'eéní ale. Daqaní aníng tsawdo a tleéhh as kuungá' dír geeraá AAKOÓ MUNGÚ, Munguúrén wa ale.

⁷ Ala tlahhoó Laáwi ku yaamií ka'aasiiká, asma gadiyér'ín a AAKOÓ MUNGÚ ngun sagadiyuusiyá', adoorí an aalir'ín. Ala tlahhoó Gadi nee oo Reubeniwo nee tlaqtá tlahhoó Manasewo, mukwí kwa qaroó yaamuuíní ka'aás nee Mose, sagadiyusmoó AAKOÓ MUNGÚ amór gayuú da/aáw Yordaniro.»

⁸ Naagáy mukdá' tari tláy baraá aaii'ín, qoomár tawa tlatlay Yoshua giri male i axweés iri oó', «Tlawsé', yaamuusíng sleémeero tsawtsawsare', daqaní kangwsíng ngu gooiindá' ngur ki/á'. Daqaní aníng tsawdo a tleéhh dír geeraá AAKOÓ MUNGUHE as kuungá' diirír Shílór wa ale.»

⁹ Hhawaateedá' tari tláy, yaamu sleémeero kiri aldáh tsawtsawumisuuwo, kángw yaamu kuri gooín baraá kitaábu, nee adór kir ka'aasi baraá ayeemo faánqwí ale dinkwa nee gixsaduuine, tari wayaá' amór Yoshua baraá xafayduú Shilo.

¹⁰ Yoshua AAKOÓ MUNGÚ guri yaahaás daanduú tsawdoorihe, yaamu giri ka'amiís dír xoorór Israelírí ale, umuúqo tlahhaywo yaamuuwós gina sláy.

Ka'asantá tlahhoó Benyamini

¹¹ Tsawdór geera tlahhoó Benyamini guna sleér ar harqoomoó uroó tlahhay'ín. Yaamuuwós kina tla/ángwár keés nee yaamaá tlahhoó Yuda nee oo Yosefu.

¹² Bihhaá /iiko digmuuín a yaaér Yordani, gixsár Yeriko ngari /iikú wa óh, iri ti'iít baraá yaamaá tlom'i baskú wa alé, iri hardáh ay xaanxoó Bet-afeni.

¹³ Diirihe iri baskú xuú' ay Lusu, tidá' aáng ta bay Beteli, iri baraá xuú' ay Atarot-adari gawaá tlom'iidá' naa geetine' baskú Bet-horonír wa ale.

¹⁴ Digmuuín ina bihhaá hatlá' xuú', nari /uwár harweerín ay basa amór tlom'idá' naa bihhaá baskú wa geetiné' awa ti ga/aawá' nee Bet-horoni, iri kumiít ay Kiriat-ba'ali tidá' ta babay Kiriat-yearimu. Gixsarí i dabaá tlahhoó Yuda. Gaarí an wa/aamér digmuuín ira uhín bihhaá /uwawo.

¹⁵ Bihhaá basko digmuuín bihhaá Kiriat-yearimu ngina wa tláy iri hardáh Efroni, iri kumiít ay tsinqaá Neftoa.

¹⁶ Diirihe digma iri baraá xuú' ay afaá tloomadá' bihhaá /iíkwií dirii' dír tlapár Refairo, tidá' tseew bihhaá xatstá garmoó Hinomu, didaádae iri baskú xuú' ay bihhaá tloomár múk Yebusi, iri /eét ay En-rogeli.

¹⁷ Digma iwa En-rogélír wa tláy, ina /iikú xuú' ay En-shemeshi, iri waaraáhh ar Geliloti, tidá' nee gongoamoó Adumimu ti ga/aawá', iri /eét ay tlaa/ár Bohani, garmoó Reubeni.

¹⁸ Iri waaraáhh /iíkwií ale ar gawaá gongoamoó Araba, iri baraá xuú' ay Bet-araba.

¹⁹ Digma iri waaraáhh ar gawaá dindirmoó Bet-hogla, iri /iikú xuú' iri alhhe'eesuút baraá qul/ír Tlawtá Diwi, didár yaaér Yordani ira dát baraá tláwtí ale. Gaarí an digmuú yaamaá Benyamini bihhaá basko.

²⁰ Bihhaá da/aawe digmuuín a yaaér Yordani. Adoorí an adór digmuú yaamaá Benyamini kura qasiís harqoomoó múk do'ós digeemiiká' kiri harweér umuú bihhiiwo.

²¹ Gixsadaá taa tlahhoó Benyaminiwí haniís a kuká': Yeriko, nee Bet-hogla, nee Emek-kesisi,

²² nee Bet-araba, nee Semaraimu, nee Beteli,

²³ nee Afimu, nee Para, nee Ofra,

²⁴ nee Kefar-amoni, nee Ofni, nee Geba. Gixsaduuká' a mibaá nee tsár dinkwa nee ayeemoine.

²⁵ Ar hatlá' a Gibeoni nee Rama, nee Be'eroti.

²⁶ Nee Mispe nee Kefira, nee Mosa,

²⁷ nee Rekemu, nee Irpe'eli, nee Tarala,

²⁸ nee Sela, nee Ha-elefu, nee Yebusi, tidá' ta hara babay Yerusalemu, nee Gibea nee Kiriat-yearimu. Gixsaduuká' kaa haniís dinkwaaro a mibaá nee tsiyáhh. Ayeemooká' sleémeero an kudá' taa haniís dír tlahhoó Benyamini nee múk do'ós.