YOSHUA 17 - Biblía Axweesantá Hhohho' ar Mungú 2004

Yaamaá taa ka'aás dír tlaqtá hatlá' ar tlahhoó Manase

¹ Aluuwo tsawdo kari malé tleéhh ar yaamaá ta ka'aasi dír tlahhoó Manase, asma inós a barisuú Yosefu. Aáng Makiri, garmoó baris oo Manase baabuú Gileadi, kwaa qaroó yaamaá Gileadírí haniís, nee Bashaniro, asma inós a heé slaqwara ga baál.

² Baraakár hatlá' aa met baraá tlahhoó Manasewo kina yaamuuíní ka'amiís ar tsawdo umuúqo guruú do'o nee dirós. Gur'eedár mari a tí: Hhay Abieseri, nee hhay Heleki, nee hhay Asrieli, nee hhay Shekemu, nee hhay Heferi, nee hhay Shemida, sleémeero kuká' a daaqoó Manase garmoó Yosefu.

³ Ala Selofehadi garmoó Heferi, garmoó Gileadi, garmoó Makiri oo Manase inós na/oó garma gu konká, ala dasu kilós guna laqwaál. Umer'ín a ín Mahla nee Noa, nee Hogla nee Milka, nee Tirsa.

⁴ Dasuuwí iri daqáy amór kaahamusmoó Mungú Eleasari nee Yoshua garmoó Nuni nee geeraharuusér hatlae, niri ooiyé', «AAKOÓ MUNGÚ Mose guna har'ayín as atén tiwa yaamií ka'aasi adór hhaaeerén awa daaqáy wa ale.» Aluuwo Yoshua giri yaamií ka'aás adór hhaeeín awa daaqáy wa ale ar adoodá' AAKOÓ MUNGÚ ngira hara'ayín.

⁵ As adoorí tlahhoó Manase kuri ayeemaá mibaángwií doók, yaamaá Gileadi nee Bashaniro bira meér harafarooro, kudá' yaaér Yordaniro gayuqá' i diriiá' bira meér harafarooro.

⁶ Asma dasuú dooín kuna aalír yaamií haniís adór daaqáy wa ale, ala Gileadi kana ka'aás dír daaqoó Manase oo aa meet.

⁷ Yaamaá taa ka'aás dír tlahhoó Manase digmuuín dír iwa iimu/ún a Asheri ay Mikmetati, bihhaá da/aáw awa Shekemu gina ar óh, iri kumiít báskwí ale ay yaamaá ta hooti nee múk En-tapua.

⁸ Yaamaá Tapua Manase gina óh, ala gixsár Tapua tidár digma ira óh kana aál nee xwaylár Efraimu.

⁹ Digma iri kumiít ay yaaér niina ar Kana. Ala gixsaduudá' Kanaro baskwí diriiá' kina aál nee hhay Efraimu. Handá' tam gixsaduuká' i baraá yaamaá Manase diri'iia. Digma yaaér Kana gana bihhaá /iikú wa óh, iri ti'imiít ay baraá Tlawtá Tla/aangw.

¹⁰ Yaamaá bihhaá basa awa tlahhoó Efraimu, ala yaamaá bihhaá /iya awa tlahhoó Manase, /uwawo dír na harki/iyé' a Tlawtá Tla/aangw. Tlahhoó Asheri dír yaamaá Manasewo i /iikú al /uwa, nee yaamaá /iikú al da/aáw dír yaamaá tlahhoó Manasewo kina aál nee tlahhoó Isakari.

¹¹ Múk tlahhoó Manase gixsadukaariya' kina aál baraá yaamaá tlahh'aá Isakariwo nee awa Asheriwo. Gixsaduudá' a gixsár Bet-sheani nee yaamuwose, nee Ibleamu nee ayeemowose. Gixsadaá hatlá' a Dori nee En-dori nee Ta'anaki nee umuú hatlá' a Nafati, Megido dinkwa nee ayeemoine, nee yaamuloouusér baraadá' hootá' kina aál.

¹² Ala tlahhoó Manase yaamuloouusér baraadá' nga aleeslay'iiká guusaro. Asma xoorór Kana'ani ina gawduúr iwa baraadá' wa hot.

¹³ Ala qoomár xoorór Israeli /uuru nguwa sleér, xoordaá Kana'ani kina sagesihhiít baraá gadiyedaá iwa bihhií noongo'otiiaaká, ala nga guusi'iiká baraá ayaadae.

Tlahhoó Efraimu nee tlaqtá tlahhoó Manase ta yaamaá hatlá' slaa'

¹⁴ Múk tlahhoó Yosefu iri amór Yoshua káy kuri báy, «Ahaá asma waáy, ateéká' taa tsuúq nee AAKOÓ MUNGÚ tari adoorír tlahhaan, mista dír wákií ka'aás?»

¹⁵ Yoshua giri báy, «Bar kuungá' aga tlahhé' adoosír ale, tam tlom'iqaá yaamaá Efraimu nu buiaaká, ala tlawsé' darmuuqá' xoorór Perisi i diri' nee ar Refairo haradahaak, gweehhuusaak, daqaní ta gawaaqií i tleehhitá'.»

¹⁶ Múk tlahhoó Yosefu tari oó', «Ar qoo tsuwa ló', tlom'iiqá' atén tiqo tsuwa buiaaká. Ala xoorór Kana'ani, tidá' baraá xatstá hoot, inooín i gaardaá muqslár koná', tam kudá' baraá Bet-sheanír hootá' nee ayeemoowose, tam kudá' baraá tlapár Yesre'elír hootá' sleeme.»

¹⁷ Aluuwo Yoshua iri axweés dír tlahhoó Yosefu, hhay Efraimu nee hhay Manasewo, giri báy, «Ar ló', kuungá' tundu yaariír, slám aleesleemu u ló'wa koondá', as adoorí i hariindaaká tunduwa aykú wákií haniisi.

¹⁸ Ala yaamuuqaá tlom'aá koomá' daqaní a koohúng, hamí tam a darmuuwo. Gimsé', fiitsaak nee ki hayotá' iimír gayuuqá' wa tleemu ay kuqá'. Xooroodár Kana'ani tlatlahhasaak, tam inooín i /uuruú kon'a nee gaardaá muqslaro.»