YOSHUA 16 - Biblía Axweesantá Hhohho' ar Mungú 2004

Yaamaá taa ka'aás dír tlahhoó Efraimu nee tlaqtá Manase

¹ Xwaylár Yosefu ar harqoomoó tsawdor'ine, yaamuuín dír niwa iimu/uné' a yaaér Yordani, bihhaá da/aáw awa tsinqaá ma'aay awa Yeriko, iri waaraáhh ar baraá xaanxaay ay gawaá gongoama', iri ti'iít ay Beteli.

² Didár Beteliro digma iri kumiít ay Lusu, iri waaraáhh ar Ataroti. Ayaawí kun hoot nee múk Arki.

³ Iri /uwií /eét ay yaamaá xoorór Yafleti, iri ti'iít ay Bet-horonidá' Geseriro baráy dirii', iri ti'iít ay tlawtá Mediteranea.

⁴ Xwaylár Yosefu gídaabá tlahhoó Manase nee oo Efraimuwo, kina yaamuuká' i haniís as kiwa aali.

Ka'asantá Efraimu

⁵ Ka'asantá yaamaá Efraimu kwi haniís ar harqoomoo tlahhaywós, a kuká': Bihhaá da/aawe Atarot-adari ngina wa tláy ay Bet-horonír Gawa,

⁶ iri ti'iít ay Tlawtá Tla/aangw. Bihhaá /iiko digma ina waaraáhh ar Mikmetati, nee bihhaá da/aáw awa Mikmetatiro nina harweerín, iri Ta'anat-shilór xuu'. Didae bihhaá da/aáw gana ar óh iri ti'iít ay Yanoa.

⁷ Iwa Yanoár wa /eét iri ti'iít ay Ataroti ay Na'ara, iri hardáh ay Yeriko, iri alhhe'eesuút dír yaaér Yordani.

⁸ Digma ina Tapuár wa tláy /uwa gina xuú' ay yaaér niina ar Kana, iri ti'iít ay Tlawtá Tla/aangw. Gaarí an yaamaá taa ka'aás dír Efraimu ar harqoomoó tlahhaywós.

⁹ Slám gixsadaá hatlá' nee ayeemaá bihheedií tsewen awa taa ka'aás amór tlahhoó Efraimu i dayá' baraá yaamaá Manasewo.

¹⁰ Ala tlahhoó Efraimu xoorór Kana'ani tidár baraá Geserír wa hoot nga guusi'iiká, ala nina hootiyé' baraá tla/ángw tlahhoó Efraimu wa ale ay laarí. Ala xoorór Kana'ani kana lawaaler'ín tleéhh, kina gadiyér gawídií sláy, ar tawa bihhií noongo'ootiiká.