YOSHUA 14 - Biblía Axweesantá Hhohho' ar Mungú 2004

Ka'amisuú yaamaá bihhaá /uwa yaaér Yordaniro

¹ Xoorór Israeli yaamaá kay ka'amiís baraá Kana'aniro an kuká': Múk gaa ka'amiis a kaahamusmoó Mungú Eleasari nee Yoshua garmoó Nuni, baraá ka'amisuuwo tina alee/imisiyé' nee bariisér uren ar tlahh'aá xoorór Israeli.

² Yaamu kina ka'amiís ar loohír tsawdo, ar adoodá' AAKOÓ MUNGÚ ngira hara'ayín dír Mose, as kiwa ka'amiisi dír tlahh'aá gwaleél nee tlaqi.

³ Asma tlahh'aá tsár nee tlaqi kaa yaamuuíní ka'aás gayuú yaaér Yordaniro da/aáwá ale, ala tlahhoó Laáwi kwaa aalírí haniisiiká baraá tla/angw'ine.

⁴ Xwaylár Yosefu tlahhi'iiwós a tsár, tlahhoó Manase nee oo Efraimu, ala tlahhoó Laáwi aalír yaamu gaa slayká, ala aqo gixsadaá maray'ín ngi tleehhiya', nee wa/ángw hikwaaín ngiwa de'ena', nee dír muruú /aymar'ín nguwa amohhe'eesiya'.

⁵ Xoorór Israeli yaamuudá' giri qasmís ar loohír tsawdo ar adoodá' AAKOÓ MUNGÚ ngira hara'ayín dír Mose.

Kalebu kuwa yaamaá Hebronírí haniís

⁶ Looár wake tlahhoó Yuda ina amór Yoshua káy baraá Gilgali. Kalebu garmoó Yefune, oo guruú doó Kenisi Yoshua guri báy, «Yoshúa, án ngi slaá' kuúng axweesantadár AAKOÓ MUNGÚ aa oó' dír Mose, heé Mungú, a insleér. Axweesantadá' a daanduú aníng nee kuúng baldá' baraá yaamaá Kadesh-barnearo.

⁷ Qoomaadae kureerieé' a mibeeri tsiyáhh Mose sagadiyusmoó AAKOÓ MUNGÚ aníng iwa ya/aáw Kadesh-barneár wa ale as yaamu ngiwa tsawtsawuusár aw. Aníng niwa amoodá' wa wayaá', looeemaadá' naa ár ina ooár áw dír Mose.

⁸ Ala mukdá' nee aníng taa alkoomaan muu sleémeero kuna dae tsaát iri naá/, ala aníng AAKOÓ MUNGÚ Munguúeé' una ilaiwaá/ ar inkihhimu.

⁹ Baalaadae Mose yaamuuká' ngaa dir'eénií alqadín, iwa kaahi, ‹Yaamuusingá' taa adarát ya'aawoge kuúng nee na/iiwoge in alá' ay kureeraá kureér, asma kuúng AAKOÓ MUNGÚ, Munguúeé' una ilaiwá/ ar inkihhimu.›

¹⁰ Ala ay hamí ga/aaweek, adoorí ni diriia AAKOÓ MUNGÚ iga deaaén a slaáf ar adoodá' ngira oó'. Kureeraá mibeeraá tsiyáhh nee kooán iga /aáy iimír baalaadá' AAKOÓ MUNGÚ /aymuudá' nguwa oó' dír Mose, qoomár xoorór Israeli iwa hi'iimaamít baraá xaanxáy wa ale. Laarí aníng kureerieé' a mibeeri dakaát nee kooán.

¹¹ Ala ti gawít tam hamí, aqo adoodár baldá' Mose iwa ya/abiít an i kaáhh, slaqwara a aleesláw, tam waayaá dooeé' sleeme.

¹² Hamí daxta kuúng un firiím, yaamukaá tlom'i aníng i haniisang ar adoodá' AAKOÓ MUNGÚ ngira oó' baalaadae. Kuúng a xú' baalaadae múk Anaki baraaká' gana hoót, slám koo/ír gixsadu ka gawit. Barnaxes AAKOÓ MUNGÚ a dinkwa nee aníng, mukwí uqo tlatlahhaás ar adoodá' AAKOÓ MUNGÚ ngira oó'.»

¹³ Yoshua Kalebu garmoó Yefune guri tsuúq, guri gixsár Hebronirí haniís as ngiwa aali.

¹⁴ Gawaá adoorihe yaamaá Hebroni Kalebu, garmoó Yefune, heé guruú doó Kenisi giri óh, ay laarí a kooín, asma Kalebu AAKOÓ MUNGÚ Munguú múk Israeli guna ilaiwawaá/ ar inkihhimu.

¹⁵ Umuú yaamaá gixsár Hebroni bál geeraawo a kun babay Kiriat-arba. Heewí ta bay Arba ku ló'wa iiatleér ta múk hatlá' sleémeero oo Anakiro. Yaamu sleémeero niri amohhoouyé' asma slaqwara i káhh.