YOSHUA 13 - Biblía Axweesantá Hhohho' ar Mungú 2004

Yaamaá taa hayoohiiká dabaá múk Kana'aniro

¹ Qoomaarihe Yoshua a aakoó kureeraá yaariir gaa /aay. AAKOÓ MUNGÚ Yoshua guri báy, «Kuúng hamí adoosíng ti diria a aakoó kureeraá yaariir gaa /aay, slám yaamaá yaariir awa taa hayoohiiká i dayá'.

² Ayeemaá naa meetiye' a kuká': Yaamu sleémeero awa xoorór Filisti nee awa xoorór Geshuriro,

³ iimír yaaér Shihorír wa oohang ay bihhaá da/aáw awa Misri ay digmuú Ekroni bihhaá /iiko, gaarí an yaamuudá' sleémeero ta babay awa xoorór Kana'áni. Waawituú Filisti a kooán, ayeemooín a kuká': Gasa nee Ashdodi, nee Ashkeloni, nee Gati, nee Ekroni nee yaamaá múk Afi,

⁴ bihhaá basko. Yaamaá múk Kana'ani sleémeero faakare' iimír Meara tidá' múk Sidoni, ay Afeki ta hardatá' ay digmuú xoorór Amori.

⁵ Bihhaá da/aawe yaamu sleémeero awa Gebali nee awa Lebanoniro ay Ba'al-gadi afaá tloomár Hermoni, tay ti'itá' ay Lebo-hamati.

⁶ Yaamuudá' sleémeero awa tlom'idaá baraá tla/ángw Lebanoni ay Misrefot-maimu awa xoorór Sidoni. Mukwí sleémeero aníng u guús tawa ti'iiti ar adoodá' xoorór Israeli ir doogigiinda. Kuúng yaamu ki qasmís dír xoorór Israeli ar loohír tsawdo as ngiwa aaliya' ar adoodá' án kuúng ugwa báw.

⁷ Tlahha'aá gwaleél yaamu ti qasis baraasíng wa ale tawa aalir'ín, nee tlaqtá tlahhoó Manase sleeme.»

Ka'amisuú yaamaá Yordaniro da/aáw

⁸ Tlahhoó Reubeni nee oo Gadiwo nee tlaqtá hatlá' ar tlahhoó Manase yaamuuín awa aali kaa sláy, yaaér Yordaniro bihhaá da/aáw wá ale, ar adoodá' AAKOÓ MUNGÚ ngira oó' dír sagadiyusmoowós Mose.

⁹ Yaamuuín a iimír Aroeri ngina wa tlayá', tidár bihhaá duxuú Arnoni ay gixsadá' baraá tla/ángw xátstí dirii', tam xatstadá' sleémeero iimír Medebár wa oohang ay Diboni.

¹⁰ Gixsadu sleémeero awa Sihoni waawutmoó xoorór Amori, kudá' aa waawuti'in iimír Heshbonír wá ale ay digmuú xoorór Amori.

¹¹ Yaamaá Gileadi sleeme, yaamu sleémeero awa xoorór Geshuri nee awa múk Ma'akati, ay tlom'i sleémeero awa Hermoni, nee yaamu sleémeero awa Bashani, nari ti'iitiyé' ay Saleka,

¹² nee yaamu sleémeero awa waawutmo Ogu. Inós an waawtmoó aa meet baraá xoorór Refairo. Inós ina waawuti'ín gixsár Ashtarotír wa ale nee Edrei baraá yaamaá Bashani. Asma Mose awa hatlá' sleémeero gaa tlatlahhaás.

¹³ Ala tam adoorihe xoorór Geshuri nee ar Ma'akati, kaa guusiiká nee xoorór Israeli, ala nina alhootiyé' dinkwár wá ale ay laarí.

¹⁴ Múk tlahhoó Laáwi aalír yaamu nga slayi'iiká, ala gar'ín aqo ilahhooadár da/a/aangw ta hanmaamisi dír AAKOÓ MUNGÚ, Munguú Israeli. Tí an gár naa aaliyé' ar adoodá' AAKOÓ MUNGÚ Mose ngwa báy.

Yaamaá tlahhoó Reubeni

¹⁵ Mose yaamu gina haniís dír tlahhoó Reubeni ar adoodá' múk dooín i dirii'i.

¹⁶ Yaamuudá' nina iimír Aroerír wa tlayé' ay afaá duxuú Arnoni nee gixsár baraá tla/ángw xatsa ay xatsoodaá Medeba sleémeero,

¹⁷ dinkwa nee yaamaá Heshboni nee gixsaduuwós sleémeero kudaá baraá xatsto. Gixsadudá' an Diboni nee Bamot-ba'ali nee Bet-ba'al-meoni.

¹⁸ Gixsadaá hatlá' a Yahasa nee Kedemoti, nee Mefa'ati,

¹⁹ nee Kiriataimu nee Sibma nee Seret-shahari, tidár gawaá tloomadár baraá xatsa.

²⁰ Gixsadaá hatlá' a Bet-peori, nee geetuú tloomár Pisga nee Bet-yeshimoti,

²¹ nee gixsadudá' sleémeero awa baraá xatsaá yaamaá waawutmo Sihoni oo xoorór Amori, kudá' aa waawuti'in Heshbonír wa ale. Sihoniwí a kudá' taa baál nee Mose, inós dinkwa nee geeraharuusér Midiani, ín Efi nee Rekemu nee Suri nee Huri nee Reba. Kuká' sleémeero an waawituú taa qaás nee waawutmo Sihoni as alee/isaywós.

²² Bala'amuduú tlaa/usmo, garmoó Beori, inós an kudá' taa gaás nee xoorór Israeli ar paánga, inós an heé wák baraá mukduú hatlá' taa tsu/i.

²³ /Uwawo digmuú tlahhoó Reubeni a yaaér Yordani. Yaamuuká' sleémeero dinkwa nee gixsadu nee ayeemoowose kina tlahhoó Reubeni haniís ar adoodá' múk dooín i dirii'i.

Yaamaá tlahhoó Gadi

²⁴ Mose yaamu gina haniís dír tlahhoó Gadi ar harqoomoó muk'ín.

²⁵ Digmuuín a yaamaá Yaseri, yaamaá Gileadi sleémeero nee tlaqtá yaamaá Amoni ay Aroeridár bihhaá da/aáw awa Raba,

²⁶ Heshboni sleeme ay Ramat-mispe, nee Betonimu, slam iimír Mahanaimúr wa tleemu ay Debiri,

²⁷ nee gixsadu sleémeero awa baraá xatstá Bet-haramu, nee Bet-nimra nee Sukoti nee Safoni nee yaamaá waawutmo Sihoni awa na meetiye', kudá' aa waawuti'in Heshbonír wa ale, yaamuuká' digmuuín a yaaér Yordani ay alhhe'eesoó tlawtá Kinereti ay gayuú da/aáw oo Yordani.

²⁸ Gixsaduuká' nee ayeemooine an yaamaá tlahhoó Gadi kay haniís ar adoodá' múk dooín i dirii'i.

Yaamaá tlaqtá tlahhoó Manase oo da/aáw

²⁹ Mose tlaqtá tlahhoó Manase sleeme gana yaamaá aalírí sláy ar adoodá' múk dooín i dirii'i.

³⁰ Yaamuuín dír niwa tlayé' a iimír Mahanaimúr wa tleemu ay Bashani sleémeero, yaamaá aáng awa waawutmo Ogu oo Bashani aa sawaawuti'ín, dinkwa nee gixsadaá mibeeraá lahhoó' awa Yairi baraá yaamaá Bashaniro.

³¹ Yaamuuín ayeemaá naa haraoohiyé' a tlaqtá yaamaá Gileadi ay Ashtaroti nee Edrei, gixsadaá aáng awa waawutmo Ogu baraá Bashaniro aa sawaawuti'ín. Yaamuuká' sleémeero kina qasiís dír tlaqtá múk guruú doó Makiri, garmoó Manase ar adoodá' múk dooín i dirii'i.

³² Mose yaamuká' Yordaniro bihhaá da/aáw nee Yeriko ti ga/aawá' gina ka'amiís qoomár tawa baraá xatsoodaá Moabí dirii'i.

³³ Ala tlahhoó Laáwi Mose gwa yaamií ka'aasiiká, asma AAKOÓ MUNGÚ, Munguú Israeli, inós an aalir'ín, ar adoodá' inós ngira dir'íní al'axweés.