YOSHUA 11 - Biblía Axweesantá Hhohho' ar Mungú 2004

Yoshua waawutmo Yabini nee waawituú bihhaá /iiko ngiwa baál

¹ Waawutmo Yabini oo Hasori kaangwí nguwa axaás, iri ya/abín amór waawutmo Yobabu oo Madoni, nee amór waawutmoó Shimroni, nee amór waawutmoó Akshafi.

² Iri male ya/abín amór waawitaaduú tlom'aá bihhaá /iya, nee kuduú baraá xatstá Yordani bihhaá basa awa tlawtá Galilaya nee kuduú afaá tlawi iisaapoó Nafot-dori bihhaá /uwaá wa alé.

³ Inós sleeme afo gari ya/aáw amór waawituú Kana'ani, kuduú bihhe tsaraawo, da/aáw nee /uwaawo, oo Amori, nee oo amór múk Hiti, nee oo múk Perisi nee oo múk Yebusi kudaá gawaá gongoama', nee amór múk Hifi, kudá' hoót bihhaá baraay awa tloomár Hermoni amór yaamaá Mispa.

⁴ Inooín slaqwaruusér yaariir ngiri burumburiyé' nee farsuú slaqwara oo gaardaá uuruxuúm oo faarooro ta aslayká adór hhasángw afaá tlawi.

⁵ Waawituú Kana'ani sleémeero tay dinkwárí burumburiít nee xafay'ín nguri tleehhiyé' dír afaá yaaér Meromu. Diirí an didaádá' slaqwaruuse tiwa haragás as tawa slaqwi nee xoorór Israeli.

⁶ AAKOÓ MUNGÚ Yoshua guri báy, «Ma baloó da'ayumiitaar as inooín. Matlo qoomár adór tihe aníng inooín in qaás gawaá dabaá múk Israeli, sleémeero kin hhaamiis. Alaá slaqwaraaro farasuuín kun kane tlaaq, nee gaarduuín kudá' slaqwara ki daa/ ar asla.»

⁷ Yoshua nee slaqwaruuseerós xafoó wakuuser'ín kuna gaanslár i haratláy dír yaaér Meromu wa alé.

⁸ AAKOÓ MUNGÚ slaqwaruusér waawutmoó Kana'ani gari haniís gawaá dabaá slaqwaruusér Israeli. Slaqwaruusér Kana'ani kari guús kay puruúts ay gixsár ur ar Sidoni nee Misrefot-maimu, bihhaá da/aawe tari puruúts ay xatstá Mispe. Slaqwaruusér Israeli muu sleémeero guri tsú/, tam heé aa meet i kaahh.

⁹ Yoshua tidá' kwa báy nee AAKOÓ MUNGÚ gana dir'íní tleéhh. Inós faras guna kane tlaáq nee gaarduudá' faras i uuruxun gina daá/.

¹⁰ Alaá slaqwaraaro qoomár Yoshua niwa watli gixsár Hasori gari hayóh, waawutmoowós kuduú geeraharusmoó wawituú hatlá' guri gaás.

¹¹ Nee múk baraadií dirií' sleémeero kuri tsuú/, tam heé wák oo taa slafíngwí geexáy i kaahh, gixsár Hasori kari daá/ ar asla.

¹² Yoshua gixsaduuká' sleémeero giri hayóh, nee waawitaáín guri tsuú/ ar paánga. Sleémeero giri hhaamiís, adoodá' Mose sagadiyusmoó AAKOÓ MUNGÚ ngwa báy.

¹³ Ala múk Israeli gixsaduudaá gawaá tlom'i kaa da/iiká, ala a har gixsár Hasori tidá' Yoshua aa daá/.

¹⁴ Múk Israeli xosluudá' na baraá gixsadií ayé' nee hikwaawo ngiri haasaáng wa ar tlayé'. Ala muu sleémeero kuna tsuú/, tam heé wák oo ta slafíngwí geexáy i kaahh.

¹⁵ Kaangwí an kudá' AAKOÓ MUNGÚ aa hara'ayín dír sagadiyusmoowós Mose. Mose tidá' sleémeero AAKOÓ MUNGÚ aa dirós i hara'ayín, gana hara'ayín dír Yoshua. Nee Yoshua tidá' AAKOÓ MUNGÚ aa dirósí hara'ayín gana ilaiwaá/. Yoshua hara'aydaá AAKOÓ MUNGÚ aa aaín dír Mose gina tleéhh sleémeero.

Yaamaá Yoshua aa hayóh

¹⁶ Yoshua nee slaqwaruuseerós yaamu ngina hayoohiyé' iimír bihhá /iikú wa tleemu ay basa. Yaamaá naa hayoohiyé' a kuká': Yaamaá gongoama', nee yaamaá Negebu, nee baraá tlapuudaá yaamu sleémeero awa Gosheni, nee yaamaá xatso awa Shefela, nee yaamaá Araba, yaamaá tlom'aá Israeli nee xatsooine,

¹⁷ yaamudaádá' na amór tloomár Halakír wa tlaye' bihhaá basa awa Seiri, nay kumiitiyé' ay Ba'al-gadi bihhaá /iya baraá tlapár Lebanoni ay tloomár Hermoni. Yoshua nee waawituú baraá yaamuudá' tana slaáqw, yaamuuín sleémeero giri hayóh nee inooín sleémeero giri tsuú/.

¹⁸ Yoshua nee waawitaáwí sleémeero tana slaqwaaqún ar har afiqoomár tleer.

¹⁹ Gixsár hatlá' ar wayda gwa tlehh nee múk Israeli i káhh, aqo har gixsár Gibeoni kilós, nee múk ayaadá' hoót a múk Hifi. Gixsadaá hatlá' sleémeero nee Yoshua tana slaáqw giri baál.

²⁰ Adoorí an adór AAKOÓ MUNGÚ kilós aa slaá'. Mukduú xoordaá hatlá' guna mune gawdeés as kahhó' nee inooín tawa slaqwi. Ina tsabín kiwa gurtlayká, ala masók kin qororo'oos, ar adór AAKOÓ MUNGÚ ngira hara'ayín dír Mose.

²¹ Qoomaadae Yoshua ina tláy múk Anaki guna hhaamiís nee gixsaduine nee kudá' yaamaá tlom'aá hootá', iimír Hebronír wa tleemu ay Debiri, ay Anabu, nee yaamaá gongoamaá Yuda nee awa Israeli.

²² Hee tumu wák oo tlahhoó Anaki oo aa meet baraá yaamaá Israeli i kaahh, awa niinár tawo dír ni meetiyé' a amór Gasa, nee Gati nee Ashdodi.

²³ Yoshua yaamu sleémeero gina hayóh, ar adoodá' AAKOÓ MUNGÚ aa oó' dír Mose. Inós yaamu gay qasiís dír tlahh'aá Israeli, nee umuúqo tlahhaywo guna dirósí sláy. Múk Israeli iri hoót ar wayda.