YOSHUA 1 - Biblía Axweesantá Hhohho' ar Mungú 2004

Mungú Yoshua nguwa ádbáy yaamaá Kana'ani ngiwa hayoohi

¹ Sagadiyusmoó AAKOÓ MUNGÚ kudá' ta bay Mose iwa gwaá', AAKOÓ MUNGÚ Yoshua garmoó Nuni alee/iisusmoó Mose, guri báy,

² «Sagadiyusmooeé' Mose aa gwaá'. Gím daxta tláw, kuúng nee múk Israeli sleémeero, yaaér Yordani waarahhaak, ta datá' baraá yaamuudá' aníng ni haniis dír xoorór Israeli.

³ Umuúqo dír ya'aahúng ni adahiia nga kuungá' i haniís, adoodá' aníng ngira al'axweés dír Mose i alé.

⁴ Digeemihúng bihhaá basko a iimír xaanxaywí wa tleemu bihhaá /iiko ay tlom'aá Lebanoni, bihhaá da/aawe ay yaaeedá' ur ar Eufrate, yaamaá múk Hiti sleémeero, bihhaá /uwaawo harki/isayhúng ay Tlawtá Tla/aangw.

⁵ Hee tumu wák i kaahh oo kuúng u tlampa'aás baraá deelór hotaawók sleémeero. Aníng nee kuúng a dinkwa, adoodá' aníng nee Mose tara dinku'uusaán daqisleém, kuúng gár uwa /aaruw i káhh, nee u geexawaaká.

⁶ Gimáy piíhh nee ilakaahareés ló' wa alé, asma kuúng mukwí un dahás baraá yaamuudá' aníng naa lo'ór wa /aáy ngiwa haniis dír baabi'ii'ín i alé.

⁷ Gimáy piíhh nee ilakaahareés ló'wa ale, nee dabe sleémeero na boo/eeseek adoodá' sagadiyusmooeé' Mose ngira kuúngí hara'ayín. Ma warqawaar laqaá ma bihhií paslaar, daqaní arba/ati a sleér amór taqo keera.

⁸ Kitaábuuwí oo dabe umuú qoomaaro soomuuseek. Nee intsaatsahheek tlatla/aangw nee xweeraawo, ala gár taaqo gooini baraá kitaábuuwí ale boo/eeseek. Daqaní kuúng amohhooa a sleér nee diihhooa baraá hotangoge.

⁹ Inslawiím adór aníng kuúng ura báw, gimáy piíhh nee ilakaahareés ló' wa ale. Ma da'ayumiitaar laqaá ma amoqwaqwadimaar, asma anuú AAKOÓ MUNGÚ Munguúwók a dinkwa nee kuúng amór taqo keera.»

Yoshua muu nguwa iislaáx

¹⁰ Aluuwo Yoshua, geeraharuuse gari báy,

¹¹ «Tlawsé' waaraahhé' ar dír umuú xafto, nee muksíng ku beera', ‹Muruú /ayma amohhe'eesaak, asma alaá deelo tame yaaér Yordani a waarahhaán tawa data' baraá yaamuudá' AAKOÓ MUNGÚ Munguúhúng ni kuungií haniisi, as kiwa ala'.› »

¹² Aluudae Yoshua tlahhoó Reubeni nee oo Gadi, nee tlaqtá tlahhoó Manase, giri báy,

¹³ «Kuungá' axweesanoó Mose sagadiyusmoó AAKOÓ MUNGÚ nuwa hara'ayín inslawaak, kudá' nuwa báy, ‹AAKOÓ MUNGÚ, Munguúhúng dír ti hungu/usa' ngi haniis, nee yaamuuká' ngi kuungií haniis.›

¹⁴ Tlaawayhúng nee na/iihúng nee hikwahunge ni meetiye' baraá ayaawí Mose naa kuungá' i haniís, amór gayuwí oo yaaér Yordani. Ala hhawaataá miguuse awa xoslaá slaqwarár koomá' ta geeraá hhaeeín wa giirin nee kiwa alee/iisi.

¹⁵ Alee/iisaak ay dír AAKOÓ MUNGÚ yaamaá hhaeehúng tay hungu/uusi ngay haniisi, adór koohúng ngira haniís, inooín sleeme yaamaá AAKOÓ MUNGÚ, Munguúhúng, aa haniís kin aal, daqaní kuungá' tari ki/á' amór yaamuuhúng kudá' tinda haniís nee Mose sagadiyusmoó AAKOÓ MUNGÚ kudá' bihhaá da/ií diriiá' yaaér Yordaniro as kiwa ala'.»

¹⁶ Yoshua kuri báy, «Muruuwí sleémeero naa atén beér u tleehhaán, nee umuúqo amór kuúng ti ya/aba atén a daqawán.

¹⁷ Adoodá' atén Mose kura iialooeesaán an adoodá' kuúng sleeme ur iiaalooeesaan. Nee AAKOÓ MUNGÚ, Munguúwók masók a dinkwa nee kuúng, adoodá' ira dinku'uús nee Mose.

¹⁸ Heé hara'ayarók gaa aahh, nee oo axweesantók ga iialooeemisaaká, laqaá umuúqo gár kwaa beeri ga axamiisaaká a gaasa. Gimáy muuna hhe'eés nee migís.»