YONA 4 - Biblía Axweesantá Hhohho' ar Mungú 2004

Buhhtaá Yona nee gurtleemuú Mungú

¹ Ala Yona adoodá' gwa sla'tiská, iri buúhh ló'wa ale.

² Yona AAKOÓ MUNGÚ guri firín, guri báy, «Án kuúng u firiím, AAKOÓ MUNGÚ. Adoosíng a adoodá' aníng naa oóiíke qoomár niwa baraá yaamuueé' i dirii'? Adoosíng an gár nisa gaanslár ta'aaím baraá yaamaá Tarshishírí alé, asma aníng a xuú' kuúng a Munguú gurhhoó', slám a gurtleemuú koón. Kuúng buhhtaawo tu inslahheeká, ala aga háts sla'aarír warqawaakahe. Tam sakwasleemadá' taa ó' a ya/aán meemuwo.

³ AAKOÓ MUNGÚ, hamí aníng u firiím, slafingw'eé' hingeeseek, ala ta niwa hoota a tsiní bara gwaá'.»

⁴ AAKOÓ MUNGÚ Yona guri báy, «Xáy, gár tas buhhaabuhh? Xáy, i ganá'a kuúng tawa buhhaabuhh?»

⁵ Naagáy Yona baraá gixsadá' gari geexáy, iri bihhaá da/aáw awa gixsadá' i iwiít, islaangós oo niiná guri tleéhh amoodií ale, iri hungu/uús baraá islangwdá', as gixsadá' adór i /is ngiwa ari.

⁶ AAKOÓ MUNGÚ si'ito'o gari ti'itiís, iri ureér, as Yona mahhtí ngiwa slay, nee iwa hungu/i baraá slahh'amuudá' i kona. Naagáy Yona iri ló'wa qwalaá/ as si'ito'oodá'.

⁷ Ala bál tsár looa niwa tleér, Mungú naanagi gana ya/aáw, si'ito'oodá' gari /ák, nee si'ito'oodá' iri kát.

⁸ Qoomár tsee/amá iwa ló'wa gwa/aát, Mungú fur'ár da/aá daahh gari ya/aáw ar ló'wa fukuukuu'. Tsee/amá iri ló'wa gwa/aát gawaá ságw Yona. Yona iri /ara/eeriít, tam gwa'ara gari fitlín, iri oó', «A tsiní bara gwaá' ta niwa slafa.»

⁹ Mungú guri báy, «Xáy, gár tas buhhaabuhh as si'ito'oorí i deéro?» Yona iri oó', «Eeít, gár nis buhhaabuuhh i deer, tam ay gwa'ara.»

¹⁰ AAKOÓ MUNGÚ Yona guri báy, «Kuúng si'ito'o a gurtleemuú i ara'aán, ar kuúng taa gadiyuská, slám aga ti'itiská, ala ina ureér ar har xweeraá wák, nee iri kát baraá xweeraá wák i alé.

¹¹ Xáy, aníng a hariímaáke gixsár Ninewi ngiwa gurtlaw, gixsadá' ur? Baraawose múk yaariír i deer oo kume tsiiruú wák nee mibeeri tsár gaa baa/ oo dákw doó /iyáy nee oo basáy ngu tsatsahhama'aaká. Nee malé alé makaá ló'wa yaariir awa ta de'en i dayá'.»